ភ្នំពេញៈ អង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) បានលើកឡើងថា ប្រទេសកម្ពុជា និងប្រទេសនៅក្នុងតំបន់អាស៊ី និងប៉ាស៊ីហ្វិកបានជួបប្រជុំគ្នាតាមប្រព័ន្ធវីដេអូ ដើម្បីពិភាក្សារៀបចំផែនការឆ្លើយតប និងស្ដារការងារឡើងវិញស្ដីពីបញ្ហារាតត្បាតនៃជំងឺកូវីដ១៩ និងការអត់ឃ្លាន។
FAO លើកឡើងថា នៅពេលការរាតត្បាតជំងឺកូវីដបន្តគំរាមកំហែងអាយុជីវិត និងជីវភាពរបស់ប្រជាពលរដ្ឋនៅទូទាំងតំបន់អាស៊ី និងប៉ាស៊ីហ្វិក វាបានធ្វើឱ្យដើរថយក្រោយនូវការប្រយុទ្ធប្រឆាំងដើម្បីបញ្ចប់ភាពអត់ឃ្លាន និងការខ្វះអាហារូបត្ថម្ភ។
អង្គការ FAO បានបញ្ជាក់នៅក្នុងសេចក្ដីប្រកាសព័ត៌មានមួយចេញផ្សាយកាលពីថ្ងៃទី ១ កញ្ញា ថា តំបន់អាស៊ី និងប៉ាស៊ីហ្វិកដែលមានចំនួនប្រជាជនជាងពាក់កណ្ដាលនៃចំនួនប្រជាជនខ្វះអាហារូបត្ថម្ភនៅក្នុងពិភពលោក និងបញ្ហាជំងឺកូវីដ ១៩ នឹងធ្វើឱ្យចំនួនប្រជាជនជួបការអត់ឃ្លាននៅអាស៊ីខាងត្បូង ត្រូវបានគេរំពឹងថា នឹងកើនឡើងជិត ១ ភាគ ៣ គឺកើនដល់ ៣៣០ លាននាក់ នៅក្នុងឆ្នាំ ២០៣០ ជាឆ្នាំដែលពិភពលោកកំណត់ ដើម្បីលុបបំបាត់ភាពអត់ឃ្លាន និងការខ្វះអាហារូបត្ថម្ភគ្រប់ទម្រង់។
ដើម្បីឆ្លើយតបនឹងបញ្ហានេះកិច្ចប្រជុំលើកទី៣៥ នៃសន្និសីទប្រចាំតំបន់អាស៊ី និងប៉ាស៊ីហ្វិករបស់អង្គការ FAO ដែលមានការចូលរួមពីតំណាងមកពីរដ្ឋាភិបាលកម្ពុជា និងប្រទេសចំនួន ៤៥ ផ្សេងទៀតជាសមាជិករបស់អង្គការនេះគឺបានធ្វើឡើងចាប់ពីថ្ងៃទី ១ ដល់ថ្ងៃទី ៤ កញ្ញា ដើម្បីពិនិត្យឱ្យបានដិតដល់នូវស្ថានភាពបច្ចុប្បន្ននៃសន្ដិសុខស្បៀងរួមទាំងផលប៉ះពាល់ដែលបង្កឡើងពីការរីករាលដាលនៃជំងឺកូវីដ ១៩ ទៅលើប្រព័ន្ធចំណីអាហារ។
លោក Jong-Jin Kim តំណាង FAO ប្រចាំតំបន់អាស៊ី និងប៉ាស៊ីហ្វិកថ្លែងថា ការជួបប្រជុំនេះដើម្បីប្រមូលផ្ដុំមនុស្ស និងគំនិតដើម្បីដាក់ចេញវិធានការសម្រាប់ផលប្រយោជន៍ទាំងអស់គ្នា។
លោកថា៖ «ពួកយើងត្រូវតែទទួលយកនូវអ្វីដែលស្ថិតនៅខាងមុខយើង ហើយទទួលស្គាល់ថា ពិភពលោក និងតំបន់របស់យើងបានផ្លាស់ប្ដូរហើយ។ ពួកយើងត្រូវស្វែងរកវិធីថ្មីដើម្បីឆ្ពោះទៅរក និងធានាបាននូវសន្ដិសុខស្បៀងជានិរន្តរ៍ក្នុងពេលកំពុងប្រឈមនឹងបញ្ហាការរាតត្បាតទាំងពីរនេះរួមទាំងការត្រៀមសម្រាប់ការគំរាមកំហែង ដែលអាចកើតឡើង និងវិវត្តនៅពេលខាងមុខ»។
