.jpg)
អ្នកជាប់ទោសត្រូវបានដឹកចេញពីសាលាដំបូងរាជធានីភ្នំពេញ ទៅពន្ធនាគារកាលពីឆ្នាំមុន។ ហេង ជីវ័ន
ភ្នំពេញៈ អង្គការសហប្រជាជាតិ (UN) និងដៃគូមនុស្សធម៌កំពុងសម្របសម្រួល ដើម្បីផ្តល់ជំនួយមនុស្សធម៌ជាបន្ទាន់ដល់អគ្គនាយកដ្ឋានពន្ធនាគារ ដើម្បីកាត់បន្ថយហានិភ័យ និងទប់ស្កាត់ការរាលដាលនៃជំងឺកូវីដ ១៩ បន្ទាប់ពីមានករណីឆ្លងជំងឺកូវីដក្នុងសហគមន៍ ២០ កុម្ភៈ ដល់ជនជាប់ឃុំនៅក្នុងពន្ធនាគារខេត្ដព្រះសីហនុចំនួន ៣៤ នាក់កាលពីថ្ងៃទី ៨ ឧសភា។
លោកស្រី Pauline Tamesis អ្នកសម្របសម្រួលអង្គការសហប្រជាជាតិនៅកម្ពុជា បានថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ១៩ ខែឧសភាថា ចាប់តាំងពីការចាប់ផ្តើមនៃការឆ្លងរីករាលដាលជំងឺកូវីដ១៩នៅក្នុងប្រទេសកម្ពុជាកាលពីដើមឆ្នាំមុនមកអង្គការសហប្រជាជាតិនៅកម្ពុជាបានធ្វើការតស៊ូមតិជាប្រចាំ ដើម្បីឱ្យមានការផ្លាស់ប្តូរគោលនយោបាយ និងច្បាប់ជាពិសេសអំពាវនាវឱ្យមានការដោះលែងទ្រង់ទ្រាយធំ និងការប្រើវិធីជំនួសក្នុងការឃុំខ្លួនជាពិសេសចំពោះជនល្មើសដែលមានទោសកម្រិតទាប និងអ្នកទោសងាយរងគ្រោះ។
លោកស្រីថ្លែងថា៖ «តាមរយៈការឆ្លងរីករាលដាលជំងឺកូវីដ ១៩ នៅក្នុងពន្ធនាគារខេត្តព្រះសីហនុ UN បានសហការជាមួយអាជ្ញាធរពន្ធនាគារ និងដៃគូមនុស្សធម៌ ដើម្បីវាយតម្លៃលើស្ថានភាពនៅទីនោះ។ អង្គការសហប្រជាជាតិនឹងផ្តល់ការគាំទ្រដល់អ្នកទោស ដែលរងផលប៉ះពាល់ និងការត្រៀមបង្ការដើម្បីការពារចំពោះការផ្ទុកមេរោគកូវីដ ១៩ នៅក្នុងពន្ធនាគារ»។
UN នៅកម្ពុជានឹងបរិច្ចាគនូវសម្លៀកបំពាក់សម្រាប់ពាក់ការពារជំងឺកូវីដ ១៩ របាំងមុខ ម៉ាស់ពាក់ការពារមុខ និងស្រោមដៃ ស្បែកជើងកវែង ឧបករណ៍ធ្វើតេស្តរហ័ស និងថ្នាំវីតាមីនដល់ជនជាប់ឃុំដែលរងគ្រោះ និងបុគ្គលិកពន្ធនាគារ ដែលរងផលប៉ះពាល់តាមការស្នើសុំរបស់អគ្គនាយកដ្ឋានពន្ធនាគារ។
លោកស្រីបន្តថា អង្គការសហប្រជាជាតិនៅកម្ពុជាមានឆន្ទៈក្នុងការទទួលបានព័ត៌មានថ្មីៗជាប្រចាំពីអាជ្ញាធរ និងអ្នកពាក់ព័ន្ធអំពីស្ថានភាពនៅក្នុងពន្ធនាគារ ទាក់ទងនឹងការផ្ទុះឡើងនៃជំងឺកូវីដ១៩ ដើម្បីជាការបង្ការការផ្ទុះឡើងកាន់តែធំនៅក្នុងពន្ធនាគារកម្ពុជា។
