.jpg)
សកម្មភាពដឹកជញ្ជូនទំនិញពីយន្តហោះនៅអាកាសយានដ្ឋានភ្នំពេញក្នុងខែមីនា។ ហុង មិនា
ភ្នំពេញៈ សន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ (UNCTAD) ព្រមទាំងគណៈកម្មការចំនួន ៥ ក្នុងតំបន់របស់អង្គការសហប្រជាជាតិរួមកម្លាំងគ្នាជួយប្រទេសកំពុងអភិវឌ្ឍន៍ដើម្បីដោះស្រាយបញ្ហាប្រឈមផ្នែកពាណិជ្ជកម្ម និងដឹកជញ្ជូនដែលកើតឡើងពីការរាលដាលដោយជំងឺកូវីដ១៩។
គណៈកម្មការសេដ្ឋកិច្ច និងសង្គមរបស់អង្គការសហប្រជាជាតិសម្រាប់អាស៊ី និងប៉ាស៊ីហ្វិក (UNESCAP) ថ្លែងក្នុងសេចក្តីប្រកាសព័ត៌មានកាលពីថ្ងៃទី ២៨ ឧសភាថាគម្រោងរួមថ្មីរបស់អង្គការសហប្រជាតិកំពុងស្វះស្វែងជួយរដ្ឋាភិបាល និងពាណិជ្ជកម្ម រក្សាបណ្តាញដឹកជញ្ជូន និងប្រតិបត្តិការព្រំដែន ហើយជួយសម្រួលលំហូរទំនិញ និងសេវាកម្ម ខណៈដែលខ្លួនកំពុងទប់ស្កាត់ការឆ្លងវីរុសកូរ៉ូណា។
សេចក្តីប្រកាសព័ត៌មានដដែលបញ្ជាក់ថា៖ «គម្រោងដែលបានចាប់ផ្តើមដំណើរការខែនេះនឹងអនុវត្តសេចក្តីសម្រេចរបស់អង្គការសហប្រជាជាតិ បទដ្ឋាន គោលការណ៍ណែនាំ ម៉ែត្រសាស្ត្រ ឧបករណ៍ និងវិធីសាស្ត្រ ដើម្បីជួយប្រទេសកំពុងអភិវឌ្ឍកសាងការងើបឡើងវិញផ្នែកដឹកជញ្ជូន ពាណិជ្ជកម្ម និងភ័ស្តុភារ បន្ទាប់ពីព្រឹតិ្តការណ៍កូវីដ១៩»។
គំនិតផ្តួចផ្តើមនេះត្រូវបានធ្វើឡើងដោយ UNCTAD និងគណៈកម្មការក្នុងតំបន់របស់អង្គការសហប្រជាជាតិទាំង ៥ ដែលមានអាហ្វ្រិក (ECA) អឺរ៉ុប (ECE) អាមេរិកឡាទីន និងការីប៊ីន (ECLAC) អាស៊ីប៉ាស៊ីហ្វិក (ESCAP) និងអាស៊ីខាងលិច (ESCWA)។
គម្រោងនេះមានវិសាលភាពក្នុងពិភពលោក និងក្នុងតំបន់ដោយមានកិច្ចសហប្រតិបត្តិការអន្តរជាតិ ការផ្លាស់ប្តូរនូវបទពិសោធល្អៗ និងចំណេះដឹងរវាងគ្នាទៅវិញទៅមកក្នុងពិភពលោក។
សេចក្តីប្រកាសព័ត៌មានឲ្យដឹងថា៖ «គម្រោងនេះ ស្វះស្វែងបំពាក់ឧបករណ៍ដល់រដ្ឋាភិបាលក្នុងប្រទេសកំពុងអភិវឌ្ឍន៍ និងប្រទេសអភិវឌ្ឍតិចបំផុត ដើម្បីសម្របខ្លួនទៅនឹងស្ថានភាពថ្មីក្រោយពីជំងឺកូវីដ១៩ ដោយប្រើប្រាស់ឯកទេស បទដ្ឋាន ឧបការណ៍ និងគោលការណ៍ណែនាំរបស់អង្គការសហប្រជាជាតិ ខណៈដែលកំពុងពិចារណាស្ថានភាពជាក់លាក់ក្នុងតំបន់របស់ពួកគេ»។
