ភ្នំពេញ: ទីភ្នាក់ងារសហប្រតិបត្តិការអន្តរជាតិកូរ៉េ (KOICA-កយកា) បាននិងកំពុងសិក្សាពីលទ្ធភាពសម្រាប់គម្រោងបោសសម្អាតមីននៅកម្ពុជា ដោយគ្រោងប្រើប្រាស់កញ្ចប់ថវិកាសរុបប្រមាណ ១០ លានដុល្លារសហរដ្ឋអាមេរិក សម្រាប់អនុវត្តផែនការរយៈពេល ៦០ ខែ ចាប់ពីឆ្នាំ ២០២១ ដល់ឆ្នាំ ២០២៥។ យោងតាមគេហទំព័រផ្លូវការរបស់ KOICA-កយកា បានឲ្យដឹងពីម្សិលមិញ។
គេហទំព័រដដែលនេះបានឲ្យដឹងថា KOICA បានធ្វើការសិក្សាលទ្ធភាពលើ “គម្រោងសកម្មភាពមីនសម្រាប់កម្មវិធីអភិវឌ្ឍន៍មនុស្សនៅកម្ពុជា” សម្រាប់ផែនការនៅឆ្នាំ ២០២១នេះ ដែលគម្រោងនេះត្រូវបានស្នើឡើងដោយរដ្ឋាភិបាលកម្ពុជាតាមរយៈអាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន (CMAA) និងអង្គការកម្មវិធីអភិវឌ្ឍន៍របស់អង្គការសហប្រជាជាតិ (UNDP) ប្រចាំនៅប្រទេស កម្ពុជា (UNDP-Cambodia)។
KOICA-កយកា បន្តថា គោលបំណងសំខាន់នៃគម្រោងនេះ ដើម្បីបង្កើតមាគ៌ាសម្រាប់ការអភិវឌ្ឍយ៉ាងជឿនលឿននៅតាមភូមិដែលត្រូវបានគេចាត់ទុកថា មិនមានមីនជាមួយដៃគូជាតិ និងអន្តរជាតិ ដើម្បីដោះស្រាយបញ្ហាប្រឈមក្នុងការអភិវឌ្ឍសហគមន៍ និងកាត់បន្ថយភាពក្រីក្រក្នុងចំណោមគ្រួសារងាយរងគ្រោះបំផុត។ ជាពិសេសសម្រាប់អនុវត្តនៅតាមខេត្តអាទិភាពនៅតាមបណ្តោយព្រំដែនរវាងកម្ពុជា និងថៃក្នុងខេត្ត ៣ ជាប់គ្នាគឺខេត្តបាត់ដំបង ខេត្តប៉ៃលិន និងខេត្តបន្ទាយមានជ័យ។
គម្រោងនេះរួមមានសកម្មភាពគាំទ្រសកម្មភាពបោសសម្អាតមីន ការបណ្តុះបណ្តាលសម្រាប់ហានិភ័យមីន ជំនួយជនរងគ្រោះ ការគាំទ្រដល់ការពង្រឹងសមត្ថភាពរបស់អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន (C.M.A.A) និងធ្វើការត្រួតពិនិត្យ និងវាយតម្លៃ។
KOICA-កយកា បានបញ្ជាក់ថា៖ «យោងតាមការរកឃើញគន្លឹះសំខាន់ៗរបស់ក្រុមការងាររួមការិយាល័យកយកាប្រចាំនៅកម្ពុជានឹងរាយការណ៍ជូនទៅទីស្នាក់ការកណ្តាលរបស់ខ្លួន ដើម្បីធ្វើការជ្រើសរើសគម្រោងអាទិភាពសម្រាប់អនុវត្តនៅឆ្នាំ ២០២១ នេះ។ ប្រសិនបើគម្រោងនេះជាប់ក្នុងការជ្រើសរើសគម្រោងនេះនឹងអនុវត្តនៅក្នុងប្រទេសកម្ពុជារយៈពេល ៦០ ខែចាប់ពីឆ្នាំ ២០២១ ដល់ឆ្នាំ ២០២៥ ដែលមានថវិកាសរុបប្រមាណ ១០ លានដុល្លារសហរដ្ឋអាមេរិក»។
លើសពីនេះក្រុមការងាររួមរបស់កយកា-KOICA ក៏បានចុះទៅពិនិត្យទីតាំងគម្រោងសំខាន់ៗ ដើម្បីធ្វើការត្រួតពិនិត្យស្ថានភាពនៃការអនុវត្ត និងផែនការសកម្មភាពពិគ្រោះយោបល់ជាមួយភ្នាក់ងារពាក់ព័ន្ធរួមទាំង អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន (C.M.A.A) និងអង្គការកម្មវិធីអភិវឌ្ឍន៍របស់អង្គការសហប្រជាជាតិ (UNDP) ប្រចាំនៅប្រទេសកម្ពុជា (UNDP-Cambodia)។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការអាជ្ញាធរមីនបានថ្លែងពីម្សិលមិញថា រដ្ឋាភិបាលរីករាយ និងស្វាគមន៍ចំពោះគម្រោងរបស់ KOICA ដែលកំពុងធ្វើការងារមនុស្សធម៌នេះ ព្រោះកម្ពុជាកំពុងត្រូវការថវិកាបន្ថែមសម្រាប់អនុវត្តន៍សកម្មភាពបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះនៅទូទាំងប្រទេស។
លោកបញ្ជាក់ថា៖ «យើងនឹងយកទៅអនុវត្តការងារបោសសម្អាតនៅខេត្តចំនួន ៣ តាមបណ្ដោយព្រំដែនដូចជា ខេត្តបាត់ដំបង ខេត្តប៉ៃលិន និងខេត្តបន្ទាយមានជ័យដែលយើងចាត់ទុកថា ជាកន្លែងមានមីនច្រើនជាងគេនៅទូទាំងប្រទេស កម្ពុជា។ ខ្ញុំសង្ឃឹមថា លុយរបស់ KOICA នេះនឹងជួយសង្គ្រោះជីវិតប្រជាពលរដ្ឋខ្មែរមួយចំនួនធំទៀតនៅក្នុងខេត្តអាទិភាពទាំង ៣ នេះ»។
លោកថា ជាង ២០ ឆ្នាំអាជ្ញាធរបានដោះមីនចេញពីផ្ទៃដីចំនួន ១ ៩០០ គីឡូម៉ែត្រក្រឡា។ រយៈពេល ១១ ខែក្នុងឆ្នាំ ២០១៩ នេះមានជនរងគ្រោះចំនួនជាង ៦០ នាក់បានស្លាប់ និងរងរបួស៕