លោកស្រីបញ្ជាក់ថា៖ «យើងលើកទឹកចិត្តដល់អាជ្ញាធរពន្ធនាគារ និងសុខាភិបាលឱ្យបន្តការពិភាក្សាជាទៀងទាត់តាមរយៈក្រុមការងារអន្តរក្រសួងស្តីពីសុខភាពក្នុងពន្ធនាគារដែលបង្កើតឡើងដោយក្រសួងមហាផ្ទៃ និងក្រសួងសុខាភិបាល ដើម្បីធានាបាននូវការទំនាក់ទំនងការសម្របសម្រួល និងការអនុវត្តនីតិវិធី និងផែនការដែលអាចអនុវត្តបានគ្រប់គ្រាន់»។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃប្រាប់ ភ្នំពេញ ប៉ុស្តិ៍ នៅថ្ងៃទី ១៩ ឧសភាថា សម្ភារចាំបាច់ដែលអគ្គនាយកដ្ឋានពន្ធនាគារបានដាក់ស្នើទៅ UN រួមមានសម្ភារសម្រាប់ប្រើប្រាស់ដែលត្រូវប៉ះពាល់ផ្ទាល់ជាមួយអ្នកដែលមានជំងឺកូវីដ១៩ ដូចជាឯកសណ្ឋាន សម្រាប់ពាក់ការពារពេលជួបជាមួយអ្នកជំងឺកូវីដ ១៩ និងជាពិសេស គឺឧបករណ៍តេស្តរហ័សរកមេរោគកូវីដ ១៩ (Rapid Antigen Test COVID-19) និងថ្នាំសម្រាប់ព្យាបាល។
លោកបានថ្លែងថា សម្ភារ ៣ មុខនេះ គឺជាវត្ថុចាំបាច់ដែលខាងពន្ធនាគារត្រូវការ។ ក្រៅពីនេះក៏បានស្នើសុំសម្ភារបន្ទាប់បន្សំបន្ថែមទៀត ដូចជាសម្ភារអនាម័យជាដើម។
លោកបានបញ្ជាក់ថា៖ «គាត់ (UN) បានឆ្លើយតបមកយើងវិញថា គាត់នឹងជួយ។ យើងបានដាក់តារាង អំពីសម្ភារចាំបាច់ជូនទៅគាត់ហើយ រួមជាមួយនឹងគោលដៅដែលត្រូវចែកចាយ គឺយើងបានធ្វើការជាមួយគាត់ហើយ»។
លោកបញ្ជាក់ថា៖ «ខាង UN គាត់មានភ្នាក់ងារមួយចំនួន ដែលកំពុងធ្វើការងារនេះជាមួយយើង គ្រាន់តែថា សម្ភារទាំងនេះមកដល់ពេលណានោះគឺអាចប្រហែលជាមកដល់ក្នុងសប្ដាហ៍ក្រោយ»។
បើតាមលោក សវនា ចំពោះស្ថានភាពជនជាប់ឃុំដែលវិជ្ជមានជំងឺកូវីដ១៩ គឺគ្មានបញ្ហាអ្វីទេ ពួកគាត់កំពុងតែសម្រាកព្យាបាលដោយក្រុមការងារជំនាញ បានតាមដានសុខភាពពួកគាត់ជាប្រចាំ។
បើតាមលោក សវនា បច្ចុប្បន្នមិនមានជនជាប់ឃុំណាម្នាក់នៅក្នុងពន្ធនាគារ ខេត្ដព្រះសីហនុមានឆ្លងជំងឺកូវីដ ១៩ ទៀតនោះទេ ក្រោយពីរកឃើញជនជាប់ឃុំចំនួន ៣៤ នាក់ វិជ្ជមានកូវីដកាលពីថ្ងៃទី ៨ ខែឧសភា កន្លងទៅ។ ចំពោះជនជាប់ឃុំដែលពាក់ព័ន្ធផ្សេងទៀត នឹងត្រូវធ្វើតេស្ដលើកទី២ នៅថ្ងៃទី ២៣ ខែឧសភា៕
វីដេអូ៖
