.jpg)
ភ្នំពេញៈ គណៈកម្មាធិការអង្គការសហប្រជាជាតិ (UN) ស្តីពីការលុបបំបាត់ការរើសអើងលើស្ត្រី នៅតែសម្តែងការព្រួយបារម្ភពីអំពើហិង្សាក្នុងគ្រួសារ ឬ ការផ្សះផ្សាក្រៅផ្លូវតុលាការ ការលើកកម្ពស់បុរសជាងស្ត្រី និងបញ្ហាស្ត្រីត្រូវបានចាប់ខ្លួនពាក់ព័ន្ធនឹងការពពោះជំនួស ទោះបីកម្ពុជាបានបង្កើតផែនការ និងគោលនយោបាយ ដើម្បីលើកកម្ពស់ភាពស្មើគ្នារវាងស្ត្រី និងបុរស និងការប្រឆាំងអំពើហិង្សាលើស្ត្រីក៏ដោយ។
ក្នុងការចេញផ្សាយនូវសេចក្តីប្រកាសព័ត៌មានកាលពីថ្ងៃទី ១១ ខែវិច្ឆិកា គឺជាលទ្ធផលនៃការរកឃើញរបស់ខ្លួនស្តីពីស្ថានភាពសិទ្ធិស្ត្រីនៅប្រទេសកម្ពុជា ហើយដែលធ្វើឱ្យគណៈកម្មាធិការអង្គការ សហប្រជាជាតិស្ដីពីការលុបបំបាត់ ការរើសអើងលើស្ដ្រីមានការព្រួយបារម្ភ។ ស្ថាប័នអន្តរជាតិមួយនេះបានត្រួតពិនិត្យលើសេចក្តីប្រកាសព័ត៌មាននៃលទ្ធផលរកឃើញរបស់ខ្លួនក្នុងអំឡុងសម័យប្រជុំលើកចុងក្រោយកាលពីថ្ងៃទី ២១ ខែតុលាដល់ថ្ងៃទី ៨ ខែ វិច្ឆិកា ឆ្នាំ ២០១៩ នៅទីក្រុងហ្សឺណែវ។
សេចក្តីប្រកាសព័ត៌មាននៃការរកឃើញនេះ គឺជាការសន្និដ្ឋានចុងក្រោយ បង្ហាញអំពីរបៀបដែលរដ្ឋនីមួយៗកំពុងធ្វើសកម្មភាពពាក់ព័ន្ធនឹងសិទ្ធិស្ដ្រី ការលម្អិតអំពីការវិវឌ្ឍជាវិជ្ជមាន បញ្ហាសំខាន់ៗនៃក្ដីបារម្ភ និងអនុសាសន៍សម្រាប់ធ្វើសកម្មភាព។
គណៈកម្មាធិការរបស់ UN នេះលើកឡើងថា៖ «ទោះយ៉ាងណា (គណៈកម្មាធិការ) នៅតែមានការព្រួយបារម្ភអំពីមធ្យោបាយចម្បងនៃការដោះស្រាយករណីអំពើហិង្សាក្នុងគ្រួសារ គឺការផ្សះផ្សាក្រៅផ្លូវការដោយសមាជិកក្នុងសហគមន៍។ គោលគំនិតរើសអើងដែលធ្វើឱ្យមានឧត្តមភាពសម្រាប់បុរសនៅតែបន្តចាក់ឫសយ៉ាងជ្រៅនៅក្នុងវប្បធម៌ខ្មែរ។ ស្ត្រីជាង ៦០ នាក់ដែលបានធ្វើជាអ្នកពពោះជំនួស ត្រូវបានចាប់ខ្លួន និងរងការចោទប្រកាន់ពីបទឧក្រិដ្ឋចាប់តាំងពីមានឧក្រិដ្ឋកម្មនៃការពពោះជំនួសក្នុងឆ្នាំ ២០១៦»។
ជុំវិញបញ្ហានេះលោក ផុន ពុធបូរី មន្ត្រីនាំពាក្យក្រសួងកិច្ចការនារីថ្លែងថា ក្រសួងកំពុងបន្តផ្សព្វផ្សាយ និងតែងតែបង្ហាញជំហរមិនគាំទ្រចំពោះការដោះស្រាយអំពើហិង្សាក្រៅប្រព័ន្ធតុលាការ ព្រោះវាគឺជាការប្រព្រឹត្តបទល្មើសព្រហ្មទណ្ឌ។
លោកបន្តថា បច្ចុប្បន្នក្រសួងកិច្ចការនារីក៏កំពុងខិតខំលុបបំបាត់រាល់ទម្រង់នៃអំពើរើសអើងលើស្ដ្រី។ បើគិតចាប់តាំងពីឆ្នាំ ១៩៩៣ មកចំនួនស្ដ្រីក្លាយជារដ្ឋលេខាធិការ អនុរដ្ឋលេខាធិការ និងក្លាយជាថ្នាក់ដឹកនាំក្រសួងស្ថាប័ន និងថ្នាក់ដឹកនាំនៅក្នុងរដ្ឋសភារួមទាំងចំនួនស្ដ្រីក្លាយជាមេឃុំផងទៀតនោះ គឺមានការកើនឡើងជាបន្តបន្ទាប់។ លើសពីនេះលោកថា ស្ដ្រីក៏ត្រូវបានបញ្ចូលឱ្យធ្វើជាអភិបាលរងនៅគ្រប់ខេត្តទាំងអស់។
លោក ផុន ពុធបូរី ថ្លែងថា៖ «កាលពីឆ្នាំ ១៩៩៣ យើងសឹងតែគ្មានស្ដ្រីជារដ្ឋលេខាធិការ ឬអនុរដ្ឋលេខាធិការ។ ប៉ុន្តែឥឡូវនេះសួរថាយើងមានសមាសភាពហើយឬនៅ។ យើងអត់ទាន់មានសមាសភាពទេ។ ប៉ុន្តែយើងមានវឌ្ឍនភាពគួរឱ្យកត់សម្គាល់»។
លោកបានបន្ថែមថា ដោយឡែកក្រសួងកិច្ចការនារីក៏កំពុងសម្របសម្រួលក្នុងការរៀបចំសេចក្ដីព្រាងច្បាប់ស្ដីពីការពពោះជំនួសដែលច្បាប់នេះគឺធ្វើឡើងក្នុងគោលបំណងទប់ស្កាត់កុំឱ្យមានការកេងប្រវ័ញ្ចលើស្ដ្រី រួមទាំងលើកកម្ពស់ឧត្តមប្រយោជន៍ដល់កុមារផងដែរ៕
