.jpg)
បុរសម្នាក់ឈរមើលប្រឡាយពុំមានទឹកក្នុងស្រុងមោងឫស្សីពីខែមិថុនា។ ហុង មិនា
ភ្នំពេញៈ គណៈកម្មការទន្លេមេគង្គ (MRC) បានប្រកាសថា ប្រទេសដែលស្ថិតតាមដងទន្លេមេគង្គនឹងជួបប្រទះគ្រោះរាំងស្ងួតធ្ងន់ធ្ងរខ្លាំងចាប់ពីពេលនេះ (១៩ វិច្ឆិកា) ដល់ខែមករា ឆ្នាំ ២០២០ ហើយប្រទេស កម្ពុជា នឹងជួបគ្រោះរាំងស្ងួតខ្លាំងជាងប្រទេស ឡាវ និងវៀតណាម។
សេចក្តីប្រកាសព័ត៌មានរបស់ MRC កាលពីថ្ងៃអង្គារបញ្ជាក់ថា គ្រោះរាំងស្ងួតនេះបណ្តាលមកពីបរិមាណទឹកភ្លៀងមិនគ្រប់គ្រាន់ក្នុងរដូវវស្សា ព្រោះភ្លៀងមូសុងបានធ្លាក់មកយឺត ហើយភ្លៀងមូសុងនេះបានឈប់ធ្លាក់មុនពេលកំណត់ និងមានបាតុភូតអែលនីណូ (El nino) ដែលបណ្តាលឱ្យមានកម្តៅ និងរំហួតខ្ពស់ខុសប្រក្រតី។
MRC បន្តថាជាធម្មតាភ្លៀងមូសុងតែងតែចាប់ផ្តើមធ្លាក់នៅចុងខែឧសភា និងបញ្ចប់នៅខែតុលា ប៉ុន្តែភ្លៀងនេះបានចាប់ផ្តើមធ្លាក់យឺតជិត ២ សប្តាហ៍ និងឈប់ធ្លាក់ប្រមាណ ៣ សប្តាហ៍មុនពេលកំណត់។
លោក ឡាំ ហុងសឺន ប្រធានមជ្ឈមណ្ឌលគ្រោះរាំងស្ងួត និងទឹកជំនន់ប្រចាំតំបន់នៃលេខាធិការដ្ឋាន MRC ត្រូវបានស្រង់សម្តីក្នុងសេចក្តីប្រកាសព័ត៌មានថា៖ «អាកាសធាតុស្ងួតរយៈពេលយូរនៅឆ្នាំនេះអាចបង្កផលប៉ះពាល់អវិជ្ជមាន ដល់ដំណាំ និងផលិតផលកសិកម្ម។ បញ្ហាកង្វះទឹកប្រើប្រាស់អាចនឹងកើតមានបើគ្រោះរាំងស្ងួតនៅតែបន្ត»។
MRC ឱ្យដឹងថាគ្រោះរាំងស្ងួតនឹងមានសភាពកាន់តែធ្ងន់ធ្ងរចាប់ពីខែធ្នូ ឆ្នាំ ២០១៩ ដល់ខែមករា ឆ្នាំ ២០២០។ តំបន់ភាគខាងលិចឈៀងខាងជើងប្រទេស កម្ពុជា ដែលមានខេត្តឧត្តរមានជ័យ ព្រះវិហារ និងសៀមរាបនឹងរងការប៉ះពាល់ខ្លាំងបំផុតពីគ្រោះរាំងស្ងួតនេះ។ ចាប់ពីសប្តាហ៍ទី ២ ខែមករាស្ថានភាពគ្រោះរាំងស្ងួតនេះនឹងមានភាពប្រសើរជាងមុនបន្តិចម្តងៗ ពីព្រោះអាកាសធាតុនឹងប្រែមកមានសំណើមបន្តិចវិញ។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមប្រាប់ភ្នំពេញប៉ុស្តិ៍ពីថ្ងៃពុធថា អំឡុងខែធ្នូ និងខែមករាដែលស្ថិតក្នុងរដូវប្រាំងស្រាប់នោះនឹងមិនមានសភាពហួតហែងនោះទេព្រោះជារដូវរងា ហើយសីតុណ្ហភាពទាប។ ឆ្នាំនេះត្រជាក់ជាងបណ្តាឆ្នាំកន្លងទៅ ហើយអាចមានរយៈពេលយូរទៀតផងចាប់ពីពាក់កណ្តាលខែធ្នូអាចហូតដល់សប្តាហ៍ទី ៣ ឬទី ៤ នៃខែមករា ឆ្នាំ ២០២០។
