.jpg)
ភ្នំពេញ: រដ្ឋាភិបាលជប៉ុនបានផ្ដល់ហិរញ្ញប្បទានឥតសំណងសម្រាប់គម្រោងពង្រីកប្រព័ន្ធផ្គត់ផ្គង់ទឹកស្អាតដែលមានតម្លៃប្រមាណជាង ៣២ លានដុល្លារ ដើម្បីធ្វើឲ្យប្រសើរឡើងនូវការទទួលបានទឹកស្អាតប្រកបដោយសុវត្ថិភាពក្នុងក្រុងតាខ្មៅ។ យោងតាមសេចក្ដីប្រកាសព័ត៌មានរួមគ្នារបស់ក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារ JICA ចុះថ្ងៃទី ១ ខែមិថុនា ដែលភ្នំពេញប៉ុស្ដិ៍ទទួលបានពីម្សិលមិញ។
យោងតាមសេចក្ដីប្រកាសព័ត៌មានដដែលនេះបានឲ្យដឹងថា គម្រោងនេះត្រូវបានចុះហត្ថលេខាដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Yuichi SUGANO ប្រធានតំណាងទីភ្នាក់ងារសហប្រតិបតិ្តការអន្តរជាតិជប៉ុន (JICA) ប្រចាំកម្ពុជាដែលមានទឹកប្រាក់ចំនួន ៣ ៤២១ លានយ៉េនជប៉ុន (ប្រមាណជា ៣២ លានដុល្លារអាមេរិក)។
សេចក្ដីប្រកាសព័ត៌មានបន្តថា គម្រោងការសាងសង់រោងចក្រប្រព្រឹត្តិកម្មទឹកស្អាតដែលមានសមត្ថភាពផលិតទឹកស្អាតបាន ៣ ម៉ឺនម៉ែត្រគុបក្នុង ១ ថ្ងៃ ការសាងសង់ស្ថានីយបូមទឹកឆៅ និងបំពង់មេនាំទឹកឆៅ ការសាងសង់បរិក្ខារសម្រាប់ចែកចាយទឹកស្អាត និងការបំពាក់ប្រព័ន្ធ SCADA សម្រាប់តាមដាន និងបញ្ជាដំណើរការរបស់រោងចក្រ ព្រមទាំងការផ្ទេរបច្ចេកវិទ្យាសម្រាប់ប្រតិបត្តិការ និងការថែទាំរោងចក្រដោយប្រើបទពិសោធ និងចំណេះដឹងពីប្រទេសជប៉ុន។
លោក សាយ បូរ៉ា មន្ត្រីកម្មវិធីជាន់ខ្ពស់នៃ JICA បានឲ្យដឹងពីម្សិលមិញថា បច្ចុប្បន្នទឹកស្អាតដែលកំពុងប្រើប្រាស់ក្នុងក្រុងតាខ្មៅ គឺត្រូវបានផ្គត់ផ្គង់ជាចម្បងពីរាជធានីភ្នំពេញ។ គម្រោងនេះមិនត្រឹមតែផ្ដល់សេវាផ្គត់ផ្គង់ទឹកស្អាតនៅក្នុងក្រុងតាខ្មៅ និងតំបន់ជុំវិញប៉ុណ្ណោះទេ ថែមទាំងជួយកាត់បន្ថយការផ្គត់ផ្គង់ទឹកស្អាតពីរាជធានីភ្នំពេញទៀតផង។ ការសាងសង់គម្រោងនេះនឹងចំណាយរយៈពេលចំនួន ២៩ ខែ ហើយគ្រោងនឹងបញ្ចប់គម្រោងនៅឆ្នាំ ២០២៣។
លោក បូរ៉ា ថ្លែងថា បរិក្ខារផ្គត់ផ្គង់ទឹកស្អាតជាច្រើនកន្លែងត្រូវបានសាងសង់ឡើងដោយប្រើប្រាស់ហិរញ្ញប្បទានឥតសំណងជប៉ុននៅតាមបណ្តាខេត្តផ្សេងៗដូចជា ខេត្តសៀមរាប ខេត្តបាត់ដំបង ខេត្តពោធិ៍សាត់ ខេត្តព្រះសីហនុ ខេត្តកំពត ខេត្តកំពង់ចាម ខេត្តកំពង់ធំ និងរាជធានីភ្នំពេញផងដែរ។ JICA បន្តថា គម្រោងនេះជួយដល់រាជរដ្ឋាភិបាលឲ្យសម្រេចផែនការយុទ្ធសាស្ត្រអភិវឌ្ឍន៍ជាតិលើវិស័យផ្គត់ផ្គង់ទឹកស្អាត ១០០ ភាគរយនៅក្នុងទីប្រជុំជនត្រឹមឆ្នាំ ២០២៥ តាមរយៈការគាំទ្រដល់រដ្ឋាករទឹកស្វយ័តក្រុងភ្នំពេញ ដែលឆ្លើយតបយ៉ាងជាក់ច្បាស់ទៅនឹងសេចក្តីត្រូវការ ជាអាទិភាពរបស់កម្ពុជាក្នុងការពង្រីកប្រព័ន្ធផ្គត់ផ្គង់ទឹកស្អាត៕
