.jpg)
ទិដ្ឋភាពទឹកទន្លេមេគង្គនៅភ្នំពេញ កាលពីថ្ងៃ ៣ កុម្ភៈ ឆ្នាំនេះ។ ហេង ជីវ័ន
ភ្នំពេញ៖ គណៈកម្មការទន្លេមេគង្គ (MRC) បង្ហាញក្ដីបារម្ភ ចំពោះកម្រិតទឹកទន្លេមេគង្គដែលបានស្រកចុះទាបគួរឱ្យបារម្ភ និងទឹកប្រែទៅជាពណ៌បៃតងនៅតំបន់មួយ ចំនួនដែលហេតុការណ៍នេះ នឹងធ្វើឱ្យប៉ះពាល់ដល់ប្រទេសក្នុងតំបន់រួមនឹងកម្ពុជាផងដែរ ទៅលើដំណាំកសិកម្ម និងប៉ះពាល់ដល់ការបំផ្លាស់ទីរបស់សត្វដែលរស់នៅក្នុងទឹកជាដើម។
របាយការណ៍របស់ MRC ដែលចេញផ្សាយពីថ្ងៃទី ១២ ខែកុម្ភៈ បានឱ្យដឹងថា កម្រិតទឹកធ្លាក់ចុះនេះ ដោយសារទឹកទន្លេមេគង្គរវាងស្ថានីយវារីអគ្គិសនីជីងហុង (Jinghong) នៅក្នុងខេត្តយូណាន ប្រទេសចិន និងដែនដីសណ្តទន្លេមេគង្គក្នុងប្រទេសវៀតណាម បានធ្លាក់ចុះក្នុងកម្រិតគួរឱ្យព្រួយបារម្ភយ៉ាងខ្លាំង។
កម្រិតទឹកទន្លេមេគង្គបានធ្លាក់ចុះគួរឱ្យកត់សម្គាល់បានកើតឡើងចាប់តាំងពីដើមឆ្នាំនេះ ដោយសារទឹកភ្លៀងធ្លាក់តិច លំហូរផ្លាស់ប្តូរខ្សែទឹក ប្រតិបត្តិការវារីអគ្គិសនីនៅក្នុងដៃទន្លេមេគង្គ និងការរឹតបន្តឹងលំហូរទឹកចេញពីទំនប់វារីជីងហុងជាដើម។
កម្រិតទឹកទន្លេមេគង្គធ្លាក់ចុះ អាចនឹងធ្វើឱ្យប៉ះពាល់ដល់បណ្តាប្រទេសមួយចំនួននៅតាមដងទន្លេមេគង្គរួមមានកម្ពុជា ថៃ ឡាវ និងវៀតណាម។ ចំណែកខេត្ត និងតំបន់មួយចំនួននៅកម្ពុជាដែលនឹងរងផលប៉ះពាល់វិញរួមមាន កម្រិតទឹកទន្លេហូរចេញពីខេត្តកំពង់ចាម អ្នកលឿង ទន្លេបាសាក់ នៅភ្នំពេញ និងព្រែកក្តាម កំពុងត្រូវបានធ្លាក់ចុះជាលំដាប់។ កម្រិតទឹកនៅតាមដងទន្លេមេគង្គនៃខ្សែទឹកខាងក្រោមនៅខេត្តស្ទឹងត្រែង និងក្រចេះ ប្រែប្រួលចន្លោះ -០,០២ ម៉ែត្រនិង ០,០៥ ម៉ែត្រ។ បើតាម MRC ចាប់ពីខែមករាមក ទឹកទន្លេមេគង្គមានការធ្លាក់ចុះជាមធ្យមប្រចាំថ្ងៃក្នុងកម្រិត ០,២០ ម៉ែត្រ។
លោក Winai Wangpimool ប្រធានផ្នែកគាំទ្របច្ចេកទេសរបស់លេខាធិការដ្ឋាន MRC បានថ្លែងឱ្យដឹងថា៖ «ប្រសិនបើកម្រិតទឹកបន្តស្រកចុះទាបបែបនេះ នឹងធ្វើឱ្យប៉ះពាល់ដល់ការដឹកជញ្ជូនតាមដងទន្លេ ការធ្វើបំផ្លាស់ទីរបស់ត្រី កសិកម្ម និងការប្រមូលផលតាមដងទន្លេ ដើម្បីជួយប្រទេសនៅតាមតំបន់ដងទន្លេមេគង្គខាងក្រោម គ្រប់គ្រងហានិភ័យឱ្យកាន់តែមានប្រសិទ្ធភាព យើងអំពាវនាវដល់ប្រទេសចិន និងប្រទេសនៅតាមតំបន់ដងទន្លេមេគង្គខាងក្រោម ត្រូវចែករំលែកផែនការរំដោះទឹករបស់ពួកគេជាមួយយើង»។
ជាមួយគ្នានេះដែរ ប្រធានគ្រប់គ្រងបរិស្ថានរបស់លេខាធិការដ្ឋាន MRC លោក So Nam បានថ្លែងថា៖ «ដូចស្ថានភាពនៅឆ្នាំ ២០១៩ បាតុភូតទឹកពណ៌ខៀវបៃតង បច្ចុប្បន្ន ទំនងជារីករាលដាលលាតសន្ធឹងដល់ទឹកទន្លេមេគង្គកន្លែងផ្សេងៗទៀតដែលជាកន្លែងលំហូរទឹកទាប»។ បញ្ហានេះនឹងជះឥទ្ធិពលដល់ផលិតភាពជីវចម្រុះជលផល ការកាត់បន្ថយប្រមូលផលត្រី និងគំរាមកំហែងដល់ជីវភាពរស់នៅដល់សហគមន៍មូលដ្ឋាន។
