The Phnom Penh Post Search

Search form




Logo of Phnom Penh Post newspaper Phnom Penh Post - GMAC ថា​ឆ្នាំ​ថ្មី​កម្មករ​អាច​រក​ចំណូល​សរុប​រហូត $២៥០

GMAC ថា​ឆ្នាំ​ថ្មី​កម្មករ​អាច​រក​ចំណូល​សរុប​រហូត $២៥០

ការ​តវ៉ា​ពី​លក្ខខណ្ឌ​ការងារ​របស់​កម្មករ​នៅ​តែ​កើត​មាន​ទោះ​មាន​ការ​កំណត់​ប្រាក់​ឈ្នួល​ឆ្នាំ​ថ្មី​ក៏​ដោយ។
ការ​តវ៉ា​ពី​លក្ខខណ្ឌ​ការងារ​របស់​កម្មករ​នៅ​តែ​កើត​មាន​ទោះ​មាន​ការ​កំណត់​ប្រាក់​ឈ្នួល​ឆ្នាំ​ថ្មី​ក៏​ដោយ។ ម៉ៃ វីរៈ

GMAC ថា​ឆ្នាំ​ថ្មី​កម្មករ​អាច​រក​ចំណូល​សរុប​រហូត $២៥០

ភ្នំពេញៈ នៅ​ក្នុង​សេចក្តី​ថ្លែង​ការណ៍​មួយ​ចេញ​នា​សប្តាហ៍​នេះ សមាគម​រោងចក្រ​កាត់​ដេរ​នៅ​កម្ពុជា (GMAC) បាន​អះអាង​ថា តាម​រយៈ​ប្រាក់​ឈ្នួល​អប្បបរមា​ថ្មី កម្មករ​ម្នាក់​អាច​រក​ចំណូល​បាន​រហូត​ដល់ ២៥០ ដុល្លារ​ក្នុង​មួយ​ខែ ប៉ុន្តែ​អ្នក​ខ្លះ​ថា តួលេខ​ប៉ាន់​ប្រមាណ​នេះ​គឺជា​ការ​បំប៉ោង​យ៉ាង​ខ្លាំង។

ក្រសួង​ការងារ​កាល​សប្តាហ៍​មុន បាន​អនុម័ត​កំណត់​ប្រាក់​ឈ្នួល​អប្បបរមា​ចំនួន ១២៨ ដុល្លារ​ក្នុង ១ ខែ សម្រាប់​វិស័យ​កាត់​ដេរ​កម្ពុជា ដោយ​មិន​រួម​បញ្ចូល​ប្រាក់​អត្ថ​ប្រយោជន៍​ដទៃ​ទៀត​ដែល​តម្រូវ​ដោយ​ច្បាប់​ដូច​ជា ប្រាក់​សោហ៊ុយ​ធ្វើ​ដំណើរ​និង​ថ្លៃ​ស្នាក់​នៅ ប្រាក់​រង្វាន់​ការងារ​ទៀង​ទាត់ ប្រាក់​អតីត​ភាព​ការងារ​និង​ប្រាក់​ថ្លៃ​បាយ​ពេល​ថែម​ម៉ោង។ ប្រាក់​ឈ្នួល​អប្បបរមា​ក្នុង​វិស័យ​កាត់​ដេរ​នា​ពេល​បច្ចុប្បន្ន​មាន​ចំនួន ១០០ ដុល្លារ​ក្នុង ១ ខែ រហូត​ដល់ ខែ​មករា ឆ្នាំ​២០១៥ ទើប​ប្រាក់​ឈ្នួល​ថ្មី ១២៨ ដុល្លារ​ចូល​ជា​ធរមាន។

