ភ្នំពេញៈ ក្រុមសម្ព័ន្ធអង្គការសង្គមស៊ីវិលប្រមាណ ៦៨អង្គការសមាគមសម្តែងការខកចិត្ត និងប្រកាន់ជំហរប្រារព្ធទិវាសិទិ្ធមនុស្ស១០ ធ្នូ លើកទី ៦៨ នៅទីលានប្រជាធិបតេយ្យ និងទីតាំងដែលបានគ្រោងទុកដែលនឹងមានអ្នកចូលរួមប្រមាណ ៥០០០ នាក់បើទោះបីសាលារាជធានីមិនអនុញ្ញាត ដោយពុំបានបញ្ជាក់ហេតុផលច្បាស់លាស់ក៏ដោយ។
ក្នុងលិខិតរបស់អង្គការសង្គមស៊ីវិលចុះថ្ងៃទី ៣១ ខែតុលា ដែលបានដាក់ជូនអភិបាលរាជធានី លោក ប៉ា សុជាតិវង្ស បានស្នើសុំប្រើប្រាស់ទីធ្លាសួនច្បារមុខវត្តបុទុមវតី ដើម្បីរៀបចំពិធីអបអរសាទរខួបលើកទី៦៨ នៃសេចក្តីប្រកាសជាសកលស្តីពីសិទ្ធិមនុស្ស នៅថ្ងៃទី១០ ខែធ្នូ ក្រោមប្រធានបទ«លើកកម្ពស់សិទ្ធិសេរីភាពបញ្ចេញមតិ និងការប្រជុំ»។
លិខិតបន្តថា៖«កម្មវិធីនេះ ក្រុមយើងខ្ញុំបានរៀបចំឱ្យមានការជួបជុំនៅទីលានប្រជាធិបតេយ្យ រួចហើយដើរក្បួនដោយសន្តិវិធីតាមផ្លូវ ១០៨ រួចបត់ស្តាំតាមផ្លូវ១៣ ដល់ផ្លូវ ១៧៨ បត់ឆ្វេងរហូតដល់ផ្លូវព្រះស៊ីសុវត្ថិ រួចហើយបត់ស្តាំតាមផ្លូវ ២៥៨ ហើយដើរទៅកាន់ទីប្រារព្ធពិធីនៅទីធ្លាសួនច្បារមុខវត្តបទុមវតី»។
ក្រុមអង្គការបញ្ជាក់ថា ការប្រារព្ធកម្មវិធីនេះដើម្បីបង្កើនការយល់ដឹង និងលើកស្ទួយការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។ បើតាមគម្រោងកម្មវិធីនេះនឹងចាប់ផ្តើមពីម៉ោង ៦ និង ៣០នាទីព្រឹកដល់ ម៉ោង ៥ ល្ងាច។
ក្នុងលិខិតឆ្លើយតបរបស់អភិបាលរងរាជធានី លោកឃួង ស្រេង ចុះថ្ងៃទី២៣ វិច្ឆិកា ឱ្យដឹងថា ចំពោះសំណើដែលបានស្នើសុំពុំអនុញ្ញាតឡើយ។ លិខិតបន្តថា៖«រដ្ឋបាលរាជធានីពុំអនុញ្ញាតជូនឡើយ ប៉ុន្តែលោក លោកស្រី អាចរៀបចំនៅទីតាំងឯកជន ឬទីស្នាក់ការរបស់ខ្លួនបាន»។
ក្នុងលិខិតសង្កត់ធ្ងន់ថា ក្នុងករណីមានការជួបជុំដង្ហែក្បួនតាមដងផ្លូវមួយចំនួនដែលបណ្តាលឱ្យប៉ះពាល់ដល់សន្តិសុខសុវត្ថិភាពសណ្តាប់ធ្នាប់សាធារណៈនោះ«លោក លោកស្រីត្រូវទទួលខុសត្រូវទាំងស្រុង ចំពោះមុខច្បាប់ជាធរមាន»។
យ៉ាងណាក៏ដោយ នៅក្នុងសេចក្តីប្រកាសព័ត៌មានរបស់អង្គការសង្គមស៊ីវិលចេញផ្សាយកាលពីម្សិលមិញ បានរក្សាជំហររបស់ខ្លួន ក្នុងការប្រារព្ធទិវាសិទ្ធិមនុស្សនៅថ្ងៃ១០ធ្នូ ទៅតាមទីតាំងដែលខ្លួនបានគ្រោងទុក។
សេចក្តីប្រកាសបន្តថា៖«ក្រុមសម្ព័ន្ធអង្គការសង្គមស៊ីវិល សូមបញ្ជាក់ជំហរថា ទោះបីសាលារាជធានីមិនអនុញ្ញាតក៏ដោយ ក៏ក្រុមសម្ព័ន្ធអង្គការសង្គមស៊ីវិល នៅតែប្រារព្ធនៅទីតាំងដែលបានគ្រោងទុកដូចរៀងរាល់ឆ្នាំ ស្របតាមរដ្ឋធម្មនុញ្ញមាត្រា ៤១ ប្រជាពលរដ្ឋមានសិទ្ធិសេរីភាពខាងការបញ្ចេញមតិរបស់ខ្លួន...»។
ក្នុងលិខិតក៏បានស្នើលោក ប៉ា សុជាតិវង្ស មេត្តាពិចារណាឡើងវិញ ដោយផ្តល់ទីតាំងដូចដែលបានស្នើសុំដល់អង្គការសង្គមស៊ីវិលដើម្បីអាចប្រារព្ធពិធីនេះដោយរលូន និងអធិកអធមស្របតាមច្បាប់រដ្ឋធម្មនុញ្ញ។
កាលពីឆ្នាំ ២០១៥ សាលារាជធានីក៏មិនអនុញ្ញាតឱ្យក្រុមអង្គការសង្គមស៊ីវិលហែក្បូនប្រារព្ធទិវាសិទ្ធិមនុស្សនេះដែរ។
តែអង្គការសង្គមស៊ីវិលនិងប្រជាពលរដ្ឋនៅតែប្រារព្ធពិធីនេះ ដោយក្រុមខ្លះ ហែចេញពី ព្រឹទ្ធសភា រោងកុនចេនឡា វត្តភ្នំ និងចេញពីទីលានប្រជាធិបតេយ្យ មកជួបជុំគ្នានៅក្បែរក្រសួងយុត្តិធម៌ ដើម្បីដាក់ញត្តិទាមទារឱ្យរដ្ឋាភិបាលគោរពសិទ្ធិមនុស្ស៕
