ភ្នំពេញៈ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមលើកឡើងថា ការរៀបចំប្រព័ន្ធទិន្នន័យ និងព័ត៌មាននាពេលអនាគតផែនការអភិវឌ្ឍន៍ និងផែនការយុទ្ធសាស្ត្របន្ទាប់ សម្រាប់អាងទន្លេមេគង្គគឺជាឧបករណ៍ចាំបាច់ ដើម្បីដោះស្រាយបញ្ហាប្រឈមខណៈ MRC បានអនុម័តយុទ្ធសាស្ត្រដើម្បីត្រៀមខ្លួនប្រឈមនឹងគ្រោះមហន្តរាយនាពេលអនាគត។
នៅក្នុងកិច្ចប្រជុំលើកទី ២៦ នៃក្រុមប្រឹក្សាជាន់ខ្ពស់ MRC កាលពីថ្ងៃអង្គារលោក លឹម គានហោ បានថ្លែងថា ការរៀបចំប្រព័ន្ធ និងផែនការយុទ្ធសាស្ត្រ ក៏នឹងជួយបង្កើនអត្ថប្រយោជន៍សម្រាប់រយៈពេលខ្លី និងរយៈពេលវែងឱ្យកាន់តែមានប្រសិទ្ធភាព ប្រសិទ្ធផល និងប្រកបដោយបរិយាប័ន្ន។
លោកបន្តថា៖ «បញ្ហាប្រឈមនាពេលបច្ចុប្បន្នក៏ដូចជាបញ្ហាដែលយើងរំពឹងថា នឹងកើតឡើងដោយសារល្បឿននៃការអភិវឌ្ឍនៅអាងទឹកទន្លេមេគង្គ និងផលប៉ះពាល់នៃការប្រែប្រួលអាកាសធាតុដែលអាចកើតមាននឹងតម្រូវឱ្យយើង បង្កើនការវិនិយោគ ជំរុញកិច្ចសហប្រតិបត្តិការ និងពង្រឹងប្រព័ន្ធទិន្នន័យ និងប្រព័ន្ធព័ត៌មានរបស់យើង ដើម្បីត្រៀមសម្រាប់ពេលនេះ និងពេលអនាគត។ យើងត្រូវការការប្តេជ្ញាចិត្ត និងកិច្ចសហប្រតិបត្តិការរួមពីគ្រប់ភាគីទាំងអស់»។
លោកបន្ថែមថា នៅឆ្នាំនេះគ្រោះរាំងស្ងួតត្រូវបានគេមើលឃើញថា បានជះឥទ្ធិពលដល់តំបន់ទន្លេមេគង្គ ហើយទឹកជំនន់បានគំរាមកំហែងដល់ជីវភាពរស់នៅរបស់ប្រជាជន។ ប្រទេសសមាជិក MRC បានជួបប្រទះបញ្ហាប្រឈមទៅលើវិធីឆ្លើយតបឱ្យបានទាន់ពេលដើម្បីដោះស្រាយបញ្ហាដែលកើតឡើង និងតាមដានស្ថានភាព និងការអភិវឌ្ឍអាងទន្លេមេគង្គ ព្រោះទិន្នន័យ និងបច្ចេកវិទ្យាជឿនលឿនមានការកំណត់។
លោក គានហោ ថ្លែងថា៖ «យើងក៏ប្តេជ្ញាផ្តល់គំនិតយោបល់ជាយុទ្ធសាស្ត្រ និងគាំទ្រផ្នែកហិរញ្ញវត្ថុដល់ការអនុវត្តផែនការអភិវឌ្ឍន៍ និងផែនការយុទ្ធសាស្ត្រ អាងទន្លេមេគង្គបន្ទាប់ក៏ដូចជាការពង្រឹងប្រព័ន្ធទិន្នន័យ និងប្រព័ន្ធព័ត៌មានស្ថាប័នរបស់យើងដែលជាមធ្យោបាយដោះស្រាយការប្រែប្រួលដែលកំពុងកើតមានឡើងនៅក្នុងអាងទន្លេដែលមានដូចជាភ្លៀងធ្លាក់ខ្លាំងជុំវិញអាង ឬការបញ្ចេញទឹកភ្លាមៗពីទំនប់ តាមដានស្ថានភាព និងការអភិវឌ្ឍអាងទឹក និងផ្តល់ការប្រាស្រ័យទាក់ទងដែលជាខ្នាតតែមួយដល់ភាគីពាក់ព័ន្ធ និងសហគមន៍ប្រព័ន្ធផ្សព្វផ្សាយ»។
