.jpg)
ប្រធាននិងមន្ត្រី គ.ជ.ប ផ្សព្វផ្សាយការចុះឈ្មោះ។ ហេង ជីវ័ន
ភ្នំពេញៈ មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ពលរដ្ឋ ហាក់មិនសូវអើពើនឹងការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៣ ដែលគ្រោងនឹងរៀបចំឡើងនៅថ្ងៃអាទិត្យ ទី ២៦ ខែ ឧសភា ឆ្នាំនេះ បើប្រៀបធៀបទៅនឹងការបោះឆ្នោតមុនៗ។
លោក នុត សុខុម អនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្លែងក្នុងកិច្ចប្រជុំស្តីពីការប្រកាសផ្សព្វផ្សាយប្រតិទិន នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០១៩ បានឲ្យដឹងថាក្នុងឆ្នាំ ២០១៩ នេះ គ.ជ.ប មានព្រឹត្ថិការណ៍សំខាន់ៗចំនួន ២ គឺការរៀបចំការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៣ និងផែនការចុះឈ្មោះអ្នកបោះឆ្នោតថ្មីសម្រាប់ឆ្នាំ ២០១៩។
លោក នុត សុខុម និយាយថា យោងតាមស្ថិតិប្រជាពលរដ្ឋប៉ាន់ស្មានឆ្នាំ ២០១៩ អ្នកដែលមានអាយុចាប់ពី ១៨ ឡើងមានចំនួន ១០ ១៧៨ ៨០៩ នាក់ ហើយ គ.ជ.ប មានផែនការចុះឈ្មោះអ្នកបោះឆ្នោតថ្មីចំនួន ៣៧២ ៦២៨ នាក់។
លោកបញ្ជាក់ថា៖ «ខ្ញុំសូមធ្វើការអំពាវនាវឲ្យពលរដ្ឋមេត្តាអញ្ជើញទៅចុះឈ្មោះបោះឆ្នោតចាប់ពីថ្ងៃទី ១ ដល់ថ្ងៃទី ២២ ខែ ឧសភា ឆ្នាំ ២០១៩ នៅតាមសាលាឃុំសង្កាត់ ឬទីតាំងមួយចំនួនដែលខ្លួនរស់នៅ»។
ការបោះឆ្នោតនេះនឹងមានអ្នកបោះឆ្នោត ១១ ៥៧២ នាក់ ដែលពួកគេជាប់ឆ្នោតជាក្រុមប្រឹក្សាឃុំសង្កាត់ នៅក្នុងការបោះឆ្នោតក្រុមប្រឹក្សាឃុំ-សង្កាត់ នាពេលកន្លងមក។ ពួកគេនឹងចូលរួមបោះឆ្នោតជ្រើសរើស សមាជិកក្រុមប្រឹក្សារាជធានី-ខេត្ត ចំនួន ៥៥៩ នាក់ និងសមាជិកក្រុមប្រឹក្សាក្រុង ស្រុក ខណ្ឌ ចំនួន ៣ ៥៥៥ នាក់។
លោក ហង្ស ពុទ្ធា អ្នកនាំពាក្យគ.ជ.ប ក៏ប្រកាសដែរថា ការិយាល័យបោះឆ្នោត ឆ្នាំ ២០១៩ មានចំនួន ២៣ ៣៦៤ ការិយាល័យ។
លោក សំ គន្ធាមី នាយកប្រតិបត្តិអង្គការនិកហ្វិច ដែលឃ្លាំមើលការបោះឆ្នោត ថ្លែងពីម្សិលមិញថា មានកត្តាជាច្រើនដែលនាំឲ្យប្រជាពលរដ្ឋ ហាក់មិនចាប់អារម្មណ៍នឹងដំណើរការបោះឆ្នោត និងការប្រកាសពីការចុះឈ្មោះបោះឆ្នោតក្នុងពេលនេះ ព្រោះអាចមកពី ការបោះឆ្នោតឆ្នាំនេះ ជាការបោះឆ្នោតអសកល ហើយម្យ៉ាងទៀត គណបក្សប្រឆាំងដ៏ធំបំផុតនៅកម្ពុជា ក៏ត្រូវបានរំលាយផងដែរ។
លោក គន្ធាមី នៅតែចង់ឲ្យពលរដ្ឋខ្មែរ ចូលរួមគ្រប់សកម្មភាពនៃការបោះឆ្នោត និងចូលរួមឃ្លាំមើលទាំងអស់គ្នា ដើម្បីឲ្យការបោះឆ្នោតនៅកម្ពុជា មានភាពល្អប្រសើរ ព្រោះមិនថា ការបោះឆ្នោតប្រភេទណាទេ គឺសុទ្ធតែរឿងសំខាន់សម្រាប់ជាតិ។
យោងតាម គ.ជ.ប ការបោះឆ្នោតអសកលជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៣ គឺមានគណបក្សនយោបាយ ចំនួន ៧ បានចុះឈ្មោះធ្វើការប្រកួតប្រជែង ហើយ ៧ គណបក្សនេះ ក៏បានដាក់បេក្ខជនសង្កេតការណ៍របស់ពួកគេផងដែរ ខណៈអង្គការសង្គមស៊ីវិលជាតិ និងអន្តរជាតិជិត ១០០ ស្ថាប័ន បានចុះឈ្មោះចូលរួមសង្កេតការណ៍៕
