.jpg)
កិច្ចប្រជុំរវាងមន្ត្រីកម្ពុជា និងក្រុមទីភ្នាក់ងារអង្គការសហប្រជាជាតិ។ រូបថត ហុង មិនា
ភ្នំពេញៈ អង្គការសហប្រជាជាតិប្រកាសជំហរគាំទ្រជិតស្និទ្ធដល់រដ្ឋាភិបាលកម្ពុជាក្នុងការពង្រីករបៀបវារៈនៃកិច្ចគាំពារសង្គម ដើម្បីការពារក្រុមងាយរងគ្រោះដូចជាកម្មករក្នុងវិស័យក្រៅប្រព័ន្ធ និងពលករចំណាកស្រុកដែលធ្វើមាតុភូមិនិវត្តន៍ក្នុងអំឡុងពេលដែលកម្ពុជាកំពុងជួបវិបត្តិនៃការរាតត្បាតដោយសារជំងឺកូវីដ ១៩។
កាលពីម្សិលមិញលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារអន្តរក្រសួងប្រយុទ្ធនឹងជំងឺកូវីដ១៩ បានដឹកនាំកិច្ចពិភាក្សាជាមួយអង្គការដៃគូនានាជាង ២០ ដែលស្ថិតក្នុងចង្កោមអង្គការសហប្រជាជាតិ (UN) នាទីស្តីការក្រសួងមហាផ្ទៃ។
លោកស្រី Pauline Tamesis អ្នកសម្របសម្រួលអង្គការសហប្រជាជាតិនៅកម្ពុជាបានថ្លែងក្នុងឱកាសនោះថា ការរាតត្បាតនៃជំងឺនេះកំពុងពង្រីកវិសមភាពដែលធ្វើឲ្យប៉ះពាល់ដល់សង្គម និងសេដ្ឋកិច្ចហើយរឹតតែបង្កើនផលប៉ះពាល់ខ្លាំងទៅដល់ក្រុមងាយរងគ្រោះដូចជាស្ត្រី កុមារ យុវជន មនុស្សចាស់ កម្មករ នៅក្នុងវិស័យសេដ្ឋកិច្ចក្រៅប្រព័ន្ធស្របពេលដែលពួកគេទាំងនោះ រកប្រាក់កម្រៃបានទាបស្រាប់ទៅហើយ។
លោកស្រីបញ្ជាក់ថា៖ «ខ្ញុំសូមកោតសរសើររាជរដ្ឋាភិបាលដែលបានចាត់វិធានការសារពើពន្ធជាកញ្ចប់ឧបត្ថម្ភទំហំធំដែលបង្ហាញនូវការពង្រីកការចំណាយយ៉ាងច្រើនលើកិច្ចគាំពារសង្គម។ អ.ស.ប រំពឹងថានឹងធ្វើការជិតស្និទ្ធជាមួយរដ្ឋាភិបាលក្នុងការពង្រីករបៀបវារៈនេះ ដើម្បីការពារក្រុមពលរដ្ឋងាយរងគ្រោះផ្សេងៗទៀតដូចជាកម្មករក្នុងវិស័យក្រៅប្រព័ន្ធ និងពលករចំណាកស្រុកដែលធ្វើមាតុភូមិនិវត្តន៍»។
វិធានការគាំពារសុខភាព និងការគាំពារសង្គមក្នុងប្រទេសដទៃបានបង្ហាញថា មានសារៈសំខាន់ជាសារវន្តមិនត្រឹមតែក្នុងកាលៈទេសៈទប់ទល់ចំពោះវីរុស និងផ្តល់សន្តិសុខលើប្រាក់ចំណូលសម្រាប់ក្រុមមនុស្សដែលងាយរងផលប៉ះពាល់ខ្លាំងជាងគេប៉ុណ្ណោះទេ ប៉ុន្តែក៏ជួយធានាថា សេដ្ឋកិច្ចអាចនឹងធន់ទ្រាំចំពោះវិបត្តិក្នុងពេលបច្ចុប្បន្ន និងក្នុងពេលអនាគតផងដែរ។ នេះបើតាមការអះអាងរបស់លោកស្រី Pauline Tamesis។
