ភ្នំពេញៈ សមាគមរោងចក្រកាត់ដេរនៅកម្ពុជា (GMAC) អំពាវនាវដល់អ្នកបញ្ជាទិញទាំងអស់ឲ្យគោរពតាមលក្ខខណ្ឌទូទាត់ប្រាក់សម្រាប់ទំនិញ ដែលបានទទួលរួចហើយ ឬកំពុងដឹកទៅឲ្យអ្នកបញ្ជាទិញ ស្របពេលវិស័យកាត់ដេរកំពុងតែប្រឈមនឹងវិបត្តិធ្ងន់ធ្ងរ ខណៈមានរោងចក្រ ១៨០ ហើយបានព្យួរប្រតិបត្តិការ រីឯ ៦០ រោងចក្រទៀតនឹងព្យួរការងារកម្មកររាប់ម៉ឺននាក់ក្នុងពេលឆាប់ៗ។
លិខិតអំពាវនាវដល់អ្នកបញ្ជាទិញចុះថ្ងៃទី ០៤ ខែឧសភារបស់ GMAC បានឲ្យដឹងថាចាប់តាំងពីការអំពាវនាវរបស់ខ្លួនទៅកាន់អ្នកបញ្ជាទិញកាលពីដើមខែមេសា GMAC ទទួលបានការប្តេជ្ញាចិត្តពីអ្នកបញ្ជាទិញមួយចំនួន ប៉ុន្តែស្ថានភាពចាប់តាំងពីពេលនោះមកកាន់តែអាក្រក់ជាសកល និងជាពិសេសក្នុងប្រទេសកម្ពុជា។
GMAC បន្តថា៖ «យើងយល់អំពីភាពលំបាកដែលអ្នកបញ្ជាទិញកំពុងប្រឈមមុខ ប៉ុន្តែយើងពិតជាអំពាវនាវយ៉ាងខ្លាំងទៅអ្នកបញ្ជាទិញទាំងអស់មេត្តាគោរពតាមលក្ខខណ្ឌទូទាត់ប្រាក់សម្រាប់ទំនិញដែលបានទទួលរួចហើយ និង/ឬដែលកំពុងដឹកទៅឲ្យអ្នកបញ្ជាទិញ។ រោងចក្រនៅកម្ពុជាកំពុងរងគ្រោះរួចហើយពីការលុបចោលការបញ្ជាទិញជាច្រើន និងការគ្មានការបញ្ជាទិញថ្មីៗ ហើយមិនអាចទ្រាំទ្រនឹងការមិនទូទាត់ប្រាក់នោះទេ»។
គិតត្រឹមថ្ងៃអង្គារម្សិលមិញមានរោងចក្រចំនួន ១៨០ ហើយបានព្យួរប្រតិបត្តិការហើយរោងចក្រចំនួន ៦០ បន្ថែមទៀតនឹងឈានទៅរកការព្យួរការងារផងដែរ ដែលបានប៉ះពាល់ដល់កម្មករជាង ១៥ ម៉ឺននាក់ ខណៈភាពមិនច្បាស់លាស់នៃការបន្តព្យួរការងារនេះនឹងធ្វើឲ្យប៉ះពាល់ដល់កម្មករជិត ២០ ម៉ឺននាក់បន្ថែមទៀតក្នុងពេលឆាប់ៗនេះ។ នេះបើតាម GMAC ដែលអះអាងថា មិនត្រឹមតែប៉ះពាល់ដល់កម្មករនោះទេ សូម្បីតែគ្រួសាររបស់កម្មករប្រមាណ ២ លាននាក់ដែលពឹងផ្អែកលើពួកគេក៏នឹងរងផលប៉ះពាល់ផងដែរ។
GMAC បន្ថែមថា៖ «ខណៈផលិតផលកំពុងត្រូវបានធ្វើការនាំចេញ រោងចក្រត្រូវតែទទួលបានការទូទាត់នូវអ្វីដែលត្រូវបានជំពាក់ ហើយការផ្តល់អ្វីតិចជាងនេះ គឺមិនត្រឹមត្រូវនោះទេ។ លក្ខខណ្ឌទូទាត់ប្រាក់អាចពិភាក្សាបាន ប៉ុន្តែការមិនទូទាត់ គឺមិនអាចទទួលយកបានទេ។ ហេតុដូច្នេះយើងសូមអំពាវនាវដល់អ្នកបញ្ជាទិញទាំងអស់គ្នាទូទាត់បំណុលរបស់ខ្លួន»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានបដិសេធធ្វើអត្ថាធិប្បាយដោយបង្វែរសំណួរទៅកាន់ GMAC។ លោកថ្លែងថា៖ «GMAC អ្នកនិយាយទាល់តែសួរ GMAC បានដឹងថាយ៉ាងម៉េច»។
