ភ្នំពេញៈ លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា ហៅកាត់ GMAC និងលោក ខេន លូ អគ្គលេខាធិការ GMAC បានជួបពិភាក្សាជាមួយគណៈកម្មការពាណិជ្ជកម្មនៃសហភាពអឺរ៉ុបនៅក្នុងទីក្រុងប្រ៊ុចសែល ប្រទេស ប៊ែលហ្ស៊ិក កាលពីថ្ងៃសុក្រដើម្បីពិភាក្សាអំពីបញ្ហា «គ្រប់មុខទំនិញទាំងអស់លើកលែងតែសពា្វវុធ» ហៅកាត់ថា EBA។
លោក វ៉ាន់ ស៊ូអៀង ប្រាប់ភ្នំពេញប៉ុស្ដិ៍កាលពីថ្ងៃអាទិត្យថា លោកបានជួប និងស្នើសុំឱ្យសមាជិកអឺរ៉ុបប្រហែលជា ២៧ ប្រទេស ដែលមានអាសនៈនៅក្នុងគណៈកម្មការពាណិជ្ជកម្មនៃសហភាពអឺរ៉ុបរួមទាំងប្រធានគណៈកម្មការនេះផងដែរឲ្យបន្តរក្សា EBA សម្រាប់កម្ពុជា។ លោកនិយាយថា៖ «ពួកយើងបានបញ្ចុះបញ្ចូលស្នើសុំឱ្យសហភាពអឺរ៉ុបរក្សា EBA សម្រាប់កម្ពុជា ដោយសារកម្ពុជាគោរពតាមទាំងស្រុងទៅលើអនុសញ្ញាការងារ និងអនុសញ្ញាគ្រឹះរបស់ ILO»។
កាលពីថ្ងៃសៅរ៍ GMAC បានបង្ហោះសារនៅលើបណ្ដាញសង្គមហ្វេសប៊ុកថា ពួកគេកំពុងទន្ទឹងរង់ចាំនូវលទ្ធផលវិជ្ជមាន និងយុត្តិធម៌សម្រាប់វិស័យកាត់ដេរនៅក្នុងប្រទេស កម្ពុជា។
លោក កាំង ម៉ូនីកា អគ្គលេខាធិការរងរបស់ GMAC ថ្លែងថាដំណើរទស្សនកិច្ចទៅកាន់ទីក្រុងប្រ៊ុចសែលរបស់លោក វ៉ាន់ ស៊ូអៀង និងលោក ខេន លូ គឺក្នុងបេសកកម្មដើម្បីជួបជាមួយនឹងអ្នកតាក់តែងច្បាប់របស់សហភាពអឺរ៉ុប ដើម្បីជំរុញឲ្យពួកគេផ្ដល់នូវការពិតទាំងអស់ទាក់ទិននឹងវិស័យកាត់ដេរសម្លៀកបំពាក់ និងស្បែកជើងនៅក្នុងប្រទេស កម្ពុជា។
លោកថា៖ «ពួកយើងអាចធ្វើបែបនេះបានដោយសារតែពួកយើងក៏បានចុះឈ្មោះជាភាគីដែលទទួលផលប្រយោជន៍ផងដែរ»។
លោកស្រី Eszter BALA''ZS មន្ដ្រីទទួលបន្ទុកផ្នែកព័ត៌មាននៃគណៈកម្មការពាណិជ្ជកម្មអន្តរជាតិនៃសហភាពអឺរ៉ុបមិនអាចសុំការបញ្ជាក់អំពីកិច្ចប្រជុំនេះបានទេកាលពីថ្ងៃអាទិត្យ។
សហភាពអឺរ៉ុបបានចាប់ផ្តើមដំណើរការនីតិវិធីដក EBA សម្រាប់កម្ពុជាកាលពីថ្ងៃទី ១២ ខែ កុម្ភៈ។ ការស៊ើបអង្កេតតាមដានដើម្បីឈានដល់ការសម្រេចចិត្តដក EBA នោះត្រូវបានបញ្ចប់នៅថ្ងៃទី ១២ ខែ សីហា។ បន្ទាប់មកសហភាពអឺរ៉ុបនឹងផ្ញើរបាយការណ៍ លទ្ធផលសម្រេចមកកាន់រដ្ឋាភិបាលកម្ពុជាក្នុងរយៈពេល ៣ ខែនេះ។
