ភ្នំពេញៈ គណៈកម្មាធិការអន្តរជាតិនៃកាកបាទក្រហម (ICRC) បានផ្ដល់ជំនួយសម្ភារ និងបរិក្ខារចំនួន ២០ តោន ដល់អគ្គនាយកដ្ឋានពន្ធនាគារ ដើម្បីប្រើប្រាស់សម្រាប់ក្នុងការងារបង្ការកុំឱ្យជំងឺកូវីដ ១៩ ឆ្លងរាលដាលនៅគ្រប់ពន្ធនាគារ។
កាលពីថ្ងៃទី ១០ មេសា លោក ចាន់ គីមសេង អគ្គនាយកនៃអគ្គនាយដ្ឋានពន្ធនាគារបានចុះហត្ថលេខាជាមួយលោក រ៉ូម៉ាន៍ ប៉ារ៉ាម៉ូណូវ ប្រធានបេសកកម្ម ICRC ប្រចាំកម្ពុជានៅក្នុងកម្មវិធីប្រគល់សម្ភារអនាម័យចំនួន ២០ តោន។ សម្ភារទាំងនោះមានដូចជា ម្សៅកាល់ស្យូមអ៊ីប៉ូក្លរ៉ៃចំណុះ ៥០ គីឡូក្រាមចំនួន ២២១ ធុង អាវសម្រាប់ការពារការប្រឡាក់ទឹក ស្បែកជើងជ័រកវែង ស្រោមដៃសម្រាប់ការពារការប្រឡាក់ទឹក វ៉ែនតាការពារភ្នែក ធុងទឹក ធុងបាញ់ទឹក ទឹកលាងដៃសម្លាប់មេរោគ វ៉ែនតាវេជ្ជសាស្ត្រ ស្រោមដៃវេជ្ជសាស្ត្រ និងម៉ាស់វេជ្ជសាស្ត្រ។
លោក ចាន់ គីមសេង បានឲ្យដឹងថាការផ្ដល់ជំនួយទាំងនេះគឺផ្ដល់ចំ ចំណុចសំខាន់ចំនួន ២ គឺទី១ ធ្វើឡើងចំពេលវេលាដែលខាងពន្ធនាគារកំពុងត្រូវការខ្លាំង និងទី២ ជាសម្ភារបរិក្ខារដែលចាំបាច់បំផុតសម្រាប់ប្រើប្រាស់ប្រយុទ្ធប្រឆាំងនឹងជំងឺកូវីដ ១៩។
លោកបន្តថា ម្សៅកាល់ស្យូមអ៊ីប៉ូក្លរ៉ៃជាង ១០ តោន គឺអាចប្រើប្រាស់គ្រប់គ្រងក្នុងរយៈពេល ៣ ខែ សម្រាប់ជួយផ្នែកអនាម័យដើម្បីបាញ់សម្អាត និងសម្លាប់មេរោគនៅតាមពន្ធនាគារទាំងអស់នៅទូទាំងប្រទេស។
លោក គីមសេង ថ្លែងថា៖ «ជំនួយពេលនេះគឺសំខាន់គឺចំពេល និងចំរបស់ដែលយើងត្រូវការ»។
លោកបានឲ្យដឹងថា វគ្គបណ្ដុះបណ្ដាលមួយនឹងធ្វើឡើងនៅពេលខាងមុខដ៏ខ្លីនេះ ដើម្បីបង្ហាត់បង្ហាញពីរបៀបប្រើប្រាស់ឧបករណ៍ និងសម្ភារបរិក្ខារទាំងនោះ។
លោក គីមសេង បានបញ្ជាក់ថា ដើម្បីគាំទ្រដល់ផ្នែកអនាម័យនៅក្នុងពន្ធនាគារ គឺខាងពន្ធនាគារត្រូវការជំនួយជាសាប៊ូប្រហែល ៨ តោនទៀត ខណៈពេលដែលខាង ICRC មានគម្រោងផ្ដល់សាប៊ូជិត ៧០ តោន។
លោក រ៉ូម៉ាន៍ ប៉ារ៉ាម៉ូណូវ បានលើកឡើងថា អ្នកកំពុងជាប់ឃុំក្នុងពន្ធនាគារគឺកំពុងប្រឈមនឹងកង្វះខ្យល់ អនាម័យ និងភាពចង្អៀតណែន។
