The Phnom Penh Post Search

Search form




Logo of Phnom Penh Post newspaper Phnom Penh Post - ICC-Angkor ប្រជុំ​ពិភាក្សា​ពី​ការ​ជួសជុល​ និង​អភិរក្ស​ប្រាសាទ

ICC-Angkor ប្រជុំ​ពិភាក្សា​ពី​ការ​ជួសជុល​ និង​អភិរក្ស​ប្រាសាទ

ភ្ញៀវ​ទេសចរ​កំពុង​គយគន់​ប្រាសាទ​បាយ័ន​ក្នុង​ខេត្ត​សៀមរាប​នា​ពេល​កន្លង​មក​។
ភ្ញៀវ​ទេសចរ​កំពុង​គយគន់​ប្រាសាទ​បាយ័ន​ក្នុង​ខេត្ត​សៀមរាប​នា​ពេល​កន្លង​មក​។ ហុង មិនា

ICC-Angkor ប្រជុំ​ពិភាក្សា​ពី​ការ​ជួសជុល​ និង​អភិរក្ស​ប្រាសាទ

សៀមរាបៈ គណៈកម្មាធិការ​អន្តរជាតិ​ដើម្បី​សម្រប​សម្រួល​កិច្ចគាំពារ​ និង​អភិវឌ្ឍន៍​តំបន់​រមណីយដ្ឋាន​ប្រវត្តិសាស្ត្រ​អង្គរ​ហៅ​កាត់​ថា​អាយស៊ីស៊ី អង្គរ (ICC-Angkor) បាន​បើក​កិច្ចប្រជុំ​បចេ្ចកទេស​លើក​ទី ២៦ របស់​ខ្លួន​ដោយ​ផ្តោត​ទៅ​លើ​ការ​ជួសជុល​ និង​អភិរក្ស​ប្រាសាទ​ និង​ទីកន្លែង​ប្រវត្តិសាស្ត្រ​ជាច្រើន។

កិច្ចប្រជុំ​នេះ​ត្រូវ​ធ្វើ​ឡើង​រយៈពេល​ ២ ​ថ្ងៃ​ដោយ​ចាប់ផ្តើម​កាលពី​ម្សិលមិញ​នៅ​មជ្ឈមណ្ឌល​អាជ្ញាធរ​ជាតិ​អប្សរា​ក្នុង​គោល​បំណង​ចែក​រំលែក​គំនិត​ថ្មី និង​ពិភាក្សា​ពិគ្រោះ​យោបល់​អំពី​ការ​អភិរក្ស ជួសជុល និង​ការ​អភិវឌ្ឍ​ប្រកប​ដោយ​ចីរភាព​ក្នុង​រមណីយដ្ឋាន​អង្គរ។

កិច្ចប្រជុំ​នេះ​ត្រូវ​បាន​រៀបចំ​ឡើង​ដោយ​អង្គការ UNESCO និង​ដឹកនាំ​ដោយ​សហប្រធាន ជប៉ុន និង បារាំង។

លោក ឡុង កុសល អ្នក​នាំពាក្យ​អាជ្ញាធរ​ជាតិ​អប្សរា​បាន​ឲ្យ​ដឹង​កាលពី​ម្សិលមិញ​ថា៖ «លោក​ឧបនាយករដ្ឋមន្រ្តី សុខ អាន បាន​អំពាវនាវ​ឲ្យ​មន្រ្តី​ជំនាញ​ជាន់​ខ្ពស់​នៃ​អង្គការ​ UNESCO ផ្តល់​បន្ថែម​ទៀត​នូវ​ការ​បណ្តុះបណ្តាល​ចែក​រំលែក​បទពិសោធ និង​គំនិត​បច្ចេកទេស​ថ្មីៗ​ទៅ​ដល់​មន្ត្រី​អាជ្ញាធរ​ជាតិ​អប្សរា​ក្នុង​គោលបំណង​ដើម្បី​បង្កើន​ធនធាន​មនុស្ស​ឲ្យ​កាន់​តែ​ច្រើន​ក្នុង​ការ​ការពារ​ និង​ការ​អភិរក្ស​តំបន់​បុរាណ​អង្គរ»។

