The Phnom Penh Post Search

Search form




Logo of Phnom Penh Post newspaper Phnom Penh Post - GE ផ្តល់​ប្រាក់​ជាង ៤ លាន​ដុល្លារ​ដល់​ក្រសួង​សុខាភិបាល

GE ផ្តល់​ប្រាក់​ជាង ៤ លាន​ដុល្លារ​ដល់​ក្រសួង​សុខាភិបាល

លោក ម៉ម ប៊ុនហេង រដ្ឋ​មន្ត្រី​ក្រសួង​សុខាភិបាល។
លោក ម៉ម ប៊ុនហេង រដ្ឋ​មន្ត្រី​ក្រសួង​សុខាភិបាល។ ហេង ជីវ័ន

GE ផ្តល់​ប្រាក់​ជាង ៤ លាន​ដុល្លារ​ដល់​ក្រសួង​សុខាភិបាល

ភ្នំពេញៈ អង្គការ​មូលនិធិ GE (General Electric) កាល​ពី​ថ្ងៃ​ព្រហស្បតិ៍ បាន​សម្រេច​ផ្តល់​ប្រាក់ ៣ លាន ៥ សែន​ដុល្លារ​អាមេរិក​ឲ្យ​ក្រសួង​សុខាភិបាល ក្រោម​គម្រោង​កម្មវិធី​អនាម័យ​ទឹក​ស្អាត​នៅ​តាម​មន្ទីរពេទ្យ​បង្អែក​កម្ពុជា សម្រាប់​រយៈ​ពេល ៣ ឆ្នាំ និង​ឧបករណ៍​ពេទ្យ​តម្លៃ​ជាង ១ លាន​ដុល្លារ​អាមេរិក ទៅ​ដល់​មន្ទីរពេទ្យ​កាល់ម៉ែត។

ជំនួយ​ទឹក​ប្រាក់​សរុប​ជាង ៤ លាន ៥ សែន​ដុល្លារ​នេះ​បាន​ធ្វើ​ឡើង​ក្នុង​ពិធី​ចុះ​ហត្ថលេខា​លើ​គម្រោង​នៅ​ថ្ងៃ​ម្សិល​មិញ​នេះ រវាង​លោក​រដ្ឋ​មន្រ្តី​ក្រសួង​សុខាភិបាល ម៉ម ប៊ុនហេង និង​តំណាង​ឯក​អគ្គ​រដ្ឋ​ទូត​អាមេរិក​ប្រចាំ​កម្ពុជា លោក Sean Callahan និង​នាយក​ប្រតិបត្តិ​ផ្នែក​ប្រតិបត្តិ​ការ​និង​អភិវឌ្ឍន៍​ជា​សកល​មូលនិធិ GE លោក John G. RICE។

ក្រោយ​ចុះ​ហត្ថលេខា​រួច​រដ្ឋ​លោក​រដ្ឋ​មន្ត្រី ម៉ម ប៊ុនហេង បាន​ថ្លែង​ថា ផ្អែក​តាម​គម្រោង​ថ្មី​នៃ​កម្មវិធី​អនាម័យ​ទឹក​ស្អាត​នៅ​តាម​មន្ទីរពេទ្យ​បង្អែក​កម្ពុជា តម្លៃ ៣ លាន ៥ សែន​ដុល្លារ ដែល​ចាប់​អនុវត្ត​ពី ឆ្នាំ​២០១៤ ដល់ ២០១៦ នឹង​ជួយ​ឲ្យ​មន្ទីរពេទ្យ​បង្អែក​នានា​នៅ​កម្ពុជា​ក្នុង​ការ​អភិវឌ្ឍ​មួយ​ជំហាន​ទៀត​ដើម្បី​លើក​កម្ពស់​អនាម័យ​ទឹក​ស្អាត​លើ​សេវា​វេជ្ជសាស្ត្រ។ ទន្ទឹម​នឹង​នេះ លោក​បាន​ចាត់​ទុក​ថា ការ​ប្រគល់​ឧបករណ៍​វេជ្ជសាស្ត្រ​និង​សម្ភារ បរិក្ខារ​ពេទ្យ​ជា​អំណោយ​តម្លៃ​ជាង ១ លាន​ដុល្លារ ដល់​មន្ទីរពេទ្យ​កាល់ម៉ែត​សម្រាប់​អគារ​មជ្ឈមណ្ឌល​វិទ្យាសាស្ត្រ​ប្រព័ន្ធ​ប្រសាទ​នេះ ជា​កាយ​វិការ​មនុស្ស​ធម៌​មួយ ក្នុង​ការ​លើក​ទឹក​ចិត្ត ដើម្បី​ជួយ​ឲ្យ​មន្ទីរពេទ្យ​មាន​ការ​រីក​ចម្រើន​ផ្នែក​វិស័យ​សម្ភារ​បរិក្ខារ​ពេទ្យ​ក៏​ដូច​ជា​បច្ចេកវិទ្យា​ព្យាបាល​កាន់​តែ​មាន​ប្រសិទ្ធភាព​ក្នុង​ពេល​មន្ទីរពេទ្យ​កំពុង​ខ្វះ​ខាត​ឧបករណ៍​ប្រើ​ប្រាស់។

លោក ម៉ម ប៊ុនហេង បន្ថែម​ថា៖ «ខ្ញុំ​ក៏​សូម​ផ្តាំ​ផ្ញើ​ចំពោះ​គ្រប់​មន្រ្តី​រាជការ និង​បុគ្គលិក​ទាំង​អស់ ដែល​ប្រើ​ប្រាស់​ឧបករណ៍ និង​បរិក្ខារ​ពេទ្យ​ព្យាបាល​អ្នក​ជំងឺ សូម​យក​ចិត្ត​ទុក​ដាក់​ថែ​ទាំ​ឧបករណ៍​ទាំង​នោះ ដើម្បី​គុណ​ប្រយោជន៍​យូរ​អង្វែង»។

បើ​តាម​លោក​សាស្ត្រាចារ្យ ឈាង រ៉ា អគ្គ​នាយក​មន្ទីរពេទ្យ​កាល់ម៉ែត បាន​ឲ្យ​ដឹង​ថា មន្ទីរពេទ្យ​កាល់ម៉ែត គឺជា​គ្រឹះស្ថាន​សាធារណៈ​សុខាភិបាល ដែល​បច្ចុប្បន្ន​នេះ​មាន​គ្រែ​សម្រាប់​អ្នក​ជំងឺ​សម្រាក​ព្យាបាល​សរុប​ចំនួន ៥០០ ប៉ុន្តែ តម្រូវ​ការ​ប្រើ​ប្រាស់​ឈាន​ឡើង​រហូត​ដល់ ១១០ ភាគរយ​លើស​ពី​សម្ភារ​មាន​ស្រាប់​ទៅ​ទៀត។ ក្នុង​នោះ​មាន​អ្នក​ជំងឺ​ជា​ជន​ក្រីក្រ​ប្រមាណ​ជា ២៥ ភាគរយ៕

អត្ថបទគួរចាប់អារម្មណ៍