អគ្គនាយកនៃអគ្គនាយកដ្ឋានដឹកជញ្ជូនផ្លូវគោកលោក ឈួន វ៉ន់ ប្រាប់ភ្នំពេញប៉ុស្តិ៍កាលពីថ្ងៃទី ២៨ ខែឧសភា ថាប្រសិនបើអង្គការសហប្រជាជាតិចង់ជំរុញការដឹកជញ្ជូន លោកស្វាគមន៍គំនិតនេះ ដើម្បីទទួលយកគម្រោងផ្សេងៗជាប្រទេសកំពុងអភិវឌ្ឍន៍មួយក្នុងចំណោមប្រទេសកំពុងអភិវឌ្ឍន៍នានា។ ស្ថានភាពដឹកជញ្ជូនបច្ចុប្បន្នក្នុងព្រះរាជាណាចក្រកម្ពុជានៅមានកម្រិតនៅឡើយ ចំពេលការរាលដាលកូវីដ ១៩។ ការដឹកជញ្ជូនឆ្លងកាត់នៅតាមព្រំដែនបានបើកសម្រាប់ការដោះដូរទំនិញតែប៉ុណ្ណោះ ខណៈដែលការដឹកជញ្ជូនអ្នកដំណើរមិនត្រូវបានអនុញ្ញាត។
លោកថ្លែងថា៖ «ដូចនេះ ស្ថានភាពដឹកជញ្ជូនអាចមានការធ្លាក់ចុះបន្តិច។ ប្រសិនបើ វិស័យផ្សេងៗបានបើកឡើងវិញ នោះវិស័យដឹកជញ្ជូននឹងងើបឡើងវិញដោយស្វ័យប្រវត្តិ។ ក្រសួងរបស់យើងតែងលើកទឹកចិត្ត និងស្វាគមន៍កិច្ចសហប្រតិបត្តិការ ប្រសិនបើក្រុមហ៊ុន ឬទីភ្នាក់ងារណាមួយចង់អភិវឌ្ឍវិស័យដឹកជញ្ជូន ដើម្បីឲ្យវិស័យដឹកជញ្ជូនបានប្រសើរ»។
អ្នកសម្របសម្រួលអង្គការសហប្រជាជាតិលោកស្រី ប៉ូលីន ថាមេស៊ីសថ្លែងក្នុងកិច្ចប្រជុំនៃអន្តរក្រសួងដើម្បីទប់ស្កាត់ជំងឺកូវីដ ១៩ ជាមួយក្រុមប្រទេសអង្គការសហប្រជាជាតិកាលពីថ្ងៃទី ៣០ ខែមេសា ថាដូចប្រទេសជាច្រើនជុំវិញពិភពលោក រដ្ឋាភិបាលកម្ពុជាប្រឈមមុខនឹងបញ្ហាប្រឈមដ៏ស្មុគស្មាញ នៅពេលឆ្លើយតបទៅនឹងផលប៉ះពាល់នៃជំងឺកូវីដ ១៩។ មិនគ្រាន់តែប៉ះពាល់ដល់សុខភាពប៉ុណ្ណោះទេ ថែមទាំងប៉ះពាល់ដល់វិស័យផ្សេងៗដូចជា ការអប់រំ ទេសចរណ៍ ពាណិជ្ជកម្ម ហិរញ្ញវត្ថុ និងឧស្សាហកម្ម។
លោកស្រីបានថ្លែងថា៖ «ហើយទោះបីមិនទាន់ផ្ទុះជំងឺធំក្នុងប្រទេសកម្ពុជាក៏ដោយ ក៏ការធ្លាក់ចុះសេដ្ឋកិច្ចខាងក្រៅកំពុងប៉ះពាល់សេដ្ឋកិច្ចជាតិរួចជាស្រេច។ វិស័យនាំមុខគឺវាយនភ័ណ្ឌ ទេសចរណ៍ និងសំណង់ កំពុងស្ថិតក្រោមសម្ពាធធ្ងន់ដែលបណ្តាលឲ្យមានទិន្នផលកាន់តែទាប និងការបញ្ឈប់បុគ្គលិកច្រើន ហើយនឹងមានផលប៉ះពាល់ប្រយោលលើវិស័យផ្សេងៗផងដែរ។ ប្រទេសកម្ពុជាត្រូវប្រឈមនឹងសេដ្ឋកិច្ចពាណិជ្ជកម្មបើកចំហខ្លាំង តែក៏ជាប្រទេសមួយមានមូលដ្ឋានសេដ្ឋកិច្ចចង្អៀតជាមួយជម្រើសផ្សេងមួយចំនួន»៕
