ភ្នំពេញៈ មន្ត្រីសហជីពបានអះអាងថា លក្ខខណ្ឌការងារសមរម្យរបស់ពលរដ្ឋកម្ពុជានៅមិនទាន់ទទួលបានពេញលេញនៅឡើយទេ ខណៈអង្គការ ILO ចង់ឲ្យរដ្ឋាភិបាលយកចិត្តទុកដាក់លើវិស័យផ្សេងក្រៅពីវិស័យសេដ្ឋកិច្ចក្នុងប្រព័ន្ធដែលពលរដ្ឋមិនទាន់ទទួលបាននៅឡើយ។
ការលើកឡើងនេះបានធ្វើឡើងនៅក្នុងសិក្ខាសាលាស្តីពីការងារសមរម្យប្រចាំកម្ពុជា និងគោលការណ៍សន្តិសុខសង្គមសម្រាប់កម្មករ (២០១៩-២០២៣) ដែលមានអ្នកចូលរួមពីតំណាងសហភាពសហព័ន្ធសហជីព និងសមាគមប្រមាណ ១៥០ នាក់កាលពីថ្ងៃចន្ទម្សិលមិញនៅរាជធានីភ្នំពេញ។
សិក្ខាសាលានេះរៀបចំឡើងដើម្បីចងក្រងសមាជិកសហជីពទាំងជាង ៥ ០០០ នាក់ នៅក្នុងប្រទេសក្នុងការបង្កើតយន្តការមួយសម្រាប់ចរចាការងារសមរម្យនៅកម្ពុជា។
លោក អាត់ ធន់ ប្រធានសហភាពការងារកម្ពុជាបានលើកឡើងក្នុងឱកាសនោះថា ការទទួលបានការងារសមរម្យគឺជាការងារដែលកម្មករនិយោជិតទទួលបានភ្ជាប់ជាមួយប្រាក់ឈ្នួលដែលអាចធានាដល់ជីវភាពសមរម្យក្នុងសង្គម ហើយការងារនោះមិនមានការគាបសង្កត់ និងអាចមានពេលឈប់សម្រាកគ្រប់គ្រាន់ ជាពិសេសសុវត្ថិភាពនៅកន្លែងការងារ និងទទួលបានកិច្ចគាំពារសង្គមជាដើម។
ទោះជាយ៉ាងណាលោក អាត់ ធន់ បានថ្លែងថា កម្ពុជានៅមិនទាន់អនុវត្តបានពេញលេញនៅឡើយទេ ចំពោះការផ្តល់ការងារសមរម្យដល់ពលរដ្ឋខ្មែរខណៈយន្តការមួយចំនួននៃការងារសមរម្យទើបតែត្រូវបានអនុវត្តក្នុងវិស័យមួយចំនួន និងមិនទាន់បានគ្រប់ជ្រុងជ្រោយនោះ។
លោកបន្តថា៖ «កម្ពុជាបច្ចុប្បន្ននេះមិនទាន់បានពេញលេញនៃការងារសមរម្យនោះទេ យើងទើបតែអនុវត្តកម្មវិធីការងារសមរម្យដើម្បីឈានទៅរកការងារសមរម្យតាមនិយមន័យរបស់អង្គការ ILO ដែលមានតែ ៣ ចំណុចទេ ដែលកម្ពុជាបានពង្រឹងដូចជារបបសន្តិសុខសង្គមដែលទើបចាប់ផ្តើមមិនទាន់បានល្អ។ ចំណែកសិទ្ធិនៅកន្លែងការងារធ្លាក់ចុះច្រើនក្រោយមានច្បាប់សហជីព ហើយការបង្កើតការងារសមរម្យផ្តោតទៅលើយុវជន និងស្ត្រីនោះនៅតែមានអ្នកអត់ការងារច្រើន»។
កម្ពុជាបានចុះអនុស្សរណៈនៃការយោគយល់គ្នាជាមួយអង្គការ ILO លើការអនុវត្តកម្មវិធីការងារសមរម្យចាប់ពីឆ្នាំ ២០១៩ ដល់ឆ្នាំ ២០២៣ ក្នុងនោះកម្ពុជាត្រូវផ្តោតលើការងារអាទិភាពចំនួន ៣ គឺការលើកកម្ពស់មុខរបរ និងការងារ ការពង្រឹង និងពង្រឹកកិច្ចគាំពារសង្គមព្រមទាំងសុខភាព និងសុវត្ថិភាពការងារ គឺការធ្វើឲ្យប្រសើរឡើងនូវទំនាក់ទំនងវិជ្ជាជីវៈ និងសិទ្ធិការងារ។
