ភ្នំពេញៈ អង្គការ HALO Trust Cambodia បានជ្រើសរើសបុគ្គលិកដោះមីនបន្ថែមចំនួន ១២០ នាក់នៅក្នុងសហគមន៍ទីតាំងផ្ទៃដីដែលមានមីននៅតាមបណ្ដាខេត្ដភាគខាងជើង និងខាងលិចដើម្បីពង្រីកវិសាលភាពបោសសម្អាតមីន ខណៈតាំងពីឆ្នាំ ១៩៩១ រហូតដល់បច្ចុប្បន្ន អង្គការនេះកម្ទេចមីនបាន ៣០ ម៉ឺនគ្រាប់។
លោក Lasha Lomidze នាយកប្រចាំប្រទេសនៃអង្គការ HALO Trust Cambodia បានប្រាប់ភ្នំពេញប៉ុស្ដិ៍ថា មីនត្រូវបានដាក់ពង្រាយជាច្រើននៅអំឡុងសង្គ្រាមស៊ីវិលនៅកម្ពុជាកាលពី ២០ ឆ្នាំមុន។ លោកថ្លែងថា HALO Trust កាលពីសប្ដាហ៍មុនបានពង្រីកសកម្មភាពការងាររបស់ខ្លួនដោយបានជ្រើសរើសបុគ្គលិកបោសសម្អាតមីនថ្មីបន្ថែមចំនួន ១២០ នាក់។ បូករួមទាំងចំនួនបុគ្គលិកបោសសម្អាតមីនថ្មីបន្ថែមនេះ HALO Trust មានបុគ្គលិកសរុប ១១៥០ នាក់ហើយដែលកំពុងធ្វើការងារនៅកម្ពុជា។
លោកថា៖ «ការជ្រើសរើសបុគ្គលិកបន្ថែមនេះ គឺធ្វើឡើងស្របតាមសមិទ្ធផលដែលអង្គការសម្រេចបានក្នុងនោះមានការកម្ទេចគ្រាប់មីនបានដល់ ៣០ ម៉ឺនគ្រាប់ផងដែរ»។
បើតាមលោក Lasha Lomidze បុគ្គលិកថ្មីនេះនឹងចាប់ផ្ដើមការបណ្ដុះបណ្ដាលរយៈពេល ៣ សប្ដាហ៍ដោយចាប់ផ្ដើមពីថ្ងៃទី ៤ ខែឧសភា។ តាមរយៈវគ្គបណ្ដុះបណ្ដាលនេះនឹងផ្ដល់ឲ្យបុគ្គលិកបោសសម្អាតមីនថ្មីនូវចំណេះដឹង និងជំនាញដោយមានសុវត្ថិភាព និងប្រសិទ្ធភាពក្នុងការបោសសម្អាតមីននៅតំបន់ដែលអង្គការកំពុងប្រតិបត្ដិការ។ វគ្គបណ្ដុះបណ្ដាលនេះនឹងបញ្ចប់នៅចុងខែឧសភាហើយពួកគេនឹងចូលរួមក្នុងសកម្មភាពដោះមីនជាមួយក្រុមការងាររបស់អង្គការដែលមានស្រាប់នៅតាមតំបន់នានាក្នុងខេត្ដនៅភាគខាងជើង និងខាងលិច។ HALO Trust បានទទួលមូលនិធិសប្បុរសពីចក្រភពអង់គ្លេស សហរដ្ឋអាមេរិក អៀរឡង់ អាល្លឺម៉ង់ និងស្វ៊ីស។
លោក Lasha Lomidze បន្ថែមថាចាប់តាំងពីឆ្នាំ ១៩៩១ HALO Trust បានបោសសម្អាតមីនលើផ្ទៃដីចំនួន ៤៣៩៤ កន្លែងដោយរំដោះផ្ទៃដីបានចំនួន ៣៣៩ គីឡូម៉ែត្រការ៉េ។ ផ្ទៃដីប្រហែល ៧០ ភាគរយនៃចម្ការមីនដែលអង្គការនេះបានបោសសម្អាតមីនចេញគឺត្រូវបានប្រគល់ទៅឲ្យប្រជាពលរដ្ឋប្រើប្រាស់វិញសម្រាប់ធ្វើការដាំដុះ ដំណាំដំឡូងមី ស្វាយចន្ទី និងស្រូវ។
ក្រៅពីបោសសម្អាតមីន HALO Trust ក៏បានដាក់ពង្រាយក្រុមការងារក្នុងការឆ្លើយតបចំពោះតម្រូវការរបស់ប្រជាសហគមន៍ផងដែរ នៅពេលដែលពួកគាត់បានឃើញគ្រាប់យុទ្ធភណ្ឌមិនទាន់ផ្ទុះ។ រហូតមកដល់បច្ចុប្បន្ន HALO Trust បានឆ្លើយតបទៅនឹងការអំពាវនាវរបស់សហគមន៍បាន ២៦ ៤៤៣ ករណី និងកម្ទេចបាន ៦៣ ០០០ គ្រាប់មីន និងសំណល់ជាតិផ្ទុះបានចំនួន ១៦៣ ០០០ គ្រាប់ជាប្រភេទគ្រាប់រ៉ុក្កែត និងគ្រាប់បែកដៃ។
លោកបន្ដថា៖ «យុទ្ធភណ្ឌមិនទាន់ផ្ទុះប្រភេទនេះនៅតែបណ្ដាលឲ្យចំនួនគ្រោះថ្នាក់កើតឡើងស្ថិតនៅកម្រិតខ្ពស់នៅឡើយជារៀងរាល់ឆ្នាំ។ វាពិតជាមានសារៈសំខាន់ណាស់ នៅពេលដែលប្រជាជនបានឃើញយុទ្ធភណ្ឌមិនទាន់ផ្ទុះ ហើយរាយការណ៍ទៅកាន់សមត្ថកិច្ចជំនាញ ឬក៏អង្គការ ដូចជា HALO Trust Cambodia ជាដើម»។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការអាជ្ញាធរមីនកម្ពុជាថ្លែងពីថ្ងៃទី ៤ មេសាថា សកម្មភាពបោសសម្អាតគ្រាប់មីន និងគ្រាប់យុទ្ធភណ្ឌមិនទាន់ផ្ទុះកំពុងជួបបញ្ហាប្រឈមដោយកង្វះថវិកា និងធនធានមនុស្ស បើទោះបីជាអាមេរិកទើបតែផ្ដល់ថវិកាឲ្យមជ្ឈមណ្ឌលសកម្មភាពកំចាត់មីនកម្ពុជា (CMAC) ចំនួន ២ លានដុល្លារ សម្រាប់បម្រើក្នុងវិស័យនេះក៏ដោយ។ លោកថ្លែងថា សកម្មភាពបោសសម្អាតមីន និងគ្រាប់មិនទាន់ផ្ទុះត្រូវបានរដ្ឋាភិបាលដាក់ចេញនូវផែនការច្បាស់លាស់រួចរាល់អស់ហើយប៉ុន្ដែនៅមានបញ្ហាប្រឈមមួយចំនួនដូចជា កង្វះថវិកា និងបញ្ហាធនធានមនុស្ស ព្រោះធនធានមនុស្សដែលប្រើប្រាស់សព្វថ្ងៃនេះមន្ត្រីអ្នកដោះមីនមានចំនួន ២ ៥០០ នាក់ក្នុងនោះមួយចំនួនធំមានវ័យកាន់តែចាស់ និងខ្លះមានជំងឺប្រចាំកាយដែលមិនអាចបន្តការងារនេះបានទេ៕