សេចក្តី​ថ្លែង​ការណ៍​របស់​សមាគម​រោងចក្រ​កាត់​ដេរ​នៅ​កម្ពុជា​បាន​អះអាង​ថា៖ «ការ​ពិត ធាតុ​នៃ​ប្រាក់​ឈ្នួល​មាន​ច្រើន​ដូច​ជា៖ ប្រាក់​ឈ្នួល​គោល (យ៉ាង​ទាប​ក៏​ត្រូវ​ស្មើ​កំរិត​ប្រាក់​ឈ្នួល​អប្បបរមា​ដែល​បាន​កំណត់) ប្រាក់​ឧបត្ថម្ភ​ស្នាក់​នៅ​ឬ​ធ្វើ​ដំណើរ (តម្រូវ​ដោយ​ច្បាប់) ប្រាក់​រង្វាន់​ធ្វើ​ការងារ​ទៀង​ទាត់ (តម្រូវ​ដោយ​ច្បាប់) ប្រាក់​រង្វាន់​អតីតភាព​ការងារ (តម្រូវ​ដោយ​ច្បាប់) ប្រាក់​រង្វាន់​សម្រាប់​ការ​ផលិត​ដល់​ឬ​លើស​គោល​ដៅ ប្រាក់​ជំនាញ ឬ​ប្រាក់​តួនាទី ប្រាក់​ធ្វើ​ការ​ថែម​ម៉ោង​និង​ថ្លៃ​បាយ​ពេល​ថែម​ម៉ោង និង​ប្រាក់​ឧបត្ថម្ភ​ផ្សេងៗ​ទៀត​តាម​គោល​នយោបាយ​នៃ​រោងចក្រ​នីមួយៗ។ ប្រាក់​ឈ្នួល​សរុប​មិន​មែន ១២៨ ដុល្លារ​ទេ បើ​ធ្វើ​ការ​គ្រប់​ចំនួន​ថ្ងៃ​ត្រូវ​ធ្វើ​ការ​ក្នុង​ខែ​នីមួយៗ»។

សេចក្តី​ថ្លែង​ការណ៍​នេះ​បាន​សន្និដ្ឋាន​ថា៖ «សរុប​មក​ចាប់​ពី ខែ​មករា ឆ្នាំ​២០១៥ ត​ទៅ​កម្រិត​ប្រាក់​ឈ្នួល​ប្រចាំ​ខែ​សរុប​ដែល​កម្មករ​អាច​មាន​លទ្ធភាព​នឹង​ទទួល​បាន គឺ​ចន្លោះ​ពី ២២៥ ដុល្លារ​ទៅ ២៥០ ដុល្លារ»។

ដោយ​ស្រប​ថា ប្រាក់​ដែល​កម្មករ​ទទួល​បាន​សរុប​យ៉ាង​ហោច ១៣៥ ដុល្លារ ក្នុង ១ ខែ សម្រាប់​ឆ្នាំ​ក្រោយ លោក Dave Welsh នាយក​ប្រចាំ​ប្រទេស​កម្ពុជា​នៃ​មជ្ឈមណ្ឌល​អាមេរិក​ដើម្បី​សាមគ្គីភាព​ការងារ (ACILS) បាន​ថ្លែង​ថា រោងចក្រ​ត្រូវ​បាន​ជំរុញ​មិន​ឲ្យ​ផ្តល់​ប្រាក់​រង្វាន់​ធ្វើ​ការងារ​ទៀង​ទាត់ (លុះ​ត្រា​តែ​ធ្វើ​ការ​មិន​អវត្តមាន)។

លោក Welsh បាន​ហៅ​ការ​សន្និដ្ឋាន​ក្នុង​សេចក្តី​ថ្លែង​ការណ៍​របស់​សមាគម​រោងចក្រ​កាត់​ដេរ​ដែល​ថា កម្មករ​ទទួល​បាន​ចន្លោះ​ពី ២២៥ ដុល្លារ​ទៅ ២៥០ ដុល្លារ​ថា ជា​ការ «បំប៉ោង​ដ៏​ធំ​មួយ»។

លោក Welsh ថ្លែង​កាល​ពី​ម្សិល​មិញ​ថា៖ «កម្មករ​ភាគ​ច្រើន​នឹង​មិន​បាន​ដល់​ចំនួន​នោះ​ទេ..វា​មិន​ត្រឹម​ត្រូវ​ទាំង​ស្រុង។ ប្រសិន​បើ​កម្មករ​ម្នាក់​សុខ​ចិត្ត​មិន​ដេក ហើយ​រោងចក្រ​បើក​ដំណើរការ ២៤ ម៉ោង​ក្នុង ១ ថ្ងៃ» កម្មករ​អាច​ទទួល​បាន​ចំនួន​នោះ។