ក្នុងសុន្ទរកថា របស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទថ្លែងថា វិស័យកសិកម្មត្រូវបានគេទទួលស្គាល់ថា ជាឆ្អឹងខ្នងនៃការអភិវឌ្ឍសេដ្ឋកិច្ចរបស់ប្រទេសកម្ពុជាដែលបានចូលរួមចំណែក ២០,៨ ភាគរយដល់ផលិតផលក្នុងស្រុកសរុបកាលពីឆ្នាំ ២០១៩។
លោកបន្តថា ភាពក្រីក្រនៅកម្ពុជាបានថយចុះពី ៥៣ ភាគរយ ក្នុងឆ្នាំ ២០០៤ មកនៅត្រឹម ១៣,៥ ភាគរយ ក្នុងឆ្នាំ ២០១៤ ហើយត្រូវបានគេរំពឹងថា ឥឡូវនេះគឺស្ថិតនៅក្រោម ១០ ភាគរយ។ ប៉ុន្តែលោកបន្តថា កម្ពុជានៅតែប្រឈមបញ្ហាមួយចំនួននៅពេលខាងមុខដូចជាកម្លាំងពលកម្មបានចាកចេញពីវិស័យកសិកម្មទៅស្វែងរកឱកាសការងារថ្មី ជាពិសេសនៅទីក្រុងដែលតម្រូវឱ្យធ្វើយន្តកម្មកសិកម្ម ដើម្បីស្វែងរកដំណោះស្រាយសម្រាប់បញ្ហាធារាសាស្ដ្រ និងទឹក និងដើម្បីកែលម្អហេដ្ឋារចនាសម្ព័ន្ធក្នុងការធានាដល់ការកើនឡើងផលិតភាព និងផលិតកម្ម។
លោកថា៖ «ការចូលទៅក្នុងទីផ្សារ ក៏នៅតែជាបញ្ហាដ៏ធំមួយសម្រាប់កសិករខ្នាតតូច។ មានតម្រូវការដ៏សំខាន់មួយសម្រាប់បង្កើតឱ្យមានបរិយាកាសពាណិជ្ជកម្មឱ្យកាន់តែល្អប្រសើរមួយសម្រាប់កសិករ គឺតាមរយៈការធ្វើកសិកម្មតាមកិច្ចសន្យា ដែលផ្ដល់ផលប្រយោជន៍ឱ្យគ្នាទៅវិញទៅមក និងការផ្ដល់ព័ត៌មានអំពីទីផ្សារឱ្យកាន់តែប្រសើរ រួមទាំងការសម្របសម្រួលបញ្ហាទីផ្សារកសិកម្ម»។
បើរបាយការណ៍នៅក្នុងឆ្នាំ ២០១៩ របស់រដ្ឋាភិបាលបង្ហាញថា កម្ពុជាមានកម្លាំងពលកម្មប្រមាណ ១០ លាននាក់ ក្នុងនោះនៅក្នុងវិស័យកសិកម្មមានចំនួនជាង ៤ លាននាក់។
យោងតាមធនាគារអភិវឌ្ឍន៍អាស៊ី (ADB) បានព្យាករថា ផលប៉ះពាល់សេដ្ឋកិច្ចដោយសារការរាតត្បាតនៃជំងឺកូវីដ១៩ជាសកល គឺកំពុងធ្វើឱ្យប្រជាពលរដ្ឋកម្ពុជាជាច្រើននាក់ធ្លាក់ចូលទៅក្នុងភាពក្រីក្រ ហើយប្រជាពលរដ្ឋប្រមាណ ៣៩ ម៉ឺននាក់នឹងបាត់បង់ការងារធ្វើនៅត្រឹមឆ្នាំ ២០២០ នេះ។
ប៉ុន្តែនៅក្នុងស្ថានភាពដ៏លំបាកដោយសារវិបត្តិនៃជំងឺកូវីដ ១៩ រដ្ឋាភិបាលប្រកាសថា កម្ពុជាមានស្បៀងគ្រប់គ្រាន់ និងធានាថា នឹងមិនទុកឱ្យប្រជាពលរដ្ឋណាម្នាក់ត្រូវស្លាប់ដោយសារអត់អាហារឡើយ។
រដ្ឋាភិបាលកម្ពុជាថែមទាំងបានប្រកាសអនុវត្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះបំផុតនៅក្នុងអំឡុងវិបត្តិកូវីដ ១៩ និងបានជំរុញឱ្យពលរដ្ឋបាត់បង់ការងារ ងាកមកចាប់ផ្ដើមមុខរបរកសិកម្ម ដើម្បីជួយសេដ្ឋកិច្ចគ្រួសារ និងសេដ្ឋកិច្ចជាតិ ដើម្បីបង្កើនការនាំចេញទៅក្រៅប្រទេស និងដើម្បីកាត់បន្ថយការនាំចូលបន្លែ ត្រី សាច់ ពីប្រទេសខាងក្រៅ៕