.jpg)
អ្នកចូលរួមរត់ម៉ារ៉ាតុងនៅទឹកដីអង្គរក្នុងខេត្តសៀមរាបកាលពីថ្ងៃអាទិត្យម្សិលមិញ។ រូបថត អាជ្ញាធរអប្សរា
សៀមរាបៈ អង្គការអន្តរជាតិខាងការងារ (ILO) និងក្រសួងការងារបានចូលរួមរត់ប្រណាំងអន្ដរជាតិពាក់កណ្ដាលម៉ារ៉ាតុងចម្ងាយ ២១ គ.ម ១០ គ.ម ៥ គម. និង ៣ គ.ម ដើម្បីជំរុញយុត្តិធម៌សង្គម និងលើកកម្ពស់ការងារសមរម្យសម្រាប់ទាំងអស់គ្នា និងរួមគ្នាជាមួយក្រសួងការងារ និងបេឡាជាតិរបបសន្តិសុខសង្គម (បសស) រំឭកខួប ១០០ ឆ្នាំនៃការបង្កើតអង្គការ ILO និងខួបលើកទី ៥០ នៃការចូលជាសមាជិករបស់កម្ពុជាក្នុងអង្គការ ILO ផងដែរ។
សេចក្តីប្រកាសព័ត៌មានរបស់ ILO កាលពីថ្ងៃសុក្របញ្ជាក់ថា៖ «ទិវានេះក៏ជាឱកាសក្នុងការជំរុញយុត្តិធម៌សង្គម និងលើកកម្ពស់ការងារសមរម្យសម្រាប់ទាំងអស់គ្នាផងដែរ»។ ILO បន្តថាអ្នកចូលរួមប្រមាណ ៥៥០ នាក់មកពីអង្គការ ILO ក្រសួងការងារ សហជីពពាណិជ្ជកម្មសមាគមនិយោជក វិស័យឯកជននិស្សិត អង្គការជាតិ និងអន្តរជាតិទីភ្នាក់ងាររបស់អង្គការសហប្រជាជាតិប្រចាំនៅកម្ពុជារួមទាំងអ្នកពាក់ព័ន្ធដទៃទៀត។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ទិវារំឭកខួបនេះក៏ជាឱកាសសម្រាប់ក្រសួងការងារ និង ILO រំឭកឡើងវិញនូវអ្វីដែលជាផ្លែផ្កានៃកិច្ចសហប្រតិបត្តិការរវាង ILO និងប្រទេស កម្ពុជា ជាពិសេសពាក់ព័ន្ធនឹងវិស័យការងារ។
លោកថ្លែងថា៖ (វិស័យការងារ) រួមមានការកសាងលិខិតបទដ្ឋានគតិយុត្ត ការបណ្តុះបណ្តាលសមត្ថភាពទៅដល់យន្តការត្រីភាគី ហើយនិងការជួយជាលក្ខណៈបច្ចេកទេសទៅដល់ការអភិវឌ្ឍជំនាញក៏ដូចជាទៅលើផ្នែកទំនាក់ទំនងសង្វៀនសង្គមផងដែរ»។
លោក អាត់ ធន់ ប្រធានសហភាពការងារកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា អង្គការ ILO បានជួយរដ្ឋាភិបាលកម្ពុជាក្នុងមួយឆ្នាំរាប់លានដុល្លារទៅលើការងារជាច្រើនដើម្បីអភិវឌ្ឍវិស័យការងារទាក់ទងនឹងគោលការណ៍ច្បាប់ សេចក្តីណែនាំនានា និងក្របខ័ណ្ឌច្បាប់ផ្សេងៗ។
លោកថា៖ «តាមរយៈកម្មវិធីហ្នឹងគឺ ILO បន្តជួយរដ្ឋាភិបាលកម្ពុជានៅក្នុងកម្មវិធីរបស់ខ្លួន ដើម្បីឱ្យវិស័យការងារហ្នឹងមានការប្រសើរឡើងតាមរយៈកម្មវិធីការងារសមរម្យ សម្រាប់ប្រទេសរបស់ខ្លួន ពីព្រោះរដ្ឋាភិបាលបានចុះផែនការយុទ្ធសាស្ត្ររយៈពេល ៥ ឆ្នាំ ២០១៩-២០២៣ ជាមួយអង្គការ ILO ហ្នឹងនឹងអភិវឌ្ឍប្រទេសឈានទៅរកការងារសមរម្យរបស់ខ្លួន»។
ទិវារត់ប្រណាំងអន្ដរជាតិពាក់កណ្ដាលម៉ារ៉ាតុងលើកទី ២៤ ឆ្នាំ ២០១៩ ត្រូវបានធ្វើឡើងនៅប្រាសាទអង្គរវត្តក្នុងខេត្តសៀមរាបកាលពីព្រឹកថ្ងៃអាទិត្យក្រោមអធិបតីភាពលោក ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC)។ លោក ថោង ខុន ថ្លែងថា ព្រឹត្តិការណ៍រត់ប្រណាំងនេះមានអ្នកចូលរួមចំនួន ១២១៧៥ នាក់មកពី ៨៥ ប្រទេស។
ចំនួននេះកើនឡើងប្រមាណ ២០ ភាគរយ បើធៀបនឹងឆ្នាំ ២០១៨ ក្នុងនោះអ្នករត់ ២១ គ.ម មាន ៣ ០៧៩ នាក់ អ្នករត់ ១០ គ.ម មាន ៥ ០២៩ នាក់ អ្នករត់ ៥ គ.ម មាន ១ ៨០៤ នាក់ និងអ្នករត់ ៣ គ.ម មាន ២ ២៦៣ នាក់។ ជនបរទេសចូលរួមច្រើនជាងគេមានអង់គ្លេសលេខ ១ ជប៉ុនលេខ ២ អាមេរិកលេខ ៣ អូស្ដ្រាលីឈរលេខ ៤ និងបារាំងឈរលេខ ៥។ នេះបើតាមក្រសួងទេសចរណ៍ពីថ្ងៃអាទិត្យ។
លោក Graeme Buckley នាយកប្រចាំប្រទេសថៃ កម្ពុជា និងឡាវ នៃ ILO ថ្លែងតាមរយៈសេចក្តីប្រកាសព័ត៌មាន ILO ពីថ្ងៃអាទិត្យថា៖ «វាជាការត្រឹមត្រូវ ដែលយើងគួរមានមោទនភាពចំពោះសមិទ្ធផលក្នុងរយៈពេលច្រើនទសវត្សរ៍មកនេះ។ ភាពជាដៃគូដែលយើងធ្វើរួមគ្នាជាមួយរដ្ឋាភិបាល និងប្រជាជនកម្ពុជាគឺសម្រេចបានសមិទ្ធផលជាច្រើន»៕