លោក ខេន លូ អគ្គលេខាធិការ GMAC មិនអាចទាក់ទងសុំការអត្ថាធិប្បាយបានទេកាលពីម្សិលមិញដោយសារទូរស័ព្ទរបស់លោកមិនមានអ្នកទទួល។
លោក អាត់ ធន់ ប្រធានសហភាពការងារកម្ពុជាបានថ្លែងពីម្សិលមិញថា វិស័យកាត់ដេរអាចនឹងប្រឈមវិបត្តិធ្ងន់ធ្ងរស្របពេលដែលគ្មានការបញ្ជាទិញ ហើយរោងចក្រត្រូវបន្តទូទាត់ប្រាក់ដល់កម្មករជារៀងរាល់ខែ។ លោកបន្តថា បញ្ហានេះក៏នឹងជះឥទ្ធិពលអាក្រក់ទៅដល់កម្មករផងដែរ ដែលទាមទារឲ្យមាននូវដំណោះស្រាយមួយដ៏សមស្រប។
លោកបញ្ជាក់ថា៖ «បើមានវិធានការជួយនោះមិនមែនជួយតែរោងចក្រទេ ក៏ជួយកម្មករផងដែរ ព្រោះថាបើមិនបាន ៧០ ភាគរយយ៉ាងហោចណាស់កម្មករក៏ទទួលបាន ៧០ ដុល្លារហ្នឹង ត្រូវតែបើកឲ្យកម្មករទាំងអស់។ ចំពោះក្រុមហ៊ុន មិនគួរឲ្យបិទទេ យ៉ាងហោចណាស់ព្យួរការងារសិនគឺល្អ ព្រោះបើបញ្ហា (កូវីដ) មិនបញ្ចប់គឺគាត់អាចមានប្រាក់ទាំងនេះ»។
លោកបន្ថែមថា៖ «ចំពោះកាតព្វកិច្ចមួយចំនួនរដ្ឋាភិបាលត្រូវលើកលែងដែរ ដល់រោងចក្រព្រោះវាអាចជួយដល់កម្មករ។ នេះជាការពិតរោងចក្រមិនមែនដូចកម្មករនោះទេ និយោជកគាត់មានប្រាក់ចំណេញនៅពេលមានបញ្ហា គ្រាន់តែមិនមានការបញ្ជាទិញ ប៉ុន្តែកម្មករអត់មានការងារធ្វើ អត់មានប្រាក់ខែដែរ ហើយគាត់អាចមានបញ្ហាដល់អាយុជីវិត»។
បើតាមលោក អាត់ ធន់ មកដល់ពេលនេះលោកនៅមិនទាន់ដឹងថា រោងចក្រទាំង ១៨០ ដែលព្យួរការងារកម្មករបានអនុវត្តបានត្រឹមត្រូវតាមគោលការណ៍របស់ក្រសួងការងារក្នុងដំណាក់កាលទី ២ នៃការផ្តល់ប្រាក់ឧបត្ថម្ភ ៣០ ដុល្លារដល់កម្មករយ៉ាងណានោះទេ ខណៈការអនុវត្តរបស់រោងចក្រក្នុងដំណាក់កាលទី ១ កន្លងទៅក្នុងការផ្តល់ប្រាក់ឧបត្ថម្ភ ៤០ ភាគរយនៃ ៧០ ភាគរយ គឺអនុវត្តបានត្រឹមត្រូវ។
លោកបានបញ្ជាក់ថា៖ «ក្នុងដំណាក់កាលទី ២ នេះគឺឲ្យក្រុមហ៊ុនចេញតែ ៣០ ដុល្លារទេ ព្រោះក្នុងវិស័យកាត់ដេរ កម្មករនឹងបើកប្រាក់ខែនៅក្នុងអំឡុងសប្តាហ៍នេះ ដែលយើងមិនទាន់ដឹងថា កម្មករបានបើកប្រាក់ឧបត្ថម្ភទាំងនេះហើយឬនៅ? ហើយរោងចក្រអាចបន្តបើកជូនកម្មករដល់ពេលណា វាអាស្រ័យទៅលើជំងឺកូវីដចប់ពេលណា? បើសិនជាចប់លឿន យើងអាចស្តារឡើងវិញបាន សំខាន់លើអ្នកទិញ បើអ្នកទិញ មិនទិញ តើយើងទៅលក់ឲ្យអ្នកណា?»៕