លោកថា៖ «អាទិភាពចម្បងនៃបេសកកម្មរបស់យើងនៅពេលនេះ គឺការជួយឧបត្ថម្ភគាំទ្រដល់ការខិតខំប្រឹងប្រែងរបស់អគ្គនាយកដ្ឋានពន្ធនាគារក្នុងការការពារដល់ជនជាប់ឃុំទាំង ៣៨ ០០០ នាក់ និងមន្ត្រីពន្ធនាគារចំនួន ៤ ០០០ នាក់ ក្នុងការទប់ស្កាត់ការរីករាលដាលនៃវីរុសកូវីដ ១៩ នៅពន្ធនាគារ និងវិធានការឆ្លើយតបនៅពេលដែលមានករណីកើតឡើង។ ពួកយើងបានផ្ដល់នូវតម្រូវការដែលចាំបាច់ជាពិសេស សម្ភារការពារអនាម័យខ្លួនប្រាណក៏ ដូចជាវគ្គបណ្ដុះបណ្ដាល និងជំនួយបច្ចេកទេសផ្សេងៗ»។
លោកបន្តថា ខាង ICRC បានត្រៀមថវិកាចំនួន ២ សែន ៣ ម៉ឺនដុល្លារ ដើម្បីផ្គត់ផ្គង់សម្ភារ និងឧបករណ៍ដែលចាំបាច់ និងផ្ដល់វគ្គបណ្ដុះបណ្ដាលបច្ចេកទេសដល់អាជ្ញាធរក្នុងពន្ធនាគារ ហើយសង្ឃឹមថា ជនជាប់ឃុំទាំងអស់នឹងនៅតែអាចមានទំនាក់ទំនងជាមួយគ្រួសារដដែល ខណៈខាងពន្ធនាគារបានសម្រេចផ្អាកមិនឱ្យចូលសួរសុខទុក្ខដើម្បីបង្ការ ឆ្លងជំងឺកូវីដ ១៩។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានប្រាប់ភ្នំពេញប៉ុស្ដិ៍ម្សិលមិញថា វិធានការដែលកំពុងអនុវត្តនៅក្នុងពន្ធនាគារដើម្បីបង្ការជំងឺកូវីដ១៩ រួមមានផ្អាកការចូលសួរសុខទុក្ខ ការដាក់ម៉ាស៊ីនបាញ់ថ្នាំ និងវាស់កម្តៅនៅច្រកចេញចូល ការឱ្យអ្នកជាប់ឃុំអនុវត្តតាមសេចក្ដីណែនាំរបស់ក្រសួងសុខាភិបាលដើម្បីលាងដៃនឹងសាប៊ូជាប្រចាំ មិនយកដៃប៉ះមុខ និងការពាក់ម៉ាស់ជាដើម។ ប៉ុន្តែនៅក្នុងពន្ធនាគារគឺកំពុងប្រឈមចំពោះការឱ្យអ្នកជាប់ឃុំរក្សាគម្លាតពីគ្នា ដោយសារតែពន្ធនាគារមានភាពចង្អៀតណែន។
លោក សវនា ថ្លែងថា៖ «ជាមធ្យមនៅតាមពន្ធនាគារនៅទូទាំងប្រទេសគឺត្រូវបានវាយតម្លៃថា កន្លែងដេក (របស់អ្នកជាប់ឃុំម្នាក់) គឺមាន ១ ម៉ែត្រការ៉េដែរ»។
លោកបានឲ្យដឹងថា មកដល់ពេលនេះមិនទាន់មានករណីឆ្លងកូវីដ ១៩ នៅក្នុងពន្ធនាគារនៅឡើយ បន្ទាប់ពីមានអ្នកជាប់ឃុំ ៤ ទៅ ៥ នាក់ មានកម្ដៅខ្លួនកើនឡើងខុសធម្មតា ហើយត្រូវបានយកសំណាកទៅធ្វើតេស្ដ និងមានផលអវិជ្ជមាន។ បច្ចុប្បន្នពួកគេមានអាការដូចដើមវិញអស់ហើយ។
លោកថា បច្ចុប្បន្នអ្នកជាប់ឃុំទាំងអស់គឺអាចខលទូរស័ព្ទទាក់ទងជាមួយគ្រួសារ ខណៈមានអង្គការមួយទើបបានសន្យាថានឹងជួយបំពាក់ប្រព័ន្ធខលសួរសុខទុក្ខតាមវីដេអូនៅពន្ធនាគារនាពេលខាងមុខ៕