បើតាមលោក ចាន់ យុត្ថា ចាប់តាំងដើមឆ្នាំ ២០១៩ នេះរហូតដល់ពាក់កណ្តាលខែកក្កដាកម្ពុជាក៏ដូចជាក្របខ័ណ្ឌតំបន់ និងប្រទេសក្រៅតំបន់ ដែលស្ទើរតែពាក់កណ្តាលពិភពលោកបានទទួលរងឥទ្ធិពលបាតុភូត អែល នីណូ។ សម្រាប់កម្ពុជា និងប្រទេសក្នុងតំបន់ ឥទ្ធិពលនេះបានធ្វើឱ្យមានកត្តាអវិជ្ជមានដែលបានបន្សល់ទុករហូតមកសព្វថ្ងៃនេះ គឺភ្លៀងកក់ខែស្ទើរមិនមានក្នុងរដូវប្រាំងឆ្នាំនេះ ការមកដល់នៃរដូវវស្សាយឺតជាងសព្វដង ហើយភ្លៀងក៏ធ្លាក់តិចតួចទាំងនៅក្នុងកម្ពុជាក៏ដូចជានៅក្នុងតំបន់ផ្ទៃរងទឹកភ្លៀងរបស់ទន្លេមេគង្គ។
លោក យុត្ថា ថ្លែងថា៖ «អ៊ីចឹងអ្វីដែលជាការលើកឡើងរបស់មេគង្គ (MRC) នាបច្ចុប្បន្ននេះត្រូវ ដោយសារតែយើងឃើញទឹកទន្លេមេគង្គហ្នឹងគឺទាបមែនទែនហើយដែលយើងកម្រជួបប្រទះ ហើយមានប្រភពព័ត៌មានខ្លះ NGO ខ្លះថាអាចដល់ ១០០ ឆ្នាំដែលយើងមិនដែលជួបប្រទះ។ ប៉ុន្តែខ្ញុំអាចនិយាយបានថា ក្នុងរយៈពេលកន្លងមកខ្ញុំអត់ដែលជួបប្រទះ ដែលកម្រិតកម្ពស់ទឹកទន្លេមេគង្គនៅក្នុងរដូវប្រាំងហ្នឹងទាបអ៊ីចឹងទេ»។
បើតាមលោក យុត្ថា មូលហេតុដែលបណ្តាលឱ្យទឹកទន្លេមេគង្គទាបគឺមកពីដោយសារបាតុភូតអែលនីណូ។ កន្លងមកមិនមានភ្លៀងធ្លាក់នោះទេ។ សូម្បីតែនៅកម្ពុជា កន្លែងខ្លះ មានភ្លៀងធ្លាក់គំហុកបង្កជាជំនន់។ កន្លែងខ្លះភ្លៀងធ្លាក់តិចតួចរហូតដល់នៅស្រុកខ្លះ មានភ្លៀងធ្លាក់ទាបជាង ៧០០ មិល្លីម៉ែត្រទៅទៀតដែលកម្ពុជាមិនដែលជួបប្រទះនោះទេ។
លោកបន្តថា កន្លងមកនៅពេលមានភ្លៀងធ្លាក់តិចតួចនៅកន្លែងខ្លះ ក្រសួងធនធានទឹកក៏បានចាត់វិធានការរក្សាទឹកទុក។ ចំណែកទឹកទន្លេមេគង្គដែលហក់ឡើង «មួយវឹប» ក៏បានហូរចូលព្រែកអាង និងបឹងបួរធម្មជាតិមួយចំនួន។ នៅពេលទឹកស្រកទៅវិញ ក្រសួងក៏បានរក្សាទឹកទុកដែរ ហើយទឹកភ្លៀងនេះក៏ត្រូវបានប្រមូលចូលអាងទឹក និងប្រព័ន្ធធារាសាស្ត្រមួយចំនួន។ «ប៉ុន្តែយើងក៏ត្រូវបញ្ចេញមកវិញដើម្បីផ្គត់ផ្គង់ស្រូវធ្ងន់ ស្រូវវស្សាហើយទុកសម្រាប់ការប្រើប្រាស់បង្កបង្កើនផលស្រូវប្រាំងនៅពេលខាងមុខ។ អ៊ីចឹងកម្ពុជាកន្លែងដែលផលិតស្រូវប្រាំងជាទូទៅគឺអាចធ្វើបានតែម្តងនៅឆ្នាំនេះ ព្រោះអីកន្លងមកកន្លែងខ្លះមានធ្វើរហូតដល់ទៅ ២ ដង ឬ ៣ ដង»៕
វីដេអូ៖
