ភ្នំពេញៈ សមាគមរោងចក្រកាត់ដេរនៅកម្ពុជាហៅកាត់ថា GMAC បានប្ដឹងទៅតុលាការសហភាពអឺរ៉ុបស្នើសុំឱ្យតុលាការមោឃភាពការសម្រេចផ្អាកប្រព័ន្ធអនុគ្រោះពន្ធ EBA ២០ ភាគរយ របស់សហភាពអឺរ៉ុបដែលចូលជាធរមានកាលពីថ្ងៃទី ១២ ខែ សីហា ២០២០ កន្លងទៅ ដោយលើកយកអំណះអំណាងចំនួន ២ មកធ្វើជាសំអាង និងករណីលេខកូដទំនិញដែលប៉ះពាល់ដល់សមាជិក GMAC ផងដែរ។
យោងតាមទិនានុប្បវត្តិ ឬការចេញផ្សាយរបស់សហភាពអឺរ៉ុប GMAC បានប្ដឹងទៅកាន់តុលាការអឺរ៉ុបកាលពីថ្ងៃទី ១៦ កក្កដា ក្នុងសំណុំរឿងលេខ T-454/20 ។ បណ្ដឹងនេះត្រូវបានតំណាងដោយមេធាវី ២ រូបមានឈ្មោះ C. Ziegler និង S. Monti និងមានគណៈកម្មការអឺរ៉ុបជាចុងចម្លើយ។
បណ្ដឹងរបស់ GMAC បានស្នើតុលាការឱ្យមោឃភាពសេចក្ដីសម្រេចរបស់គណៈកម្មការអឺរ៉ុបអំពីការដកបណ្ដោះអាសន្ននៃប្រព័ន្ធអនុគ្រោះពន្ធសម្រាប់លេខកូដនៃទំនិញដែលប៉ះពាល់ដល់សមាជិករបស់ GMAC។ ទំនិញនាំចេញពីកម្ពុជាទៅសហភាពអឺរ៉ុបដែលរងការប៉ះពាល់ពីការដក EBA ២០ ភាគរយនេះមានចំនួន ៤០ មុខ។ ប៉ុន្តែក្នុងចំណោមមុខទំនិញទាំងអស់នេះមាន ១ មុខមិនស្ថិតក្នុងចំណោមទំនិញដែលផលិតដោយសមាជិករបស់ GMAC ទេគឺស្ករសដែលមានលេខកូដ HS code 1212 93។
ក្រៅពីស្នើសុំឱ្យតុលាការធ្វើមោឃភាពការសម្រេចនេះ GMAC ក៏ទាមទារឱ្យគណៈកម្មការអឺរ៉ុបទទួលខុសត្រូវលើការចំណាយផ្ទាល់របស់ខ្លួន និងបង់ប្រាក់ដែលអ្នកដាក់ពាក្យស្នើសុំគឺប្រាក់ដែលត្រូវចំណាយសម្រាប់ដំណើរការរឿងក្ដីនេះ។ នេះបើយោងតាមទិនានុប្បវត្តិរបស់សហភាពអឺរ៉ុបដដែល។
ដើមបណ្ដឹងបានលើកឡើងនូវអំណះអំណាងផ្លូវច្បាប់ចំនួន ២ ចំណុចនៅក្នុងបណ្ដឹងនេះ។ អំណះអំណាងទី ១ ចោទប្រកាន់ថា សេចក្ដីសម្រេចរបស់សហភាពអឺរ៉ុប «រំលោភគោលការណ៍ភាពសមាមាត្រ និងការតម្រូវឱ្យមានភាពស៊ីចង្វាក់គ្នារវាងគោលនយោបាយរបស់សហភាពអឺរ៉ុប និងសកម្មភាពនានា»។
អំណះអំណាងទី ១ ដដែលលើកឡើងថា៖ «គណៈកម្មការអឺរ៉ុបមិនបានធ្វើការវាយតម្លៃឱ្យបានសមរម្យអំពីភាពសមាមាត្រនៃការដកបណ្ដោះអាសន្នដោយផ្នែកនៃការយកពន្ធគយសម្រាប់វិស័យសម្លៀកបំពាក់ ស្បែកជើង និងសម្ភារធ្វើដំណើរ»។
នៅក្នុងអំណះអំណាងទី ២ ដើមបណ្ដឹងក៏បានលើកឡើងថា មានការរំលោភលើសិទ្ធិដែលការពារដោយនីតិវិធី ដោយសារតែគណៈកម្មការអឺរ៉ុបបរាជ័យមិនបានផ្ដល់នូវហេតុផលសមរម្យ ដូចមានចែងក្នុងមាត្រា ២៩៦(២) នៃសន្ធិសញ្ញាស្ដីពីការប្រព្រឹត្តទៅនៃសហភាពអឺរ៉ុប។ នេះបើតាមទិនានុប្បវត្តិដដែល។
