ភ្នំពេញៈ អង្គការឃ្លាំមើលសិទ្ធិមនុស្ស (HRW) បានថ្លែងថា ឆ្នាំ ២០១៤ គឺជាឆ្នាំមួយក្នុងចំណោមឆ្នាំអាក្រក់បំផុតរបស់កម្ពុជាដោយសារតែប្រវត្តិថ្មីៗ នៃការរំលោភបំពានសិទ្ធិមនុស្ស ដោយលើកឡើងអំពី «ការសម្លាប់ដោយកម្លាំងសន្តិសុខ ការចាប់ខ្លួនសកម្មជន និងអ្នកនយោបាយគណបក្សប្រឆាំង ការកាត់ទោសតក់ក្រហល់ និងការបង្ក្រាបទៅលើការតវ៉ាដោយសន្តិវិធី»។
របាយការណ៍ពិភពលោកឆ្នាំ ២០១៥ របស់ខ្លួនស្តីពីកម្ពុជាបានលើកឡើងអំពីការប្រើប្រាស់ប្រព័ន្ធតុលាការដោយរដ្ឋាភិបាលដើម្បីបំបិទសំឡេងសកម្មជន អ្នករិះគន់ សហជីពនិងអ្នកនយោបាយប្រឆាំង។
HRW បានថ្លែងថា៖ «នគរបាល ព្រះរាជអាជ្ញា និងតុលាការ បានកាត់ទោសយ៉ាងហោចករណីជំរុញដោយហេតុផលនយោបាយចំនួន ៩០ ករណីកាលពីឆ្នាំមុន ដោយកាត់ទោសយ៉ាងហោចណាស់មនុស្ស ៤៤ នាក់ដាក់ពន្ធនាគារ បន្ទាប់ពីសវនាការអយុត្តិធម៌តាមរយៈភ័ស្តុតាងដែលមិនអាចជឿជាក់បាន»។ «កម្លាំងសន្តិសុខបន្តទទួលបាននិទ្ទណ្ឌភាពទាំងស្រុងចំពោះការរំលោភបំពានសិទ្ធិមនុស្សទាំង អតីតកាលនិង បច្ចុប្បន្ន»។
រដ្ឋាភិបាលបានបដិសេធថា ខ្លួនមិនបានប្រើតុលាការក្នុងការគាបសង្កត់នយោបាយទេ។
លោក Brad Adams នាយកប្រចាំអាស៊ីរបស់អង្គការ HRW កាលថ្មីៗនេះត្រូវបានរិះគន់ដោយលោកនាយករដ្ឋមន្រ្តី ហ៊ុន សែន ដោយចោទប្រកាន់ថា មិនមានតុល្យភាព។
លោកហ៊ុន សែន បានថ្លែងក្នុងខែនេះថា៖ «ពិតណាស់ ខ្ញុំមានកំហុស... ប៉ុន្តែត្រូវឲ្យមានតុល្យភាព ចំពោះអ្វីដែលធ្វើខុសនិងអ្វីដែលធ្វើត្រូវ... អ្នកត្រូវតែនិយាយឲ្យសមស្របជាងនេះបន្តិច មិនត្រូវនិយាយថា អ្វីៗគឺអាក្រក់ទាំងអស់ ដូចលោក Brad Adams អង្គការឃ្លាំមើលសិទ្ធិមនុស្សទេ»។
លោកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជា បានយល់ស្របថា ស្ថានភាពសិទ្ធិមនុស្ស «បានធ្លាក់ដុនដាបគួរឲ្យកត់សម្គាល់» កាលពីឆ្នាំមុន។ ប៉ុន្តែលោកស្រីក៏បានលើកឡើងផងដែរអំពីភាពរីកចម្រើនដូចជាកម្រិតមិនធ្លាប់មានពីមុនមកនៃការតវ៉ាជាសាធារណៈទាមទារឲ្យមានការផ្លាស់ប្តូរ និងកិច្ចសន្យានយោបាយដែលទើបបង្កើតថ្មីរវាងគណបក្សកាន់អំណាចនិងគណបក្សប្រឆាំង។
លោក ម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សរបស់រដ្ឋាភិបាល បានថ្លែងថា វាមិនយុត្តិធម៌ទេដែល HRW និយាយថា ឆ្នាំមុនជាឆ្នាំមួយក្នុងចំណោមឆ្នាំអាក្រក់បំផុតនៃការរំលោភបំពានសិទ្ធិមនុស្ស។
ដោយសំដៅទៅលើការបង្ក្រាបទៅលើការតវ៉ារបស់កម្មករកាត់ដេរកាលខែមករា ដែលអាជ្ញាធរបានសម្លាប់មនុស្សយ៉ាងហោចណាស់ ៥ នាក់ លោក សម្បត្តិ ថ្លែងថា រដ្ឋាភិបាលអនុវត្តច្បាប់និងបទបញ្ជា។
លោកសម្បត្តិ បានបញ្ជាក់ថា៖ «ដូចអ្នកបានឃើញហើយ ក្នុងអំឡុងបាតុកម្មទាំងនោះ គ្លីនិកមួយ ត្រូវបានបំផ្លាញទាំងស្រុង... ហើយផ្លូវមួយចំនួន ត្រូវបានបិទដោយក្រុមអ្នកតវ៉ាដែលបានប៉ះពាល់ដល់សិទ្ធិអ្នកដទៃ ដែលមិនអាចទៅដល់មន្ទីរពេទ្យ ឬសាលារៀនទាន់ពេលវេលា»។
លោកបានគូសបញ្ជាក់ទៀតថា៖ «ហេតុដូច្នេះ រដ្ឋាភិបាលត្រូវតែអនុវត្តច្បាប់ដើម្បីធានាស្ថិរភាពនិងសណ្តាប់ធ្នាប់សាធារណៈ។ រដ្ឋាភិបាលត្រូវតែគិតពីប្រជាជនទាំងអស់ក្នុងប្រទេសមិនមែនគ្រាន់តែគិតពីសិទ្ធិរបស់បុគ្គលដូចអង្គការឃ្លាំមើលសិទ្ធិមនុស្សទេ»។
យ៉ាងណាក៏ដោយមកដល់ពេលនេះគេមិនឃើញកងកម្លាំងរដ្ឋាភិបាលណាម្នាក់ត្រូវបាននាំយកមកផ្តន្ទាទោសពីបទប្រើកម្លាំងបង្ក្រាបទៅលើកម្មករបណ្តាលឲ្យស្លាប់ ៥ នាក់នោះទេ៕PS
