ភ្នំពេញៈ ក្រុមហ៊ុនអង្ករអាយប៊ិស រ៉ាយស៍ (IBIS Rice) បានចុះហត្ថលេខាលើកិច្ចព្រមព្រៀងហិរញ្ញប្បទានជាមួយធនាគារភ្នំពេញពាណិជ្ជ (PPCBank) ដើម្បីគាំទ្រកសិករខ្នាតតូចចំនួន ១ ៥០០ គ្រួសារ ឱ្យដាំស្រូវផ្កាម្លិះសរីរាង្គ ដែលជាការជួយរកចំណូលដល់កសិករឱ្យបានខ្ពស់ និងជួយអភិរក្សប្រភេទសត្វព្រៃដែលជិតផុតពូជនៅក្នុងប្រទេសកម្ពុជា។
លោក Nick Spencer នាយកប្រតិបត្តិក្រុមហ៊ុន IBIS Rice ថ្លែងពីថ្ងៃទី ១៦ ធ្នូ ថា ក្រុមហ៊ុនលោកបានចុះកិច្ចព្រមព្រៀងហិរញ្ញប្បទានជាមួយធនាគារ PPCBank រួចរាល់ហើយ។ ប៉ុន្ដែលោកបដិសេធបង្ហាញទំហំទឹកប្រាក់ ដើម្បីជួយគាំទ្រដល់កសិករខ្នាតតូចចំនួន ១ ៥០០ គ្រួសារ ស្ថិតនៅដែនជម្រកសត្វព្រៃចំនួន ៧ តំបន់នៅខេត្តស្ទឹងត្រែង និងមណ្ឌលគិរី។
លោកថា ក្រុមហ៊ុន IBIS Rice បានធ្វើការជាមួយកសិករដោយឱ្យកម្រៃពលកម្មខ្ពស់ជាងតម្លៃទីផ្សារ ៥០ ភាគរយ សម្រាប់ទិញអង្ករផ្កាម្លិះសរីរាង្គ។ ក្នុងគម្រោងនេះកសិករត្រូវតែប្តេជ្ញាចិត្តមិនកាប់ឈើ បរបាញ់សត្វ ឬការប្រើប្រាស់សារធាតុគីមីដើម្បីជួយការពារព្រៃឈើ និងសត្វព្រៃ។ IBIS Rice ត្រូវបានបង្កើតឡើងដោយអង្គការសមាគម អភិរក្សសត្វព្រៃ (WCS) ហើយ ឈ្មោះនេះត្រូវបានដាក់ភ្ជាប់នឹងឈ្មោះសត្វត្រយងយក្ស (Giant Ibis) ព្រោះវាជាបក្សីជាតិរបស់ប្រទេសកម្ពុជា។
លោកបញ្ជាក់ថា៖ «យើងបានជ្រើសរើស និងបណ្តុះបណ្តាលកសិករកាន់តែច្រើន ដូច្នេះតម្រូវការហិរញ្ញប្បទានមូលធនក៏ត្រូវបន្ថែមសម្រាប់ទិញស្រូវពីកសិករកាន់តែច្រើនដែរ។ យើងប្តេជ្ញាចិត្តចំពោះកសិកររបស់យើងដោយទិញស្រូវទាំងអស់ដែលពួកគេអាចផលិតបាន ប៉ុន្ដែស្រូវពួកគាត់ត្រូវឆ្លើយតបនឹងស្តង់ដាអនុលោមភាពរបស់យើង»។
បើតាមលោក Nick Spencer ស្រូវនេះត្រូវបានបញ្ជាក់ថា ជាប្រភេទស្រូវសរីរាង្គមានស្តង់ដា EU និង USDA ដើម្បីទទួលបានការអនុញ្ញាតឱ្យចូលលក់ជាសកលក្នុងទីផ្សារលំដាប់ខ្ពស់នៅអឺរ៉ុប និងកាណាដា។ គម្រោងនេះបានធ្វើឱ្យជីវភាពរស់នៅរបស់ប្រជាជនកម្ពុជាប្រសើរឡើង ហើយក៏ជួយកាត់បន្ថយការកាប់បំផ្លាញព្រៃឈើ ៧៥ ភាគរយ នៅក្នុងតំបន់ដែលកសិកររស់នៅ និងកំពុងដាំដុះដែរ។