ប្រភពមួយដែលបានដឹងអំពីបញ្ហានេះ តែសុំមិនបញ្ចេញឈ្មោះបានថ្លែងថា បើតាមនីតិវិធី ក្រោយពេលបញ្ចប់ការស៊ើបអង្កេតតាមដាននៅថ្ងៃទី ១២ ខែសីហា សហភាពអឺរ៉ុបត្រូវសរសេររបាយការណ៍មួយស្ដីពីការសម្រេចដែលត្រូវផ្ញើជូនកម្ពុជានៅថ្ងៃទី ១២ ខែ វិច្ឆិកា។ ក៏ប៉ុន្តែលោកបានអះអាងថា អាណត្ដិរបស់ប្រធានគណៈកម្មការសហភាពអឺរ៉ុបនឹងត្រូវបានបញ្ចប់នៅថ្ងៃទី ៣១ ខែតុលានេះ។
ហេតុដូច្នេះលោកស្រី Cecilia Malmstro''m ស្នងការពាណិជ្ជកម្មនៃសហភាពអឺរ៉ុបត្រូវបានគេរំពឹងទុកថា លោកស្រីអាចបញ្ចប់ការធ្វើរបាយការណ៍ឲ្យបាននៅពាក់កណ្ដាលខែតុលានេះ។ ការសម្រេចលឿនបែបនេះក៏ដោយសារតែលោកស្រីព្រួយបារម្ភថា គណៈកម្មការសហភាពអឺរ៉ុបអាណត្ដិថ្មីអាចនឹងធ្វើការវាយតម្លៃផ្សេងអំពីស្ថានភាពប្រជាធិបតេយ្យ និងសិទ្ធិមនុស្សនៅក្នុងប្រទេសកម្ពុជា។
លោកថ្លែងទៀតថា លោកស្រី Cecilia Malmstro''m ត្រូវបានគេជឿថាមានទំនោរទៅខាងក្រុមមួយហៅថា «អង្គការសេរីនិយមអន្តរជាតិ» (Liberal International) ដែលជាក្រុមនយោបាយ ដែលមានទំនាក់ទំនងជាមួយនឹងអតីតគណបក្សសង្គ្រោះជាតិ និងជាអ្នកដែលមានការប្រឆាំងយ៉ាងខ្លាំងទៅលើរដ្ឋាភិបាលកម្ពុជា។ «ហេតុដូច្នេះបានជាតំណាង GMAC បានគិតដិតដល់ទៅលើបញ្ហានេះ ហើយបានជួបពិភាក្សាជាមួយសមាជិកនៃសភាអឺរ៉ុបដែលមកពីក្រុមនយោបាយខុសៗគ្នា»។
ប្រភពដដែលជឿជាក់ថា មន្ត្រីថ្នាក់ទីស្ដីការគណៈរដ្ឋមន្ត្រីអឺរ៉ុបមិនបានដឹងអំពីចេតនារបស់លោកស្រី Cecilia Malmstrom ក្នុងការផ្ញើរបាយការណ៍របស់លោកស្រីឲ្យបានមុនការបញ្ចប់អាណត្ដិរបស់លោកស្រី និងព្រមទាំងឲ្យបានមុនកាលកំណត់នោះទេ។
លោក កេត សោផាន់ អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិថ្លែងពីម្សិលមិញថា លោកមិនអាចធ្វើអធិប្បាយបានទេ ដោយសារតែសហភាពអឺរ៉ុបមិនទាន់បញ្ជាក់ប្រាប់ថា ពួកគេនឹងបញ្ជូនសេចក្តីសន្និដ្ឋានពីរឿង EBA មកកម្ពុជានៅពេលណានោះឡើយ៕ Sina