.jpg)
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជានាពេលកន្លងមក។ ហេង ជីវ័ន
ភ្នំពេញៈ សមាគមរោងចក្រកាត់ដេរនៅកម្ពុជាហៅកាត់ថា GMAC ស្នើឲ្យក្រសួងការងារ និងបណ្តុះបណ្តាលវិជ្ជាជីវៈពន្យារពេលការចរចាប្រាក់ឈ្នួលអប្បបរមាផ្នែកវាយនភណ្ឌកាត់ដេរ និងផលិតស្បែកជើងសម្រាប់ឆ្នាំ ២០២១ ដោយត្រូវយកប្រាក់ឈ្នួលចាស់ដដែលដោយសំអាងថា វិស័យនេះកំពុងរងផលប៉ះពាល់ខ្លាំង និងស្ថិតក្នុងភាពផុយស្រួយ ខណៈដែលមានការរាតត្បាតនៃជំងឺកូវីដ១៩។
GMAC បានលើកឡើងនៅក្នុងសេចក្តីថ្លែងការណ៍ចុះថ្ងៃទី ២៣ ខែមិថុនា ថា ស្ថិតក្នុងកាលៈទេសៈនេះ វិស័យវាយនភណ្ឌកាត់ដេរ និងផលិតស្បែកជើង កំពុងមានភាពផុយស្រួយ និងមានភាពមិនច្បាស់លាស់ក្នុងការវិលត្រឡប់មករកសភាពដើមវិញ ក៏ដូចជាការធ្វើឲ្យប្រសើរឡើងវិញនឹងត្រូវចំណាយពេលយូរ។
GMAC ថា ក្នុងពេលបច្ចុប្បន្នដែលមានការរាតត្បាតនៃជំងឺកូវីដ១៩ មានរោងចក្រយ៉ាងច្រើននៅក្នុងវិស័យកាត់ដេរសម្លៀកបំពាក់ និងស្បែកជើង បាននិងកំពុងព្យួរការងារកម្មករ និងមានរោងចក្រមួយចំនួនកំពុងបិទទ្វារ ដូច្នេះយន្តការគាំទ្រនានាគឺជាវិធានការចាំបាច់ ដើម្បីជួយរក្សាលំនឹងនៃវិស័យនេះ។
GMAC បញ្ជាក់ថា៖ «GMAC បានយល់ឃើញថាការចរចាប្រាក់ឈ្នួលអប្បបរមាថ្មីសម្រាប់ឆ្នាំ ២០២១ ខាងមុខគួរត្រូវបានពន្យារពេល។ ប្រាក់ឈ្នួលអប្បបរមាក្នុងឆ្នាំ ២០២០ គួរបន្តសុពលភាពអនុវត្តរហូតដល់វិស័យនេះអាចត្រឡប់ទៅរកសភាពដើមវិញ»។
GMAC សង្ឃឹមយ៉ាងមុតមាំថា ការចរចាប្រាក់ឈ្នួលអប្បបរមាថ្មីសម្រាប់ឆ្នាំ ២០២១ នឹងត្រូវផ្អាកជាបណ្តោះអាសន្នរហូតស្ថានការណ៍នៃវិស័យនេះមានភាពប្រក្រតីឡើងវិញ។ ការបង្អង់ការចរចាប្រាក់ឈ្នួលអប្បបរមានឹងជាយន្តការមួយក្នុងការគាំទ្រឲ្យវិស័យនេះឲ្យនៅបន្តមានជីវិតរស់នៅ ក៏ដូចជាការរក្សាការងារ សម្រាប់បងប្អូនកម្មករនិយោជិតយ៉ាងដូច្នេះដែរ។
កាលពីថ្ងៃទី ១០ ខែ មិថុនា ឆ្នាំ ២០២០ ក្រសួងការងារបានចេញសេចក្តីជូនដំណឹងមួយស្តីពីកាលវិភាគនៃការចរចាប្រាក់ឈ្នួលអប្បបរមាផ្នែកវាយនភណ្ឌកាត់ដេរ និងផលិតស្បែកជើងសម្រាប់ឆ្នាំ ២០២១ ដែលគ្រោងនឹងចាប់ផ្តើមពីខែកក្កដា ដល់ខែកញ្ញា។