លោក ញ៉ាក់ គឹមស្រូយ អនុប្រធានធនាគារ (PPCBank) ថ្លែងក្នុងសេចក្ដីប្រកាសព័ត៌មានពីថ្ងៃទី ១៦ ធ្នូ ដោយសាទរ ចំពោះអត្ថប្រយោជន៍នៃគម្រោងរបស់ក្រុមហ៊ុន IBIS Rice ដែលបានផ្តល់ជូនកសិករខ្នាតតូចនៅតាមតំបន់ដែនជម្រកសត្វព្រៃនៅកម្ពុជា។ នេះជាអ្វីដែលធ្វើឱ្យធនាគារលោកចាប់អារម្មណ៍ខ្លាំង ព្រោះវាជាឱកាសអាជីវកម្មដ៏ល្អមួយក្នុងការផ្តល់ហិរញ្ញប្បទាន។
លោកថ្លែងថា៖ «យើងមើលឃើញពីសក្ដានុពលដែលក្រុមហ៊ុនទទួលបានពីសំណាក់ភ្ញៀវជាតិ និងអន្តរជាតិ IBIS Rice ដែលធ្វើឱ្យយើងមានទំនុកចិត្តលើសំណើនេះ។ កិច្ចព្រមព្រៀងនេះបង្ហាញពីការចាប់ផ្តើមនៃភាពជាដៃគូដ៏យូរអង្វែង ហើយយើងទន្ទឹងរង់ចាំមើលការរីកចម្រើនរបស់ក្រុមហ៊ុន»។
លោក Robb Menzi នាយកប្រតិបតិ្តអង្គការសមាគមអភិរក្សសត្វព្រៃ (WCS) និងជាប្រធានក្រុមហ៊ុនអង្ករ អាយប៊ិស រ៉ាយស៍ ថ្លែងក្នុងសេចក្ដីប្រកាសព័ត៌មាន នៅថ្ងៃទី ១៦ ធ្នូ ថា ដោយការគាំទ្ររបស់រាជរដ្ឋាភិបាលកម្ពុជានៅឆ្នាំ ២០០៩ អង្គការ WCS បានបង្កើតគម្រោងនេះសម្រាប់ជាវិធីក្នុងការអភិរក្សសត្វព្រៃត្រយងយក្ស និងសត្វព្រៃដទៃទៀត។
គោលបំណងសំខាន់ គឺលើកទឹកចិត្តសហគមន៍មូលដ្ឋានឱ្យចូលរួមក្នុងការអភិរក្ស តាមរយៈការទិញស្រូវផ្កាម្លិះសរីរាង្គក្នុងតម្លៃខ្ពស់ពីកសិករដែលប្តេជ្ញាការពារព្រៃ និងបញ្ឈប់ការបរបាញ់សត្វព្រៃ។ គម្រោងនេះបានធ្វើឱ្យប្រសើរឡើងជីវភាពអ្នករស់នៅក្នុងតំបន់ក៏ដូចជា ដោះស្រាយការគំរាមកំហែងចម្បងលើសត្វត្រយងយក្សដែលជិតផុតពូជ។
លោកបញ្ជាក់ថា៖ «យើងគាំទ្រអង្កររបស់ក្រុមហ៊ុន IBIS Rice តាមរយៈគំនិតផ្តួចផ្តើមធ្វើជាគំរូដល់សហគ្រាសដទៃដែលអាចបង្កើតផលិតផលល្អសម្រាប់អ្នកប្រើប្រាស់ ផ្តល់ការអភិរក្សពិតប្រាកដ និងលទ្ធផលនៃសុខុមាលភាពរបស់មនុស្ស»។
សេចក្ដីប្រកាសព័ត៌មានរបស់ប្រធានទីភ្នាក់ងារ USAID Green Invest Asia គឺលោក Christy Owen ក៏បានលើកឡើងនាថ្ងៃនោះដែរ ថា ភាពជាដៃគូរបស់ IBIS Rice ជាមួយ PPCBank គឺជាឧទាហរណ៍ដ៏ល្អមួយដែលទីភ្នាក់ងារ USAID Green Invest Asia បាននិងកំពុងធ្វើដោយផ្សារភ្ជាប់ហិរញ្ញប្បទានពីធនាគារពាណិជ្ជកម្ម ដើម្បីចូលរួមការកាត់បន្ថយកាបូន និងផលប៉ះពាល់សង្គម។
លោកថា៖ «យើងសូមអបអរសាទរដល់ភាគីទាំង ២ ចំពោះភាពជាដៃគូដ៏មានអត្ថន័យនេះ ដែលនឹងផ្តល់អត្ថប្រយោជន៍ដល់ចង្វាក់ផលិតផលផ្គត់ផ្គង់ទាំងមូល ក៏ដូចជាការថែទាំសត្វកម្រនៅក្នុងប្រទេសកម្ពុជាដែរ»៕