លោក ទុន សោភ័ណ្ឌ អ្នកសម្របសម្រួលអង្គការអន្តរជាតិខាងការងារប្រចាំនៅកម្ពុជា ILO បានថ្លែងថា រយៈពេលចុងក្រោយនេះរាជរដ្ឋាភិបាលបានធ្វើឲ្យមានវឌ្ឍនភាពច្រើនជុំវិញការបង្កើតឲ្យមានមុខរបរច្រើនក្នុងប្រទេស។ ប៉ុន្តែលោកថា នៅមិនទាន់គ្រប់គ្រាន់ទេ ព្រោះកត្តាសំខាន់គឺត្រូវផ្តោតលើគុណភាពការងារដូចជា មានប្រាក់ឈ្នួលសមរម្យ និងមានកិច្ចគាំពារសង្គមផ្សេងៗតាមរយៈការទទួលបានសិទ្ធិឈប់សម្រាកព្យាបាលសុខភាព សម្រាលកូន និងគ្រោះថ្នាក់ការងារ។
លោក សោភ័ណ្ឌ បានបន្តថាការពង្រីកកិច្ចគាំពារសង្គមក្នុងវិស័យផ្សេងៗទៀតដូចជាសេដ្ឋកិច្ចក្រៅប្រព័ន្ធគឺជាកត្តាចាំបាច់ព្រោះកន្លងទៅមានការខ្វះខាតច្រើនទាក់ទងនឹងអ្នកធ្វើការក្នុងសហគ្រាសខ្នាតតូច ឬមធ្យមដែលមិនទាន់ទទួលបានលក្ខខណ្ឌការងារសមរម្យ។
លោកបញ្ជាក់ថា៖ «ការងារ (វិស័យ) កាត់ដេរទទួលបានលក្ខខណ្ឌការងារសមរម្យជាងវិស័យផ្សេងៗដោយសារប្រាក់ឈ្នួលអប្បបរមាដែលកំណត់ដោយច្បាប់ក៏មាន ហើយបើប្រៀបធៀបជាមួយវិស័យផ្សេងៗ ការកំណត់ប្រាក់ឈ្នួលនេះមិនទាន់មាននៅឡើយទេ។ កម្មករក្នុងវិស័យផ្សេងទៀតពួកគាត់ក៏ចង់ទទួលបានប្រាក់ឈ្នួលដែលកំណត់ដោយច្បាប់ដែរ។ កិច្ចប្រជុំថ្ងៃនេះសហជីពអាចនឹងលើកសំណើបែបម៉េចទៅកាន់រដ្ឋាភិបាល និងជាមួយនិយោជកក្នុងការពង្រីក (លក្ខខណ្ឌការងារសមរម្យ) ទៅវិស័យផ្សេងទៀត»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍តាមតេឡេក្រាមពីម្សិលមិលថាក្រសួងការងារ និងអង្គការ ILO បានអនុវត្តកម្មវិធីការងារសមរម្យ ២០១៩-២០២៣ រួមគ្នាក្នុងនោះក្រសួងមានជំហានសម្រាប់អនុវត្តក្នុងដំណាក់កាលនីមួយៗដើម្បីឆ្លើយតបនឹងយន្តការនៃការទទួលបានការងារសមរម្យសម្រាប់ពលរដ្ឋខ្មែរ។
លោកបានបញ្ជាក់ថា៖ «យើងនឹងអនុវត្តទៅតាមអ្វីដែលបានឯកភាពគ្នា ក្នុងនោះយើងមានអាំងឌីកាទ័រសម្រាប់វាស់ក្នុងឆ្នាំនីមួយៗ»។
បើតាមលោក ទុន សោភ័ណ្ឌ នៅកម្ពុជាពលរដ្ឋដែលមានការងារធ្វើមានប្រហែលជា ១០ លាននាក់ ប៉ុន្តែអ្នកដែលទទួលបានសេវាកិច្ចគាំពារសង្គមមានតែប្រមាណ ២ លានប៉ុណ្ណោះ។ ដូច្នេះនៅមានពលរដ្ឋខ្មែរច្រើនទៀតដែលមិនទាន់ទទួលបានការគាំពារសង្គមនេះ៕