.jpg)
GMAC បានបង្ហាញការសោកស្ដាយ និងជំរុញឲ្យសហភាពអឺរ៉ុបផ្ដល់អត្ថប្រយោជន៍ប្រព័ន្ធអនុគ្រោះពន្ធ EBA ដូចដើមវិញ ដើម្បីបញ្ចៀសផលប៉ះពាល់ដល់កម្មកររាប់ម៉ឺននាក់។ ហុង មិនា
ភ្នំពេញៈ សមាគមរោងចក្រកាត់ដេរនៅកម្ពុជា (GMAC) បានបង្ហាញការសោកស្ដាយ និងជំរុញឲ្យសហភាពអឺរ៉ុបផ្ដល់អត្ថប្រយោជន៍ប្រព័ន្ធអនុគ្រោះពន្ធ EBA ដូចដើមវិញ ដើម្បីបញ្ចៀសផលប៉ះពាល់ដល់កម្មកររាប់ម៉ឺននាក់ បន្ទាប់ពីសហភាពអឺរ៉ុបសម្រេចព្យួរផ្នែកខ្លះប្រមាណ ១ ភាគ ៥ នៃទំនិញនាំចូលពីកម្ពុជាទៅទីផ្សារអឺរ៉ុប។
តាមសេចក្ដីប្រកាសព័ត៌មានពីម្សិលមិញ GMAC បានសម្ដែងការសោកស្ដាយជាខ្លាំងចំពោះគណៈកម្មការអឺរ៉ុបដែលបានសម្រេចព្យួរផ្នែកខ្លះនៃកម្មវិធីអនុគ្រោះពន្ធ EBA សម្រាប់កម្ពុជា។ GMAC ថា វិស័យកាត់ដេរ និងផលិតផលធ្វើដំណើរគឺជាផ្នែកដ៏សំខាន់ដែលទទួលបានប្រយោជន៍ ហើយវិស័យនេះតំណាងដោយ GMAC។
GMAC បន្តថា កម្មវិធីអនុគ្រោះពន្ធ EBA គាំទ្រវិស័យទាំងនេះបានផ្ដល់ការងារឲ្យកម្មករជាង ៧៥ ម៉ឺននាក់ និងបានរួមចំណែកទាញពលរដ្ឋកម្ពុជារាប់លាននាក់ចេញពីភាពក្រីក្រ ជាពិសេសគឺស្ត្រី។
ជាមួយនេះ GMAC ជំរុញឲ្យគណៈកម្មការអឺរ៉ុប និងសមាជិកសភាអឺរ៉ុបពិចារណាឡើងវិញលើការសម្រេចចិត្តនេះដោយផ្ដោតលើគុណតម្លៃដែលអឺរ៉ុបបានផ្ដល់តាមរយៈ EBA រយៈពេល ២០ ឆ្នាំ។ សេចក្ដីប្រកាសព័ត៌មានបន្តថា៖ «សមាគមសូមជំរុញសហភាពអឺរ៉ុបផ្ដល់អត្ថប្រយោជន៍ EBA ដូចដើមវិញសម្រាប់វិស័យរបស់យើងដើម្បីបុព្វហេតុនៃការអភិវឌ្ឍប្រកបដោយចីរភាព...»។
GMAC ពន្យល់ថា ខ្លួនបានបង្កើតវប្បធម៌តម្លាភាព និងគណនេយ្យភាពក្នុងផ្នែកអនុលោមភាពការងារ និងលក្ខខណ្ឌការងារ ហើយថា GMAC គឺជាសមាគមដំបូងបំផុតក្នុងពិភពលោកដែលស្វាគមន៍អង្គការអន្តរជាតិខាងការងារ (ILO) ដោយផ្អែកតាមលក្ខខណ្ឌតម្រូវថ្នាក់ជាតិ និងអន្តរជាតិ។
សេចក្ដីថ្លែងការណ៍ដដែលថា៖ «GMAC គោរព និងគាំទ្រការចូលរួមរបស់សហភាពអឺរ៉ុបក្នុងការកែលម្អគោលនយោបាយ និងសិទ្ធិមនុស្ស។ ជាអកុសលការដកការជួយភ្លាមៗបែបនេះពីប្រជាពលរដ្ឋកម្ពុជារាប់សែននាក់មិនមែនជាវិធីដែលត្រូវបន្តទៅមុខនោះទេ»។