លោក ហេង សួរ អ្នកនាំពាក្យក្រសួងការងារបានប្រាប់ភ្នំពេញប៉ុស្តិ៍កាលពីថ្ងៃអង្គារថា បុគ្គលគ្រប់រូបមានសិទ្ធិក្នុងការសម្តែងមតិ ប៉ុន្តែគ្រប់គ្នាត្រូវអនុវត្តតាមយន្តការដែលមានចែងក្នុងច្បាប់។ លោកបន្តថា ការចរចាប្រាក់ឈ្នួលសម្រាប់ឆ្នាំថ្មីនៅតែបន្តធ្វើទៅតាមនីតិវិធីច្បាប់ ដោយគ្មានការពន្យារពេលនោះឡើយ។
លោកបញ្ជាក់ថា៖ «ច្បាប់តម្រូវឱ្យមានការជួបប្រជុំគ្នា ដូច្នេះយើងត្រូវតែជួបប្រជុំគ្នា។ ច្បាប់មិនបាននិយាយថា ប្រាក់ឈ្នួលត្រូវតែឡើងជារៀងរាល់ឆ្នាំនោះទេគឺអាចឡើងអាចរក្សាដដែល ឬអាចថយ អាស្រ័យលើបម្រែបម្រួលនៃលក្ខណៈវិនិច្ឆ័យទាំង ៧ នៃការកំណត់ប្រាក់ឈ្នួលអប្បបរមា»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជាបានប្រាប់ភ្នំពេញ-ប៉ុស្តិ៍កាលពីថ្ងៃទី ២៣ មិថុនាថា ក្នុងដំណាក់កាលនេះការចរចាដំឡើងប្រាក់ឈ្នួលសម្រាប់ឆ្នាំ ២០២១ គឺប្រាកដណាស់នឹងស្ថិតក្នុងភាពតានតឹងជាងពេលណាៗទាំងអស់។ ប៉ុន្តែលោកថ្លែងថា GMAC គួរចូលតុចរចាព្រោះស្ថិតក្នុងកាលៈទេសៈនេះ គ្រប់ភាគីទាំងអស់សុទ្ធតែទទួលរងផលប៉ះពាល់។
លោកបញ្ជាក់ថា៖ «បើទោះបីយើងពិបាកយ៉ាងណាក៏ដោយ ក៏ភាគីទាំងអស់ត្រូវមានភាពស្មោះត្រង់បង្ហាញពីផលប៉ះពាល់រវាងគ្នាទៅវិញទៅមកដែលជាការពិនិត្យមើលទៅរកលទ្ធភាពជុំវិញការជជែកគ្នា បើទោះបីយើងដឹងថា កំពុងរងផលប៉ះពាល់។ ដូច្នេះគួរចូលតុជជែកគ្នាទៅ ថាតើលទ្ធភាពរបៀបម៉េច មិនមានលទ្ធភាពរបៀបម៉េច ដោយអាចជជែកគ្នាដោយភាពស្មោះត្រង់»។
លោក ស៊ីណា បារម្ភថា ក្នុងពេលខាងមុខ កម្មករនិយោជិតនឹងរឹតតែរងគ្រោះបន្ថែមទៀត បើសិនជាប្រាក់ឈ្នួលអប្បបរមាសម្រាប់ឆ្នាំថ្មីមិនត្រូវបានដំឡើង ហើយប្រាក់អត្ថប្រយោជន៍ផ្សេងៗក៏ត្រូវបានកាត់។ លោកស្នើឲ្យក្រសួងការងារ គួរពិចារណាផ្តល់ប្រាក់អត្ថប្រយោជន៍ផ្សេងៗដូចដើមវិញដល់កម្មករដើម្បីពួកគាត់អាចគេចផុតពីការលំបាកផ្នែកជីវភាព និងបំណុល។
ចាប់តាំងពីឆ្នាំ ២០១៤ មករាជរដ្ឋាភិបាលកម្ពុជាបានដាក់ចេញនូវគោលនយោបាយដំឡើងប្រាក់ឈ្នួលអប្បបរមាដល់កម្មករនិយោជិតក្នុងវិស័យវាយនភណ្ឌ កាត់ដេរ និងផលិតស្បែកជើងជារៀងរាល់ឆ្នាំ ហើយនៅក្នុងឆ្នាំ ២០២០ នេះ ប្រាក់ឈ្នួលអប្បបរមារបស់កម្មករបានឡើងដល់ ១៩០ ដុល្លារក្នុង ១ ខែ៕