លោក កុសល បន្ថែម​ទៀត​ថា​កិច្ចប្រជុំ​នេះ​មាន​ការ​ផ្តោះប្តូរ​យោបល់​ស្តីពី​ការ​ជួសជុល​ឡើង​វិញ​ការ​ស្រាវជ្រាវ​បុរាណ​វត្ថុ​ទេសចរណ៍ និង​ការ​អភិវឌ្ឍ​ប្រកប​ដោយ​ចីរភាព​ក្នុង​តំបន់​អង្គរ​នេះ។

កិច្ចប្រជុំ​នេះ​បាន​ធ្វើការ​ពិភាក្សា​ដោយ​ផ្តោត​ទៅ​លើ​ការ​ជួសជុល និង​អភិរក្ស​ប្រាសាទ​មួយ​ចំនួន​ដូចជា​ប្រាសាទ​បាគង ទីលាន​ជល់​ដំរី មេ​បុណ្យ​ខាង​លិច ប្រា​សាទ​បន្ទាយស្រី ប្រាសាទ​ភ្នំបាខែង​ ប្រាសាទ​អង្គរវត្ត ភ្នំ​គូលែន...ជាដើម​ដែល​ពួកគេ​បាន​ពិភាក្សា​ម្តង​រួច​មក​ហើយ​កាលពី​ខែ​ធ្នូ​ឆ្នាំ​មុន។

លោក​​ថ្លែង​ថា៖ ​«កិច្ចប្រជុំ​នេះ​បន្ត​ផ្តោត​លើ​គម្រោង​ជាច្រើន​ដែល​យើង​បាន​ពិភាក្សា​នៅក្នុង​កិច្ចប្រជុំ​បច្ចេកទេស​លើក​ទី​ ២៥ »។

ចំណែកឯ​គម្រោង​ដាក់​ពិតាន​ឈើ​នៅក្នុង​វិចិត្រសាល «កូរ​សមុទ្រ​ទឹក​ដោះ» ដែល​​ស្ថិតនៅ​ភាគ​ខាង​កើត​នៃ​ប្រាសាទ​អង្គរវត្ត​ក៏​ស្ថិត​ក្នុង​របៀបវារៈ​នៃ​កិច្ចប្រជុំ​នេះ​ផង​ដែរ។

លោក ចៅ ស៊ុនកិរិយា អ្នក​នាំ​ពាក្យ​អាជ្ញាធរ​អប្យរា​បាន​ឲ្យ​ដឹង​ថា​ក្រុម​អ្នក​ជំនាញ​ចង់​ឲ្យ​កម្ពុជា​បន្ថែម​ការ​យក​ចិត្ត​ទុក​ដាក់​ទៅ​លើ​ប្រាសាទ​អង្គរវត្ត​ដោយសារ​តែ​ប្រាសាទ​នេះ​ធំ​ហើយ​ក៏​ជា​ប្រាសាទ​ដែល​មាន​ភ្ញៀវ​ទៅ​ទស្សនា​ច្រើន​ជាង​គេ។

លោក​បញ្ជាក់​ថា​៖ «ហើយ​នោះ​ជា​ការងារ​របស់​យើង​ក្នុង​ការ​ថែទាំ​ថ្ម​ប្រាសាទ​មិន​ត្រឹម​តែ​ប្រាសាទ​អង្គរវត្ត​នោះ​ទេ​គឺ​គ្រប់​ប្រាសាទ​ទាំងអស់​នៅក្នុង​តំបន់​ឧទ្យាន​អង្គរ​នេះ​ដោយសារ​តែ​ថ្ម​វា​មាន​អាយុ​ចាស់​ហើយ​វា​ថែម​ទាំង​រង​ការ​ប៉ះពាល់​ដោយ​កត្តា​អាកាសធាតុ និង​ការ​បំពុល​បរិយាកាស»៕

អត្ថបទគួរចាប់អារម្មណ៍