GMAC បន្តថា ការសម្រេចចិត្តនេះទំនងជាធ្វើឲ្យមានការភាន់ច្រឡំពាក់ព័ន្ធនឹងស្ថានភាពពាណិជ្ជកម្មដែលកំពុងឆ្ពោះទៅមុខ ហើយអាចលើកទឹកចិត្តឲ្យអ្នកបញ្ជាទិញពីប្រទេសផ្សេងដែលការគោរពសិទ្ធិមនុស្សអន់ជាងកម្ពុជាឆ្ងាយ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានថ្លែងពីម្សិលមិញថា ការដកផ្នែកខ្លះនៃ EBA ធ្វើឲ្យមានភាពអវិជ្ជមានដល់កម្ពុជា។
លោកថា៖ «ផលអវិជ្ជមានតាមរយៈអីគឺតាមរយៈដៃគូពាក់ព័ន្ធគេមើលឃើញពីស្ថានភាពមួយដោយការប្រៀបធៀបរវាងប្រទេសបង់ក្លាដែស មីយ៉ាន់ម៉ា វៀតណាម ហើយគេមើលឃើញថា ប្រទេសយើងដូចជាអាក្រក់ជាងប្រទេសទាំងនោះ»។
លោកបន្តថា ការដកនេះអាចធ្វើឲ្យអ្នកបញ្ជាទិញធំៗពិចារណាថា តើពួកគេគួរបន្តបញ្ជាទិញទំនិញពីកម្ពុជាឬយ៉ាងណា? ពីព្រោះបើគេនៅបន្តបញ្ជាទិញពួកគេរួមចំណែកជាមួយថៅកែក្នុងការរំលោភសិទ្ធិការងារ។
លោកថ្លែងថា៖ «ប៉ុន្តែអ្វីដែលយើងបារម្ភគឺអ្នកបញ្ជាទិញធំៗនោះ យើងខ្លាចបំផុតនៅពេលអ្នកបញ្ជាទិញគាត់ផ្អាក ឬបន្ថយការបញ្ជាទិញ ដូចជា ក្រុមហ៊ុន H&M ដែលជាអ្នកបញ្ជាទិញធំលើពិភពលោក។ បើក្រុមហ៊ុនធំៗកាត់បន្ថយការបញ្ជាទិញនោះ វានឹងមានផលប៉ះពាល់ដល់បងប្អូនកម្មករហើយ»។
លោកថា នៅមានពេលគ្រប់គ្រាន់មុនពេលការដកនេះចូលជាធរមាននៅថ្ងៃទី ១២ សីហា ហើយអំឡុងពេលនេះកម្ពុជា និងសហភាពអឺរ៉ុបគួរបន្តជជែកគ្នាលើបញ្ហាដែលនៅសេសសល់។
លោកថ្លែងថា៖ «សហភាពអឺរ៉ុបគាត់ពិនិត្យឃើញហើយថា ខ្មែរយើងមិនអាក្រក់ណាស់ណាទេ បើគាត់មើលឃើញថា ខ្មែរមិនល្អ គាត់មិនដកតែប្រមាណ ២០ ភាគរយទេ»។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មិនអាចទាក់ទងសុំការពន្យល់បានទេកាលពីម្សិលមិញ។ ប៉ុន្តែលោកបានថ្លែងប្រាប់សារព័ត៌មានថា ទោះបីជាកម្ពុជាបាត់បង់ EBA ផ្នែកខ្លះក៏ដោយក៏កម្ពុជានៅធ្វើតាមការតាំងចិត្តក្នុងការលើកកម្ពស់លក្ខខណ្ឌការងារ ការគោរពសិទ្ធិសេរីភាពកម្មករ និយោជិត ព្រោះកិច្ចការទាំងនេះជាអាទិភាពរបស់រាជរដ្ឋាភិបាលកម្ពុជា៕
វីដេអូ៖
