.jpg)
កម្មការិនីតវ៉ានៅមុខរោងចក្រ ក្នុងខណ្ឌពោធិ៍សែនជ័យកាលពីខែកុម្ភៈ។ ហុង មិនា
ភ្នំពេញៈ សមាគមរោងចក្រកាត់ដេរនៅកម្ពុជាបានចេញសេចក្ដីថ្លែងការណ៍កាលពីដើមសប្ដាហ៍នេះ ដោយបានស្នើសុំរាជរដ្ឋាភិបាល ពិសេសក្រសួងការងារ និងបណ្ដុះបណ្ដាលវិជ្ជាជីវៈជួយជំរុញឲ្យភាគីពាក់ព័ន្ធទាំងអស់អនុវត្តឲ្យបានហ្មត់ចត់តាមស្មារតីច្បាប់ និងប្រកាស ព្រមទាំងបទប្បញ្ញត្តិ ចំពោះការបើករំឭកប្រាក់បំណាច់អតីតភាពការងារមុនឆ្នាំ ២០១៩ របស់កម្មករនិយោជិត។
យោងតាមសេចក្ដីថ្លែងការណ៍របស់ សមាគមរោងចក្រកាត់ដេរនៅកម្ពុជា (GMAC) ដែលចេញផ្សាយកាលពីថ្ងៃទី ១៨ ខែធ្នូ ឆ្នាំ ២០១៨ ដែលភ្នំពេញប៉ុស្តិ៍ទើបទទួលបានកាលពីម្សិលមិញបានឲ្យដឹងថា៖ «សមាគមរោងចក្រកាត់ដេរនៅកម្ពុជាបានកត់សម្គាល់ឃើញថា មានសហជីពមួយចំនួនបានដឹកនាំកម្មករនិយោជិតជាសមាជិករបស់ខ្លួនធ្វើកូដកម្មដើម្បីទាមទារឲ្យនិយោជកបើករំឭកប្រាក់បំណាច់អតីតភាពការងារជាកញ្ចប់ក្នុងពេលតែមួយជូនកម្មករនិយោជិត ដោយមិនស្របទៅនឹងប្រកាសរបស់ក្រសួងការងារ និងបណ្ដុះបណ្ដាលវិជ្ជាជីវៈទាល់តែសោះ»។
យោងតាមស្មារតីច្បាប់ និងប្រកាសរបស់ក្រសួងការងារ បានឲ្យដឹងថា ការបើករំឭកប្រាក់បំណាច់អតីតភាពការងារមុនឆ្នាំ ២០១៩ របស់កម្មករនិយោជិត ដែលបាននិងកំពុងបម្រើការងារនៅតាមសហគ្រាសគ្រឹះស្ថានផ្នែកវាយនភណ្ឌ កាត់ដេរ និងផលិតស្បែកជើង និយោជក ត្រូវបើករំឭកចំនួន ៣០ ថ្ងៃនៃប្រាក់បំណាច់អតីតភាពការងារសរុបរៀងរាល់ ១ ឆ្នាំម្ដង ដោយចំនួន ១៥ ថ្ងៃ នៅក្នុងខែមិថុនា និង ១៥ ថ្ងៃនៅក្នុងខែធ្នូនៃឆ្នាំនីមួយៗ។ ប្រាក់បំណាច់អតីតភាពការងារអតិបរមា ដែលត្រូវបើករំឭកមិនអាចលើសពី ៦ ខែនៃប្រាក់ឈ្នួលសុទ្ធសាធគិតជាមធ្យមតាមឆ្នាំនីមួយៗដែលត្រូវរំឭកនោះ។
សេចក្ដីថ្លែងការណ៍ដដែលនេះ ឲ្យដឹងថា៖ «សមាគមទាមទារឲ្យភាគីសហជីពទាំងអស់គោរពស្មារតីប្រកាសលេខ ៤៤៣ ដែលចេញដោយក្រសួងការងារនិងបណ្ដុះបណ្ដាលវិជ្ជាជីវៈ និងបទប្បញ្ញត្តិដែលពាក់ព័ន្ធ ដើម្បីភាពសុខដុមក្នុងទំនាក់ទំនងវិជ្ជាជីវៈ និងស្ថិរភាពនៃវិស័យវាយនភណ្ឌកាត់ដេរ និងផលិតស្បែកជើង»។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានថ្លែងថា កម្មករចង់ឲ្យបើក ១ ដងក្នុង ១ ឆ្នាំ ប៉ុន្តែខាងនិយោជក ទៅមិនរួច។
លោកអាត់ ធន់ ថ្លែងថា៖ «លុយបើកខែ ៦ ឆ្នាំក្រោយ ហេតុអីមានបាតុកម្មពីឥឡូវ។ វាមិនទាន់ត្រូវពីសកម្មភាព មើលទៅវានៅឆ្ងាយ។ យើងមិនចង់ឃើញការតវ៉ាអីពេលហ្នឹងទេព្រោះអត់ទាន់កើតឡើងផង ទាល់ខែ ៦ ឆ្នាំក្រោយប៉ុន្តែយើងចង់ឲ្យមានការដោះស្រាយត្រឹមត្រូវមិនចាំបាច់ទៅធ្វើកូដកម្មអីទេ»។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជានិយាយថា មានរោងចក្រប្រហែល ៣-៤ បានធ្វើកូដកម្មនៅក្នុងខែធ្នូនេះ ហើយសម្តែងការបារម្ភខ្លាចមានការធ្វើកូដកម្មទាមទារបែបនេះបន្តតាមគ្នា ខណៈវិស័យ ១ នេះកំពុងជួបបញ្ហាផងដែរ។
លោក ម៉ូនីកា ថ្លែងថា៖ «តាមច្បាប់ឲ្យធ្វើទៅតាមឆ្នាំ មិនមែនឲ្យសងទាំងអស់ទេ។ បងប្អូន គាត់ទៅញុះញង់ទាមទារឲ្យរោងចក្រសង ១ កញ្ចប់ទាំងអស់មក ហើយបើឲ្យថៅកែធ្វើការទូទាត់ក្នុងពេលតែមួយ គាត់មានលុយពីណាមកទូទាត់ ហើយវាផ្ទុយពីស្មារតីរបស់ច្បាប់ផង ប៉ុន្តែអ្វីជាក្តីបារម្ភ ការទាមទារអ៊ីចឹង ធ្វើឲ្យបន្តការទាមទារតាមគ្នា ដែលខុសគោលការណ៍ វាបង្កើតជាអស្ថិរភាពក្នុងវិស័យរបស់យើងដែលកំពុងតែជួបបញ្ហាស្រាប់ផង»។
លោក ហេង សួរ អ្នកនាំពាក្យក្រសួងការងារថ្លែងថា៖ «យើងសុំអំពាវនាវដល់ភាគីពាក់ព័ន្ធទាំងអស់ត្រូវគោរពច្បាប់និងបទប្បញ្ញត្តិនានា ពិសេសលើកកម្ពស់សន្តិភាព និងភាពស្របច្បាប់របស់សហគ្រាស»៕
