.jpg)
ទិដ្ឋភាពទន្លេមេគង្គ និងទន្លេសាបនៅរាជធានីភ្នំពេញកាលពីឆ្នាំមុន។ ហេង ជីវ័ន
ភ្នំពេញៈ គណៈកម្មការទន្លេមេគង្គ (MRC) បានដាក់ចេញនូវយុទ្ធសាស្ត្ររយៈពេល ១០ ឆ្នាំ (BDS) និងផែនការ ៥ ឆ្នាំ (SP) ដើម្បីបង្កើតតុល្យភាពនៃការគ្រប់គ្រង និងអភិវឌ្ឍអាងទន្លេមេគង្គសំដៅជួយឱ្យប្រទេសនៅតាមអាងទន្លេមេគង្គ ដោះស្រាយបញ្ហាប្រឈមដែលកើតមាន និងធ្វើឱ្យស្ថានភាពអាងទន្លេជារួមបានប្រសើរឡើង។
សេចក្តីប្រកាសព័ត៌មានរបស់គណៈកម្មការទន្លេមេគង្គចេញផ្សាយកាលពីថ្ងៃទី ៥ ខែមេសា ដែលអនុម័តដោយក្រុមប្រឹក្សាថ្នាក់រដ្ឋមន្ត្រី មកពីប្រទេសកម្ពុជា ឡាវ ថៃ និងវៀតណាម (BDS ២០២១-២០៣០) បានផ្តោតលើវិស័យអាទិភាពចំនួន ៥។ វិស័យទាំងនេះ រួមមានការធ្វើឱ្យប្រសើរឡើងនូវមុខងារអេកូឡូស៊ីនៃទន្លេមេគង្គសម្រាប់សុខភាពបរិស្ថាន និងសហគមន៍ប្រកបដោយផលិតភាព ការជំរុញលទ្ធភាពទទួលបាន និងប្រើប្រាស់ធនធានទឹក និងធនធានពាក់ព័ន្ធនានាឱ្យបានកាន់តែប្រសើរសម្រាប់សុខុមាលភាពសហគមន៍។
ការអភិវឌ្ឍនិរន្តរភាពសម្រាប់កំណើនសេដ្ឋកិច្ចប្រកបដោយបរិយាប័ន្ន ភាពធន់ទប់ទល់នឹងហានិភ័យ អាកាសធាតុ និងគ្រោះមហន្តរាយនានា និងការពង្រឹងនូវកិច្ចសហប្រតិបត្តិការថ្នាក់តំបន់ដោយផ្អែកលើទស្សនវិស័យសម្រាប់អាងទន្លេទាំងមូល។
នាយកប្រតិបត្តិនៃលេខាធិការដ្ឋាន MRC លោក អាន ពេជ្រហត្ថដា លើកឡើងក្នុងសេចក្តីប្រកាសនេះថា៖ «យុទ្ធសាស្ត្រនេះស្របទៅនឹងអាទិភាពរបស់រដ្ឋាភិបាលតាមដងទន្លេមេគង្គ និងតម្រូវការក្នុងការសម្រេចឱ្យបាននូវអាងទន្លេមេគង្គមួយដែលកាន់តែធន់ និងមាំមួនជាងមុនតាមរយៈការរៀបចំផែនការបែបបរិសកម្ម និងការគ្រប់គ្រងដោយសម្របសម្រួលដែលជាលទ្ធផល វាធានាឱ្យមានតុល្យភាពរវាងការអភិវឌ្ឍផ្នែកសេដ្ឋកិច្ច និងការគាំពារផ្នែកបរិស្ថាន»។
ទន្ទឹមនឹងនេះ អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជា លោក គល់ វឌ្ឍនា ប្រាប់ ភ្នំពេញ ប៉ុស្តិ៍ថា យុទ្ធសាស្ត្រ ១០ ឆ្នាំនេះ បង្ហាញឱ្យឃើញពីការខិតខំប្រឹងប្រែង និងការយកចិត្តទុកដាក់របស់អន្តររដ្ឋាភិបាល រួមមានកម្ពុជា ថៃ ឡាវ និងវៀតណាម បន្ទាប់ពីរកឃើញចំណុចខ្សោយនៃទឹកទន្លេមេគង្គ ដើម្បីដោះស្រាយបញ្ហាបន្ទាន់។
លោកបញ្ជាក់ថា៖ «អ៊ីចឹងគេយកបទពិសោធកន្លងមកធ្វើការវាយតម្លៃ រកចំណុចខ្សោយ ហើយគេមើលទៅលើស្ថានភាពជាក់ស្តែងនៃអាងទឹកទន្លេ ក៏ដូចជាធនធានទឹក ទើបគេរៀបចំផែនការយុទ្ធសាស្ត្រសម្រាប់អាងទន្លេហើយផែនការនេះជារឿងល្អ»។