លោក ខេន លូ អគ្គលេខាធិការ GMAC បានថ្លែងប្រាប់កាលពីម្សិលមិញថា ការដាក់បណ្ដឹងនេះធ្វើឡើង ដើម្បីជំទាស់នឹងការសម្រេចចិត្តផ្អាកប្រព័ន្ធអនុគ្រោះពន្ធ ២០ ភាគរយ។
លោកបានបញ្ជាក់ថា៖ «យើងប្រើប្រាស់វិធីនេះជាជម្រើសចុងក្រោយ ដើម្បីស្វែងរកធនធាន បន្ទាប់ពីការពន្យល់ណែនាំគ្រប់ទម្រង់ផ្សេងទៀតក៏ដូចជា ការអំពាវនាវបានបរាជ័យ»។ ទោះយ៉ាងណាលោកសុំមិនពន្យល់ពីនីតិវិធីច្បាប់ និងសេចក្ដីលម្អិតនៃបណ្ដឹងនេះទេ ដោយលោកស្នើឱ្យយោងទៅលើឯកសារដែលមានស្រាប់។
បើតាមការចេញផ្សាយរបស់តុលាការយុត្តិធម៌សហភាពអឺរ៉ុបសំណុំរឿងលេខ T-454/20 បានចូលមកដល់តុលាការនេះកាលពីថ្ងៃទី ១៤ ខែសីហា ឆ្នាំ ២០២០។ ក៏ប៉ុន្តែមិនទាន់មានការកំណត់កាលបរិច្ឆេទថា តើតុលាការនឹងដំណើរការសំណុំរឿងនេះនៅពេលណានៅឡើយ។ ភ្នំពេញ ប៉ុស្តិ៍មិនទាន់អាចសុំការបញ្ជាក់បន្ថែមអំពីការប្ដឹងផ្ដល់នេះពីសំណាក់អ្នកនាំពាក្យនៃគណៈកម្មការអឺរ៉ុប និងអ្នកនាំពាក្យតុលាការយុត្តិធម៌សហភាពអឺរ៉ុបបានទេកាលពីម្សិលមិញ។
កាលពីខែកុម្ភៈ គណៈកម្មការអឺរ៉ុបបានសម្រេចផ្អាកប្រព័ន្ធអនុគ្រោះពន្ធ EBA ចំនួន ២០ ភាគរយនៃទំនិញនាំចូលទីផ្សារអឺរ៉ុបដោយអះអាងថា កម្ពុជាបានរំលោភសិទ្ធិមនុស្ស សិទ្ធិការងារ ធ្វើឱ្យធ្លាក់ចុះលទ្ធិប្រជាធិបតេយ្យ។ ការសម្រេចនេះចូលជាធរមានកាលពីថ្ងៃទី ១២ សីហា។ ទោះយ៉ាងណា រដ្ឋាភិបាលកម្ពុជាបានបដិសេធការចោទប្រកាន់ទាំងនោះ។
ទាក់ទិននឹងបញ្ហានេះកាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន ក៏បានលើកឡើងពីការដក EBA ផងដែរ នៅក្នុងសាររបស់លោកថ្លែងទៅកាន់អង្គការសហប្រជាជាតិក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី ៧៥។ លោកថា ការណ៍ដែលសហភាពអឺរ៉ុបដកហូត EBA មួយផ្នែកពីកម្ពុជានៅពេលដែលប្រទេសនេះកំពុងប្រឹងប្រែងតស៊ូជម្នះជំងឺរាតត្បាតកូវីដ ១៩ គឺជារឿងច្រំដែលនៃប្រវត្តិសាស្ត្រ។
ទោះជាយ៉ាងណា លោកនាយករដ្ឋមន្ត្រីបានបញ្ជាក់ច្បាស់ថា៖ «កម្ពុជានៅតែប្តេជ្ញាចិត្តយ៉ាងពេញទំហឹង ដូចដែលខ្លួនធ្លាប់បានធ្វើអស់រយៈពេល ៤០ ឆ្នាំកន្លងមកនេះក្នុងការការពារនូវអ្វីដែលខ្លួនជឿជាក់ថាជាមាគ៌ាដ៏ត្រឹមត្រូវ នោះគឺការការពារអធិបតេយ្យភាព និងថែរក្សាសន្តិភាពដែលកសាងបានយ៉ាងលំបាកលំបិន និងទទួលបាននូវការសាទរពេញទំហឹងដោយប្រជាជាតិកម្ពុជាទាំងមូលដែលបានឆ្លងកាត់សោកនាដកម្មដ៏ខ្លោចផ្សាបំផុត និងកំពុងតែងើបឈរឡើងជាប្រជាជាតិ ១ ស្មើមុខមាត់ ស្មើភាព និងស្មើសិទ្ធិ ជាមួយបណ្តាប្រជាជាតិដទៃនៅក្នុងតំបន់ និងសកលលោក»៕
វីដេអូ៖