លោកស្រីបន្ថែមថា វិធានការសារពើពន្ធទាំងនេះបើត្រូវបានរៀបចំឡើងគឺជាការវិនិយោគក្នុងការផ្លាស់ប្តូរប្រព័ន្ធសម្រាប់ការអភិវឌ្ឍរយៈពេលវែង និងជាការឆ្លើយតបជាបន្ទាន់ដែលជួយឲ្យរាជរដ្ឋាភិបាលដោះស្រាយបានល្អប្រសើរនូវបញ្ហាប្រឈមផ្សេងៗ។ បើទោះជាកម្ពុជាពុំទាន់ឃើញសញ្ញាច្បាស់លាស់អំពីការឆ្លងក្នុងសហគមន៍ក៏ដោយក៏ស្ថានភាពនេះអាចប្រែប្រួលយ៉ាងឆាប់រហ័ស ដែលតម្រូវឲ្យកម្ពុជាត្រៀមខ្លួនជាស្រេច និងបន្ស៊ាំការឆ្លើយតបទៅតាមស្ថានភាពនូវការគំរាមកំហែងនៃការឆ្លងឆាប់រហ័សទូទាំងសហគមន៍ ខណៈដែលមិនដឹងថា ការរាតត្បាតនេះនឹងបញ្ចប់នៅពេលណា។
ដូច្នេះស្របពេលដែលហានិភ័យនេះមិនទាន់ចប់នៅឡើយ លោកស្រី Tamesis ចង់ឲ្យកម្ពុជាត្រូវបន្តត្រៀមខ្លួន និងកែលម្អវិធីដែលអាចឆ្លើយតបនឹងជំងឺកូវីដ ១៩ ដើម្បីអាចបញ្ឈប់ ឬពន្យឺតការឆ្លងវីរុសនេះរួមទាំងអាចកាត់បន្ថយឲ្យនៅកម្រិតអប្បបរមានូវផលប៉ះពាល់ខាងសុខភាព សង្គម និងសេដ្ឋកិច្ច។
លោកស្រីបញ្ជាក់ថា៖ «យើងសង្ឃឹមថា អ្វីៗនឹងល្អឡើងវិញ ប៉ុន្តែត្រូវត្រៀមសម្រាប់ករណីធ្ងន់ធ្ងរ។ លើសពីនេះផលលំបាកខាងសង្គម និងសេដ្ឋកិច្ច ជាពិសេសការកើនឡើងនៃភាពគ្មានការងារធ្វើ និងភាពក្រីក្រទំនងជាកាន់តែធ្ងន់ធ្ងរឡើង ដោយសារតែរបាយប្រាក់ចំណូលនៅកម្ពុជា ឃើញថាប្រជាជនជាច្រើនរស់នៅជិតបន្ទាត់នៃភាពក្រីក្រ។ ស្ថានភាពនេះក៏កាន់តែមានការលំបាកថែមទៀត ដោយសារតែប្រព័ន្ធគាំពារសង្គមរបស់កម្ពុជាទើបតែចាប់ផ្តើមវិវត្ត និងលូតលាស់»។
លោក ម៉ម ប៊ុនហេង បានសាទរចំពោះអង្គការសហប្រជាជាតិដែលបានចូលរួម និងសហការគ្នាយ៉ាងស្អិតល្មួតក្នុងការបង្ការ ទប់ស្កាត់ និងឆ្លើយតប ព្រមទាំងការកាត់បន្ថយផលប៉ះពាល់នានាដែលកើតមានឡើងពីការរាតត្បាតជាសកលនៃជំងឺនេះ។ លោកថា កម្ពុជាបានត្រៀមខ្លួនរួចជាស្រេចចំពោះការរាតត្បាតនៅក្នុងសហគមន៍ដែលអាចកើតមានឡើងជាយថាហេតុ។
លោកបញ្ជាក់ថា៖ «ទោះបីជាស្ថានភាពជំងឺកូវីដ១៩នៅប្រទេសកម្ពុជាមានលក្ខណៈធូរស្បើយខ្លះហើយក៏ដោយ ក៏រាជដ្ឋាភិបាលនៅតែបន្តរក្សានូវវិធានការជាច្រើនដែលកំពុងអនុវត្តប្រកបដោយភាពម៉ឺងម៉ាត់ និងហ្មត់ចត់បំផុត ដើម្បីទប់ស្កាត់ការរីករាលដាលជាថ្មីម្តងទៀត»។
ដើម្បីទប់ស្កាត់ផលប៉ះពាល់ពីជំងឺកូវីដ ១៩ រដ្ឋាភិបាលបានផ្តល់កញ្ចប់ថវិកាចំនួន ៣០ លានដុល្លារ ដល់មូលនិធិសង្គ្រោះបន្ទាន់របស់ក្រសួងសុខាភិបាលហើយបន្ថែមពីនេះ រដ្ឋាភិបាលក៏បានត្រៀមថវិកាចន្លោះពី ៨០០ លានដល់ទៅ ២ ពាន់លានដុល្លារអាមេរិក ដើម្បីសង្គ្រោះសេដ្ឋកិច្ចកម្ពុជាដែលរងផលប៉ះពាល់ដោយសារតែការរីករាលដាលនៃជំងឺកូវីដ-១៩ក្នុងពេលខាងមុខ។ នេះបើតាមលោក ម៉ម ប៊ុនហេង៕