MRC ឱ្យដឹងថា យុទ្ធសាស្ត្ររយៈពេល ១០ ឆ្នាំថ្មីនេះ គឺយោងលើការវាយតម្លៃថ្មីៗពីផលប៉ះពាល់សំខាន់ៗដែលបណ្តាលមកពីការអភិវឌ្ឍធនធានទឹក និងធនធានពាក់ព័ន្ធផ្សេងៗ និងហេដ្ឋារចនាសម្ព័ន្ធ រួមទាំងទំនប់វារីអគ្គិសនីដែលបានផ្លាស់ប្តូររបបលំហូរធ្វើឱ្យប៉ះពាល់ដល់ចរាចរណ៍កំណកល្បាប់ និងបង្កើនសំណឹកតាមច្រាំងទន្លេ។ ផលប៉ះពាល់ទាំងនេះបានធ្វើឱ្យមានការធ្លាក់ចុះនូវចំនួនត្រីធម្មជាតិ ការខូចខាតនៃធនធានបរិស្ថាន និងទំនាបលិចទឹក និងការកាត់បន្ថយក្នុងការបំពេញល្បាប់ក្នុងតំបន់ដីសណ្តរ។
MRC លើកឡើងថា៖ «ការប្រែប្រួលអាកាសធាតុក៏បានបង្កើនភាពធ្ងន់ធ្ងរនៃផលប៉ះពាល់បង្កឱ្យមានហានិភ័យ និងភាពមិនច្បាស់លាស់កាន់តែច្រើន រួមទាំងគ្រោះទឹកជំនន់ និងគ្រោះរាំងស្ងួតកាន់តែញឹកញាប់ជាងមុន»។
អ្នកសម្របសម្រួលបណ្តាញវេទិកានៃអង្គការមិនមែនរដ្ឋាភិបាលស្តីពីកម្ពុជា លោក ម៉ក់ ប៊ុនធឿន បានថ្លែងថា ការដាក់ចេញនូវផែនការថ្មីជារឿងល្អ ប៉ុន្តែទាមទារឱ្យប្រទេសពាក់ព័ន្ធត្រូវរួមគ្នាអនុវត្តឱ្យបានល្អប្រសើរ បើពុំនោះទេនឹងមិនមានប្រសិទ្ធភាពឡើយ។
លោកបញ្ជាក់ថា៖ «អ្វីដែលយើងត្រូវពិនិត្យមើល ថាតើប្រទេសនីមួយៗមានឆន្ទៈក្នុងការចូលរួមដោះស្រាយអនុវត្តទៅតាមផែនការដែរឬអត់ ពីព្រោះវាអាចពាក់ព័ន្ធផលប្រយោជន៍ប្រទេសនីមួយៗ»។ បញ្ហាចម្បងទាមទារឱ្យប្រទេសពាក់ព័ន្ធត្រូវបន្តកិច្ចសហប្រតិបត្តិការគ្នា ដើម្បីចែករំលែកព័ត៌មានអំពីទឹកដែលកិច្ចការនេះគណៈកម្មការទន្លេមេគង្គត្រូវដោះស្រាយបន្ទាន់ បើមិនដូច្នោះទេអាចនឹងមានផលវិបាកទៅថ្ងៃមុខ។
MRC ឱ្យដឹងថាយុទ្ធសាស្ត្ររយៈពេល ១០ ឆ្នាំចាប់ពីឆ្នាំ ២០២១-២០៣០ និងផែនការរយៈពេល ៥ ឆ្នាំចាប់ពីឆ្នាំ ២០២១ ដល់ឆ្នាំ ២០២៥។ ក្នុងនោះ MRC រំពឹងនឹងធ្វើការវិនិយោគនូវទឹកប្រាក់ជាង ៦០ លានដុល្លារក្នុងអំឡុងពេលផែនការ ៥ ឆ្នាំ ដែលធនធានហិរញ្ញវត្ថុប្រមាណ ៤០% បានមកពីវិភាគទានពីប្រទេសជាសមាជិកគណៈកម្មការទន្លេមេគង្គ។
គោលដៅថ្មីដែលសំខាន់សម្រាប់កិច្ចការរបស់ MRC រួមមានការវាយតម្លៃ និងការកំណត់នូវជម្រើសស្តុកទឹក រំហូរទឹកថ្មីៗ ដែនកម្រិតបរិស្ថានថ្មី និងការផ្តល់ជាអនុសាសន៍លើគម្រោងវិនិយោគរួមសម្រាប់អាងទន្លេ ដែលមានប្រយោជន៍សម្រាប់ការគ្រប់គ្រងទឹកជំនន់ ការជួយសង្គ្រោះគ្រោះរាំងស្ងួត សន្តិសុខថាមពល និងការគាំពារបរិស្ថាន៕
វីដេអូ៖