អ្នក​នាង ចែ ចរិយា អាយុ ៣១​ឆ្នាំ ជា​កម្មការិនី​កាត់​ដេរ​នៅ​រោងចក្រ​ក្នុង ខណ្ឌ​មាន​ជ័យ រាជធានី​ភ្នំពេញ មិន​យល់​ស្រប​នឹង​ការ​អះអាង​របស់ GMAC នេះ​ដែរ។

ដោយ​ធ្វើ​ការ​ថែម​ម៉ោង​មួយ​ម៉ោង​រយៈ​ពេល ២ សប្តាហ៍​ក្នុង ១ ខែៗ នាង​រក​ចំណូល​បាន​ប្រហែល ១៦០ ដុល្លារ​ក្នុង​មួយ​ខែ ហើយ​ថា ប្រាក់​ឈ្នួល​អប្បបរមា​ថ្មី ចំណូល​នាង​អាច​នឹង​កើន​ឡើង​ដល់ ១៨៨ ដុល្លារ។

អ្នក​នាង​ថា គ្មាន​កម្មករ​កាត់​ដេរ​ណា​រក​ចំណូល​ក្នុង​លំដាប់ ២០០ ដុល្លារ​ទេ។ ចរិយា បន្ត​ថា៖ «ខ្ញុំ​គិត​ថា កម្មករ​មិន​អាច​ធ្វើ​ការងារ​គ្រប់​ម៉ោង​រាល់​ថ្ងៃ​ដើម្បី​ទទួល​បាន​ចំនួន​ដែល GMAC អះអាង​ទេ។ យើង​មិន​ថែម​ពេល​ដើម្បី​ធ្វើ​ការ​លំបាក​ជា​រៀង​រាល់​ថ្ងៃ​ទេ ពិសេស​ថែម​ម៉ោង»។

លោក ខេន លូ អគ្គ​លេខាធិការ GMAC មិន​អាច​ទាក់​ទង​សុំ​ការ​បំភ្លឺ​បាន​ទេ កាល​ម្សិល​មិញ។

នៅ​ក្នុង​ជំនួប​មួយ​រវាង​អគ្គ​នាយក​រង​ផ្នែក​គោល​នយោបាយ​របស់​អង្គការ​ពលកម្ម​អន្តរជាតិ (ILO) លោក​ស្រី Sandra Polaski រដ្ឋ​មន្រ្តី​ក្រសួង​ការងារ លោក អ៊ិត សំហេង រដ្ឋ​មន្រ្តី​ការ​បរទេស លោក ហោ ណាំហុង ពី​ម្សិល​មិញ​លោក​ស្រី Polaski បាន​សរសើរ​រដ្ឋាភិបាល​កម្ពុជា​ចំពោះ​ប្រាក់​ឈ្នួល​ថ្មី​នេះ។ នេះ​បើ​តាម​ការ​ឲ្យ​ដឹង​របស់​អ្នក​នាំ​ពាក្យ​ក្រសួង​ការ​បរទេស លោក កុយ គួង កាល​ម្សិល​មិញ។

លោក កុយ គួង បាន​ថ្លែង​ថា៖ «លោក​ស្រី Polaski យល់​ថា ឆន្ទៈ​របស់​រដ្ឋាភិបាល​គឺ​តែង​តែ​ជួយ​កម្មករ​និង​ធ្វើ​ឲ្យ​ស្តង់ដារ​រស់​នៅ​របស់​ពួក​គេ​ប្រសើរ​ឡើង»។

នាយក​នៃ​អង្គការ​ពលកម្ម​អន្តរជាតិ លោក ទួន សុភ័ណ មិន​អាច​សុំ​អត្ថាធិប្បាយ​អំពី​ការ​ថ្លែង​របស់​លោក កុយ គួង ដែល​បាន​ដក​ស្រង់​សម្តី​របស់​លោក​ស្រី Polaski បាន​ទេ៕

អត្ថបទគួរចាប់អារម្មណ៍