ភ្នំពេញៈ អង្គការសហប្រជាជាតិប្រចាំកម្ពុជា និងដៃគូផ្ដល់ជំនួយសប្បុរសធម៌ផ្សេងទៀតបានកំពុងចាប់ផ្ដើមដំណើរការផែនការឆ្លើយតបគ្រោះទឹកជំនន់ឆ្នាំ ២០២០ ដោយគ្រោងរៃអង្គាសថវិកាឱ្យបានជាង ៩ លានដុល្លារដើម្បីយកមកជួយពលរដ្ឋ ២៣ ម៉ឺន ៧ ពាន់នាក់ ដែលរងគ្រោះដោយសារទឹកជំនន់។
បើតាមឯកសារដែលការិយាល័យអង្គការសហប្រជាជាតិសម្រាប់កិច្ចការសម្របសម្រួល និងមនុស្សធម៌ហៅកាត់ OCHA បានផ្សព្វផ្សាយនៅលើគេហទំព័ររបស់ខ្លួនកាលពីសប្ដាហ៍មុន ពលរដ្ឋកម្ពុជា ៨០ ម៉ឺននាក់នៅក្នុងខេត្តចំនួន ១៩ បានរងការប៉ះពាល់ពីគ្រោះទឹកជំនន់ បណ្ដាលមកពីទឹកភ្លៀងកាលពីខែតុលាដែលក្នុងចំនួននេះ មនុស្សជិត ៣៩ ម៉ឺននាក់កំពុងត្រូវការជំនួយ។ ប៉ុន្តែផែនការឆ្លើយតបដែលកំពុងចាប់ផ្ដើមនេះសំដៅលើតែជនរងគ្រោះ ២៣ ម៉ឺន ៧ ពាន់នាក់ប៉ុណ្ណោះ ដោយត្រូវការថវិកាសរុប ៩,៤៣ លានដុល្លារ។
បើតាមឯកសារដដែលនៅពេលប្រមូលបានគ្រប់គ្រាន់ ថវិកានេះនឹងត្រូវប្រើប្រាស់ជាជំនួយសង្គ្រោះជីវិត និងគាំពារពលរដ្ឋដែលរងគ្រោះពីព្យុះ ទឹកជំនន់ និងការផ្ដល់ជាសេវាមូលដ្ឋាននានា។ ថវិកានេះនឹងប្រើប្រាស់ក្នុងរូបភាពជាជំនួយសម្រាប់វិស័យចម្រុះដែលជួយដល់ក្រុមងាយរងគ្រោះរួមមានអ្នកបាត់បង់ទីជម្រក កុមារងាយរងគ្រោះ និងក្រុមផ្សេងទៀត។
លើសពីនេះទៀត ថវិកានេះក៏នឹងប្រើសម្រាប់គាំទ្រដល់ការស្ដារជីវភាព និងការពឹងអាស្រ័យលើខ្លួនឯងឡើងវិញ។ វាក៏នឹងប្រើជាជំនួយក្នុងលក្ខណៈមួយ ដែលចូលរួមបញ្ចៀសនូវហានិភ័យជំងឺកូវីដ១៩ក្នុងចំណោមអ្នករងគ្រោះពីគ្រោះធម្មជាតិ។
នៅក្នុងខែតុលាកម្ពុជាទទួលរងនូវឥទ្ធិពលព្យុះមួយចំនួន និងគ្រោះទឹកជំនន់ដែលបណ្ដាលឱ្យមនុស្ស ៤២ នាក់បាត់បង់ជីវិត។ មនុស្សជាង ២ លាននាក់រងផលប៉ះពាល់ពីទឹកជំនន់ប៉ុន្តែ ៨០ ម៉ឺននាក់បានរងផលប៉ះពាល់ដោយផ្ទាល់។ ក្នុងចំណោមអ្នករងគ្រោះមាន ៣៨ ម៉ឺន ៨ ពាន់នាក់ គឺជាអ្នកងាយរងគ្រោះដោយសារពួកគេគឺជាអ្នកដែលត្រូវបានកំណត់ថាជាអ្នកក្រីក្រ (IDpoor)។ លើសពីនេះ គ្រោះមហន្តរាយនេះក៏ធ្វើឱ្យប៉ះពាល់ដល់ផ្ទះជាង ១៦ ម៉ឺនខ្នង។ នេះបើតាម OCHA ដែលបានស្រង់ទិន្នន័យពីរដ្ឋាភិបាលកម្ពុជា។
លោកស្រី Pauline Tamesis អ្នកសម្របសម្រួលអង្គការសហប្រជាជាតិប្រចាំកម្ពុជា បានថ្លែងប្រាប់តាមអ៊ីមែលថា អង្គការសហប្រជាជាតិ និងដៃគូ ក៏បានផ្ដល់ជំនួយដល់ពលរដ្ឋដែលរងគ្រោះដែរ ជាមួយនឹងរដ្ឋាភិបាល។ ផែនការឆ្លើយតបថ្មីនេះគឺដើម្បីកំណត់អាទិភាពដែលអង្គការនានាក្រោមឆត្រអង្គការសហប្រជាជាតិ អង្គការមិនមែនរដ្ឋាភិបាលកាកបាទក្រហមនឹងអនុវត្ត ដើម្បីបំពេញបន្ថែមលើអ្វីដែលរដ្ឋាភិបាលបានឆ្លើយតប។
«សកម្មភាពដែលដាក់ចេញក្នុងផែនការនេះត្រូវបានផ្ដល់អាទិភាពដោយប្រុងប្រយ័ត្នដើម្បីធានាថា សកម្មភាពទាំងនោះនឹងជួយដល់ជីវិតអ្នកដែលងាយរងគ្រោះបំផុតដែលរងគ្រោះពីទឹកជំនន់។ ជំនួយទាំងនេះរួមមានការឆ្លើយតបទៅនឹងសេចក្ដីត្រូវការផ្នែកមនុស្សធម៌បន្ទាន់ ក៏ដូចជាសកម្មភាពស្ដារឡើងវិញឱ្យបានឆាប់រហ័សដើម្បីជួយឱ្យពួកគេឱ្យវិលទៅរកស្ថានភាពធម្មតាវិញ»។
ក្រៅពីគ្រោះទឹកជំនន់នៅតាមតំបន់មួយចំនួនកម្ពុជាក៏រងគ្រោះដោយសារភាពរាំងស្ងួតដែរ។ គ្រោះទឹកជំនន់ និងគ្រោះរាំងស្ងួតបានបង្កផលប៉ះពាល់លើផ្ទៃដីផលិតកម្មស្រូវជាង ៣១ ម៉ឺនហិកតា ប៉ុន្តែបានធ្វើឱ្យខូចខាតតែជាង ១២ ម៉ឺនហិកតាប៉ុណ្ណោះ។
ឆ្លើយតបនឹងគ្រោះមហន្តរាយនេះ រាជរដ្ឋាភិបាលបានចែកពូជស្រូវជាង ៦៤៣៤ តោនដល់ពលរដ្ឋរងគ្រោះក្នុងខេត្តចំនួន ១៩ និងពូជបន្លែជាច្រើនប្រភេទទៀត។ នេះបើតាមសារាចរណែនាំរបស់ក្រសួងកសិកម្មដែលផ្សព្វផ្សាយកាលពីថ្ងៃ ១៣ វិច្ឆិកា៕