ភ្នំពេញ ប៉ុស្តិ៍ មិនអាចសុំការអត្ថាធិប្បាយបន្ថែមពីលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានទេ កាលពីម្សិលមិញ ប៉ុន្តែលោកធ្លាប់បានថ្លែងក្នុងសន្និសីទសារព័ត៌មានកាលពីខែសីហា ឆ្នាំមុន ថា កត្តាដែលនាំឱ្យទឹកទន្លេមេគង្គ និងទឹកទន្លេសាបមានកម្រិតទាប គឺមានការពាក់ព័ន្ធយ៉ាងជិតស្និទ្ធទៅនឹងឥទ្ធិពលបាតុភូតអែលនីណូ ហើយបាតុភូតនេះបានធ្វើឱ្យមានការប៉ះពាល់ទៅនឹងរបបទឹកភ្លៀងមានតិច ដែលជាផ្នែកមួយធ្វើឱ្យទឹកទន្លេមេគង្គធ្លាក់ចុះ។
កាលពីខែតុលា ឆ្នាំមុន ក្រសួងធនធានទឹកចិនបានចុះកិច្ចព្រមព្រៀងមួយជាមួយ MRC ដោយបង្ហាញការប្ដេជ្ញាចិត្តក្នុងការចែករំលែកព័ត៌មានធារាសាស្ត្រជាមួយប្រទេសតាមដងទន្លេមេគង្គ ដើម្បីធានាបានថា ប្រទេសទាំងនោះអាចត្រៀមខ្លួនសម្រាប់គ្រោះទឹកជំនន់ និងគ្រោះរាំងស្ងួតចម្បង។
MRC ឱ្យដឹងដែរថា តាមការពិនិត្យមើលទឹកភ្លៀងប្រចាំខែរបស់ខ្លួន ចាប់តាំងពីខែវិច្ឆិកា ឆ្នាំ ២០២០ ជំនន់ទឹកភ្លៀងទាបជាមធ្យម ដោយបានធ្លាក់ចុះនៅត្រឹមកម្រិត ២៥ ភាគរយ។
សូមជម្រាបថា ទន្លេមេគង្គមានប្រវែងសរុបជាង ៤ ពាន់គីឡូម៉ែត្រ ដែលទន្លេនេះត្រូវបានគេចាត់ទុកថា ជាប្រភពសន្តិសុខស្បៀងដ៏សំខាន់ និងសេវាកម្មអេកូឡូស៊ីសម្បូរបែប សម្រាប់ប្រជាជនជិត ៧០ លាននាក់។
កាលពីដើមខែមករា ឆ្នាំ ២០២១ គណៈកម្មការទន្លេមេគង្គក៏បានចេញសេចក្តីថ្លែងការណ៍មួយ ដោយបង្ហាញការបារម្ភពីកម្រិតទឹកទន្លេមេគង្គធ្លាក់ចុះ ដោយសារតែការធ្លាក់ចុះនៃកម្រិតទឹកដែលបញ្ចេញនៅស្ថានីយវារីអគ្គិសនីជីងហុង ក្នុងខេត្តយូណាន ខណៈដែលប្រទេសចិន កំពុងជួសជុលប្រព័ន្ធខ្សែបណ្ដាញអគ្គិសនីពីថ្ងៃទី ៥ ដល់ ២៤ ខែមករា។
លោក ម៉ក់ ប៊ុនធឿន អ្នកសម្របសម្រួលគម្រោងសម្ព័ន្ធទន្លេកម្ពុជានៃវេទិកាអង្គការមិនមែនរដ្ឋាភិបាលស្តីពីកម្ពុជាបានប្រាប់ ភ្នំពេញ ប៉ុស្តិ៍ ថា ការធ្លាក់ចុះនៃកម្រិតទឹកទន្លេមេគង្គនេះ នឹងធ្វើឱ្យប៉ះពាល់ដល់វិស័យកសិកម្មនៅកម្ពុជាដែលទាមទារឱ្យរដ្ឋាភិបាលកម្ពុជាគួរយកចិត្តទុកដាក់ដោះស្រាយលើបញ្ហានេះ ដើម្បីផលប្រយោជន៍រួម។
លោកបានបញ្ជាក់ថា៖ «ផលប៉ះពាល់ទៅលើផ្នែកកសិកម្ម ព្រោះខ្មែរយើងភាគច្រើនធ្វើកសិកម្ម យើងមើលឃើញថា ប៉ុន្មានឆ្នាំចុងក្រោយកម្ពស់ទឹកទន្លេមេគង្គប្រែប្រួលខុសប្រក្រតីទាំងក្នុងរដូវវស្សា និងរដូវប្រាំង អ៊ីចឹងទាមទារឱ្យទាំងរដ្ឋាភិបាលកម្ពុជា និងរដ្ឋាភិបាលនៅក្នុងកម្រិតដងទន្លេត្រូវជជែកគ្នា ដើម្បីស្វែងរកដំណោះស្រាយសមស្របមួយ ដើម្បីកាត់បន្ថយផលប៉ះពាល់ដែលអាចនឹងកើតមាន»៕
វីដេអូ៖
