.jpg)
ពិធីចុះហត្ថលេខាលើ MOU រវាងក្រសួងទេសចរណ៍ និងស្វ៊ីសខន់ថាក់ លើជំនាញអភិវឌ្ឍន៍ជំនាញ (SDC) ដំណាក់កាលទី២។ រូបថត ក្រសួងទេសចរណ៍
ភ្នំពេញៈ ទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) តាមរយៈអង្គការស្វ៊ីសខន់ថាក់នឹងបើកវគ្គបណ្ដុះបណ្ដាលជំនាញទេសចរណ៍ដល់យុវជន សិស្ស និស្សិត និងអ្នកបម្រើការនៅក្នុងវិស័យទេសចរណ៍ និងបដិសណ្ឋារកិច្ចនៅក្នុងខេត្តភាគឦសាន ៥ ដោយគ្រោងចំណាយថវិកាជាង ៩ លានដុល្លារ។
ក្រសួងទេសចរណ៍ និងអង្គការស្វ៊ីសខន់ថាក់ បានចុះអនុស្សរណៈយោគយល់គ្នា ១ កាលពីរសៀលថ្ងៃពុធ ដើម្បីផ្ដល់ការបណ្ដុះបណ្ដាលវិជ្ជាជីវៈហៅកាត់ថា TVET សម្រាប់វិស័យទេសចរណ៍ដល់យុវជន និស្សិត និងអ្នកបម្រើការក្នុងវិស័យទេសចរណ៍ និងបដិសណ្ឋារកិច្ចនៅខេត្តគោលដៅចំនួន ៥ រួមមាន ខេត្តក្រចេះ ស្ទឹងត្រែង រតនគិរី មណ្ឌលគិរី និងខេត្តព្រះវិហារ។ កម្មវិធីបណ្ដុះបណ្ដាលនេះស្ថិតក្នុងកម្មវិធីអភិវឌ្ឍន៍ជំនាញដំណាក់កាលទី ២ មានរយៈពេល ៤ ឆ្នាំចាប់ពីឆ្នាំ ២០២០ ដល់ឆ្នាំ ២០២៤។ នេះបើតាមក្រសួងទេសចរណ៍។
ការចុះហត្ថលេខាលើអនុស្សរណៈនេះបានធ្វើឡើងក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងលោកស្រី Naddia Ottiger នាយិការងទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ។
លោក ប៉ាក់ សុខុម រដ្ឋលេខាធិការក្រសួងទេសចរណ៍ថ្លែងថា គម្រោងអភិវឌ្ឍន៍ជំនាញដំណាក់កាលទី ២ នេះធ្វើឡើងចំពេលវេលា និងស្របតាមផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍របស់ក្រសួងទេសចរណ៍ ជាពិសេសលើការជំរុញការបណ្តុះបណ្តាលជំនាញថ្មី និងបន្ថែមក្នុងវិស័យទេសចរណ៍ បដិសណ្ឋារកិច្ច និងការធ្វើដំណើរ។
វគ្គនេះនឹងផ្ដល់ចំណេះដឹង និងជំនាញ និងដើម្បីជាច្រកសម្រាប់បន្តការសិក្សាជំនាញវិជ្ជាជីវៈទេសចរណ៍បន្ថែម និងពេញ ១ ជីវិត។ ក្រៅពីយុវជន និស្សិត និងអ្នកបម្រើការនៅក្នុងវិស័យទេសចរណ៍គម្រោងនេះក៏នឹងចូលរួមពង្រឹងសមត្ថភាពមន្ត្រីជំនាញរបស់ក្រសួងទេសចរណ៍ទាំងថ្នាក់ជាតិ និងថ្នាក់ក្រោមជាតិផងដែរ។
លោកថ្លែងថា៖ «សម្រាប់គម្រោងជំហានទី ២ ផ្តោតសំខាន់លើការអភិវឌ្ឍជំនាញថ្មី និងការអភិវឌ្ឍជំនាញបន្ថែមការជំរុញទីផ្សារការងារ ការពង្រឹងសហគ្រិនភាពក្នុងវិស័យទេសចរណ៍ និងការអនុវត្តបច្ចេកវិទ្យាក្នុងការអប់រំ និងបណ្តុះបណ្តាលស្របតាមផែនការយុទ្ធសាស្ត្ររបស់នាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍។
បើតាមសេចក្ដីប្រកាសព័ត៌មានរបស់ SDC យុវជនដែលងាយរងគ្រោះប្រមាណ ១២ ០០០ នាក់ រួមជាមួយបុគ្គលិកដែលមានជំនាញទាប និងគ្រូបណ្តុះបណ្តាល បុគ្គលិក និងគណៈគ្រប់គ្រងសាលា និងក្រុមហ៊ុនជាង ៩០០ នាក់នឹងទទួលបានអត្ថប្រយោជន៍ពីកម្មវិធីរយៈពេល ៤ ឆ្នាំនេះ។ ថវិកាដែលត្រូវចំណាយក្នុងកម្មវិធីបណ្ដុះបណ្ដាលនេះមាន ៨,៣ លាន ហ្វ្រង់ស្វ៊ីស ឬប្រមាណ ៩,១៤ លានដុល្លារ។
សេចក្ដីប្រកាសបន្តថា៖ «បុគ្គលិកដែលមានជំនាញទាបប្រមាណ ១ ៧៤០ នាក់ នឹងទទួលបានអត្ថប្រយោជន៍ពីកម្មវិធីបណ្តុះបណ្តាល។ ចំណែកម្ចាស់ ឬអ្នកគ្រប់គ្រងអាជីវកម្មផ្នែកបដិសណ្ឋារកិច្ច គ្រូបណ្តុះបណ្តាលនៅមន្ទីរទេសចរណ៍ខេត្ត គ្រូបណ្តុះបណ្តាល អ្នកវាយតម្លៃតាមសហគ្រាសប្រមាណ ១៧០ នាក់ក៏នឹងទទួលបានការពង្រឹងសមត្ថភាពផងដែរ»។
ក្រសួងទេសចរណ៍បញ្ជាក់ថា ក្នុងគម្រោងអភិវឌ្ឍន៍ជំនាញជំហានទី ១ ក្រសួងបានធ្វើការជាមួយទីភ្នាក់ងារ SDC នៅខេត្តក្រចេះ ស្ទឹងត្រែង និងព្រះវិហារ ដោយបានបណ្តុះបណ្តាលយុវជនលើជំនាញទេសចរណ៍ និងបដិសណ្ឋារកិច្ចក្នុងកម្មវិធីសិក្សាពេញម៉ោង ១៦០ រូប បណ្តុះបណ្តាលអ្នកធ្វើការក្នុងវិស័យទេសចរណ៍ ៣៨៩ រូប ប្រជាសហគមន៍ទេសចរណ៍ ៤៨០ រូប គ្រូបង្គោល និងអ្នកវាយតម្លៃគ្រូបង្គោលចំនួន ៩១ រូប ព្រមទាំងបានវាយតម្លៃអ្នកជំនាញទេសចរណ៍តាមរយៈយន្តការវាយតម្លៃការសិក្សាពីមុនចំនួន ១ ១៦៧ រូប៕
