The Phnom Penh Post Search

Search form

Logo of Phnom Penh Post newspaper Phnom Penh Post - NGOs អំពាវនាវ​ជា​ថ្មី​ឲ្យ​ដោះលែង​ មន្ត្រី​សិទ្ធិមនុស្ស និង គជប




NGOs អំពាវនាវ​ជា​ថ្មី​ឲ្យ​ដោះលែង​ មន្ត្រី​សិទ្ធិមនុស្ស និង គជប

Content image - Phnom Penh Post
លោក នី សុខា (ឆ្វេង) និង​លោក យី សុខសាន្ត​​ពេល​នាំ​ឡើង​តុលាការ។ ហេង ជីវ័ន

NGOs អំពាវនាវ​ជា​ថ្មី​ឲ្យ​ដោះលែង​ មន្ត្រី​សិទ្ធិមនុស្ស និង គជប

ភ្នំពេញៈ អង្គការ​សង្គម​ស៊ីវិល​កាលពី​ថ្ងៃ​សៅរ៍​បាន​អំពាវនាវ​ជាថ្មី​ម្តង​ទៀត​ឱ្យ​មាន​ការ​ដោះលែង​មន្ត្រី​សិទ្ធិ​មនុស្ស​ និង​អគ្គលេខាធិការរង​ គជប គឺ​ពីរ​ខែ​បន្ទាប់ពី​សេចក្ដី​សម្រេច​របស់​ក្រុម​ការងារ​នៃ​​អង្គការ​សហប្រជាជាតិ​ទទួល​បន្ទុក​តាមដាន​បញ្ហា​នៃ​ការ​ឃុំ​ខ្លួន​បាន​ហៅ​ការ​ឃុំ​ខ្លួន​នេះ​ថា​ជា​ការ​ឃុំ​ខ្លួន​តាម​ទំនើង​ចិត្ត។

កាលពី​ខែ​វិច្ឆិកា​ក្រុម​ការងារ​អង្គការ​សហប្រជាជាតិ​ទទួល​បន្ទុក​តាមដាន​បញ្ហា​ការ​ឃុំ​ខ្លួន​តាម​ទំនើង​ចិត្ត​ (WGAD) ​បាន​អំពាវនាវ​ឱ្យ​​ដោះលែង​ជា​បន្ទាន់​នូវ​មន្ត្រី​អាដហុក​ ៤ រូប​ និង​មន្ត្រី​ គជប ​មួយ​រូប​ បន្ទាប់ពី​បាន​កំណត់​ឃើញ​ថា​ការ​ចាប់​ខ្លួន​ពួកគេ​គឺ​រំលោភ​លើ​សិទ្ធិ​មនុស្ស​អន្តរជាតិ​សិទ្ធិ​នយោបាយ និង​អនុសញ្ញា​សិទ្ធិ​ពលរដ្ឋ​កម្ពុជា​ជា​ភាគី​ហត្ថលេខី​​ដែរ​នោះ​។

សេចក្តី​ថ្លែងការណ៍​រួម​របស់​អង្គការ​ចំនួន​ ២៥ ​កាលពី​ថ្ងៃ​សៅរ៍​បាន​បញ្ជាក់​ថា​រដ្ឋាភិបាល​ខកខាន​មិន​បាន​អនុវត្ត​តាម​សេចក្តី​សម្រេច​កាលពី​ខែ​វិច្ឆិកា​ទេ​ហើយ​ទទូច​ឲ្យ​ដោះលែង​អ្នក​ជាប់​ឃុំ​ទាំង​ ៥ ​នាក់​នោះ​ជា​បន្ទាន់​។

ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា​អ្នកស្រី​ ចក់ សុភាព ​បាន​ថ្លែង​ថា៖ «វា​ពិតជា​ខក​ចិត្ត​ខ្លាំង​ណាស់​ដែល​អាជ្ញាធរ​កម្ពុជា​មិន​បាន​ចាត់​វិធានការ​ដើម្បី​ដោះស្រាយ​ជា​បន្ទាន់​ពី​ករណី​រំលោភ​សិទ្ធិ​មនុស្ស​ដែល​បាន​កំណត់​ជា​សាធារណៈ​ និង​យ៉ាង​ច្បាស់​ដោយ​ក្រុម​ការងារ​អង្គការ​សហប្រជាជាតិ​ស្តីពី​ការ​ឃុំ​ខ្លួន​តាម​ទំនើង​ចិត្ត​កាលពី​ខែ​វិច្ឆិកា​»។

មន្ត្រី​ទាំង​ ៥ ​រូប​ដែល​ជាប់​ឃុំ​នោះ​រួម​មាន​មន្ត្រី​អង្គការ​ការពារ​សិទ្ធិ​មនុស្ស​អាដហុក​ ​លោកស្រី​ លឹម មុន្នី លោក នី សុខា លោក ណៃ វ៉ង់ដា និង​លោក យី សុខសាន្ត រួម​នឹង​អគ្គលេខាធិការរង គ.ជ.ប លោក នីចរិយា ដោយ​ពួកគេ​ត្រូវ​បាន​ចាប់​ខ្លួន​កាលពី​ខែ​មេសា​ឆ្នាំ ២០១៦ ពី​បទ​សូកប៉ាន់​សាក្សី​ពាក់ព័ន្ធ​នឹង​រឿង​អាស្រូវ​ស្នេហា​របស់​ប្រធាន​ស្ដីទី​គណបក្ស​សង្គ្រោះ​ជាតិ​លោក កឹម សុខា។

បន្ទាប់ពី​មាន​កិច្ចព្រមព្រៀង​នយោបាយ​មួយ​លោក កឹម សុខា ត្រូវ​បាន​ដោះ​លែង​ចេញ​ពី​ការ​លាក់​ខ្លួន​កាលពី​ដើម​ខែ​ធ្នូ​ហើយ​រដ្ឋមន្ត្រី​ក្រសួង​មហាផ្ទៃ​លោក​ ស ខេង​ បាន​ប្រកាស​ថា​អ្នក​ទាំង​ ៥ អាច​នឹង​ត្រូវ​បាន​ដោះលែង​មុន​ដំណាច់​ឆ្នាំ​មុន​ ប៉ុន្តែ​អ្នក​ជាប់​ឃុំ​ទាំង​ ៥ នាក់​នោះ​រហូត​មក​ទល់​ពេល​នេះ​គឺ​ស្ថិត​នៅ​ក្នុង​ពន្ធនាគារ​នៅ​ឡើយ​។

អ្នក​នាំពាក្យ​អង្គការ​អាដហុក​លោក សំ ច័ន្ទគា បាន​ថ្លែង​ថា៖ «សូម្បី​តែ​តុលាការ​គឺ​ស្ថិត​នៅ​ក្រោម​ការ​គ្រប់គ្រង​របស់​គណបក្ស​ប្រជាជន​កម្ពុជា។ ហេតុ​ដូច្នេះ​ហើយ​គណបក្ស​ប្រជាជន​កម្ពុជា​អាច​មាន​ផលប៉ះពាល់​ដល់​នីតិវិធី​របស់​តុលាការ​នៅ​កម្ពុជា»​៕​NS

អត្ថបទគួរចាប់អារម្មណ៍