លោក លឹម គានហោ ក៏បានលើកទឹកចិត្តដល់ប្រទេសចិន និងមីយ៉ាន់ម៉ាឱ្យបន្តផ្តល់កិច្ចសហប្រតិបត្តិការល្អបំផុតជាមួយបណ្តាប្រទេសសមាជិក MRC ព្រោះទន្លេមេគង្គគឺជាធនធានរួមហើយប្រទេសដែលនៅជាប់ទន្លេមេគង្គមានភាពជាម្ចាស់ហើយមានសិទ្ធិស្មើគ្នាក្នុងការអភិវឌ្ឍ និងការពារ។
នៅក្នុងកិច្ចប្រជុំប្រចាំឆ្នាំកាលពីថ្ងៃអង្គារ ក្រុមប្រឹក្សាជាន់ខ្ពស់គណៈកម្មការ MRC បានអនុម័តយុទ្ធសាស្ត្រគ្រប់គ្រងគ្រោះរាំងស្ងួត និងគោលនយោបាយមួយចំនួនទៀត ដើម្បីជួយលើកកម្ពស់សមត្ថភាពបណ្តាប្រទេសតាមដងទន្លេមេគង្គ ដើម្បីត្រៀមខ្លួនប្រឈមនឹងគ្រោះមហន្តរាយនាពេលអនាគត។
យោងតាមសេចក្តីប្រកាសព័ត៌មាន MRC កាលពីថ្ងៃអង្គារបានឱ្យដឹងថាយុទ្ធសាស្ត្រដែលបានអនុម័តនេះធ្វើឡើង ខណៈដែលតំបន់មេគង្គកំពុងប្រឈមនឹងភាពរាំងស្ងួតធ្ងន់ធ្ងរដែលបណ្តាលឱ្យកម្ពស់ទឹកទន្លេមេគង្គជួបប្រទះកម្រិតទាបបំផុតក្នុងប្រវត្តិសាស្ត្រ ឬក្នុងរយៈពេល ៦០ ឆ្នាំចុងក្រោយនេះ។
MRC បញ្ជាក់ថា៖ «យុទ្ធសាស្ត្ររយៈពេល ៦ ឆ្នាំនេះ នឹងផ្តោតលើគោលការណ៍អាទិភាពទាំង ៥ ដែលត្រូវបានគេវាយតម្លៃថា “មានដំណើរការមិនល្អ” និងត្រូវការ “ការយកចិត្តទុកដាក់ជាបន្ទាន់” ដើម្បីដោះស្រាយវិបត្តិគ្រោះរាំងស្ងួត»។
សេចក្តីថ្លែងការណ៍របស់ដៃគូអភិវឌ្ឍន៍នៅក្នុងកិច្ចប្រជុំនេះបញ្ជាក់ថា ដៃគូអភិវឌ្ឍន៍លើកទឹកចិត្តដល់ MRC និងប្រទេសជាសមាជិក ដើម្បីពង្រឹងការចូលរួមរបស់សហគមន៍បន្ថែមតាមរយៈការពិគ្រោះយោបល់ថ្នាក់ជាតិ និងថ្នាក់តំបន់ ហើយនៅទីបញ្ចប់ ឯកសារពាក់ព័ន្ធគួរតែត្រូវបានផ្សព្វផ្សាយជាភាសាជាតិឱ្យបានទាន់ពេលវេលា។
សេចក្តីថ្លែងការណ៍បន្ថែមថា ការបង្កើនឱកាសសម្រាប់ការចូលរួមជាសាធារណៈក្នុងការរៀបចំយុទ្ធសាស្ត្រ និងសេចក្តីណែនាំរបស់ MRC នឹងធ្វើឱ្យប្រសើរឡើងនូវការគ្រប់គ្រងប្រកបដោយតម្លាភាព និងគណនេយ្យភាពទៅលើធនធានទឹករួមនៅក្នុងតំបន់ ក៏ដូចជាគុណភាព និងលទ្ធផលនៃការវិនិយោគដែលបានគ្រោងទុកនៅទូទាំងអាងទន្លេមេគង្គ។
បើតាមសេចក្តីប្រកាសព័ត៌មានដដែលការសិក្សាថ្មីៗរបស់ MRC បានបង្ហាញថា ចំនួនបាតុភូតគ្រោះរាំងស្ងួតនៅក្នុងអាងទន្លេមេគង្គក្រោមបានកើនឡើង និងមានសភាពធ្ងន់ធ្ងរនៅក្នុងប៉ុន្មានទសវត្សរ៍កន្លងមកនេះ។ ឧទាហរណ៍ គ្រោះរាំងស្ងួតចុងក្រោយបង្អស់ក្នុងឆ្នាំ ២០១៦ បាននាំឱ្យខាតបង់សេដ្ឋកិច្ចយ៉ាងធ្ងន់ធ្ងរដល់ប្រទេសថៃដែលត្រូវបានប៉ាន់ប្រមាណមានចំនួន ១,៧ ពាន់លានដុល្លារ ខណៈដែលនៅប្រទេសកម្ពុជាគ្រោះរាំងស្ងួតបានបង្កការខ្វះខាតទឹកនៅក្នុងខេត្តចំនួន ១៨ ក្នុងចំណោម ២៥ ខេត្តដែលមានប្រជាជនចំនួន ២,៥ លាននាក់ខ្វះខាតទឹក៕