ភ្នំពេញៈ UNDP បានដាក់សម្ពោធជាផ្លូវការនូវកម្មវិធី Accelerator Labs នៅកម្ពុជាដើម្បីជំរុញការប្រើប្រាស់នូវបច្ចេកវិទ្យា ឬមធ្យាបាយដោះស្រាយបញ្ហាដ៏ឆ្លាតវៃក្នុងការអភិវឌ្ឍប្រទេសកម្ពុជាឱ្យបានឆាប់រហ័សស្របតាមគោលដៅអភិវឌ្ឍន៍ប្រកបដោយចីរភាពដែលមានរយៈពេល ១០ ឆ្នាំទៀត ខណៈមន្ត្រីរដ្ឋាភិបាលបង្ហាញសុទិដ្ឋិនិយមថា កម្ពុជាអាចនឹងសម្រេចបានក្នុងរយៈពេលដ៏ខ្លីខាងមុខ។
កាលពីម្សិលមិញមានអ្នកពាក់ព័ន្ធយ៉ាងហោចណាស់ជាង ២០០ នាក់ដូចជាតំណាងរាជរដ្ឋាភិបាលអង្គការក្រៅរដ្ឋាភិបាល ក្រុមអ្នកបង្កើតថ្មីស្ថាប័នសិក្សាស្រាវជ្រាវ វិស័យឯកជន សង្គមស៊ីវិលបានចូលរួមការដាក់សម្ពោធជាផ្លូវការនូវកម្មវិធី Accelerator Labs ដែលបានរៀបចំដោយកម្មវិធីអភិវឌ្ឍន៍សហប្រជាជាតិ (UNDP) នៅទីស្នាក់ការ Factory ភ្នំពេញ។ UNDP បានឲ្យដឹងនៅក្នុងសេចក្តីប្រកាសព័ត៌មានថាកម្មវិធី Accelerator Labs គឺជាសេវាថ្មីមួយ ដែលនឹងធ្វើការផ្ទាល់ជាមួយនឹងប្រជាពលរដ្ឋ រដ្ឋាភិបាល វិស័យឯកជន និងសង្គមស៊ីវិល ដើម្បីប្រមើលមើលសាជាថ្មីអំពីអភិក្រមដែលត្រូវបានប្រើប្រាស់សម្រាប់អនុវត្តការងារអភិវឌ្ឍន៍នាពេលបច្ចុប្បន្ន។
សេចក្តីប្រកាសដដែលបន្តថា កម្មវិធី Accelerator Labs មានបណ្តាញរហូតដល់ ៦០ ក្រុមនៅទូទាំងពិភពលោក និងមានគោលបំណងរួមគ្នា ដើម្បីកសាងបណ្តាញចែករំលែកចំណេះដឹងធំជាងគេក្នុងពិភពលោកដែលអាចដោះស្រាយបញ្ហាប្រឈមក្នុងវិស័យអភិវឌ្ឍន៍ឱ្យបានឆាប់រហ័សបំផុត។ បណ្តាញនេះនឹងប្រមូលចងក្រងនូវនវានុវត្តន៍នានានៅតាមមូលដ្ឋាន ជាមួយនឹងទិន្នន័យដែលទទួលបានភ្លាមៗពីប្រភពថ្មីៗ និងពីការពិសោធនានា ដើម្បីស្វែងយល់ឱ្យកាន់តែស៊ីជម្រៅអំពីដំណោះស្រាយ សម្រាប់បញ្ហាប្រឈមនានា ក្នុងសេដ្ឋកិច្ច ការងារយុវជន និងការប្រែប្រួលអាកាសធាតុជាដើម។
UNDP បានបញ្ជាក់ក្នុងសេចក្តីប្រកាសថា៖ «UNDP កំពុងបន្តស្វែងរកដៃគូ និងការវិនិយោគបន្ថែមទៀតដើម្បីពង្រីកកម្មវិធីរបស់ខ្លួនក្នុងគោលបំណងធ្វើការសាកល្បង និងពង្រីកវិសាលភាពដំណោះស្រាយដែលអាចជួយឱ្យគ្រប់គ្នាសម្រេចគោលដៅអភិវឌ្ឍន៍ប្រកបដោយចីរភាព (SDGs)»។
លោក Nick Beresford អ្នកតំណាង UNDP ប្រចាំប្រទេសកម្ពុជាបានជំរុញដល់ពលរដ្ឋកម្ពុជា គួរចាំបាច់ធ្វើការងារឱ្យលឿនជាងមុន និងត្រូវប្រកាន់យកស្មារតីសហគ្រិនភាពឲ្យបានកាន់តែខ្ពស់ ប្រសិនបើកម្ពុជាចង់សម្រេចគោលដៅអភិវឌ្ឍន៍ប្រកបដោយចីរភាព (SDGs) ឱ្យបានត្រឹមឆ្នាំ ២០៣០។
លោកបន្តថា កម្មវិធី Accelerator Labs នៅកម្ពុជា និងក្នុងប្រទេស ៥៩ ផ្សេងទៀតគឺជាវិធីសាស្ត្រការងារថ្មីដែល UNDP ប្រើប្រាស់ដើម្បីឆ្លើយតបចំពោះបញ្ហាប្រឈមក្នុងវិស័យអភិវឌ្ឍន៍តាមរយៈការផ្តល់ថាមពលឡើងវិញដល់ការងាររបស់ខ្លួន និងដំណោះស្រាយដែលគ្រប់គ្នាមានចំពោះបញ្ហាអភិវឌ្ឍន៍ប្រទេស។
លោក Nick ប្រាប់ភ្នំពេញប៉ុស្តិ៍បន្ថែមថា UNDP និងដៃគូអភិវឌ្ឍន៍បានប្រើប្រាស់កញ្ចប់ថវិកាយ៉ាងហោចណាស់ ៧០ ម៉ឺនដុល្លារសម្រាប់គម្រោងរយៈពេល ២ ទៅ ៣ ឆ្នាំខាងមុខដែលលោករំពឹងថា វានឹងផ្តល់ផលប្រយោជន៍ដល់ភាគីពាក់ព័ន្ធចំនួន ៣ ដូចជា ក្រុមអ្នកបង្កើតថ្មី (new innovation) វិស័យឯកជន និងសេវាសាធារណៈ។
លោកបញ្ជាក់ថា៖ «យើងគ្រប់គ្នាចង់ឃើញការផ្លាស់ប្តូរ យើងចង់ឃើញវិធីដែលរាជរដ្ឋាភិបាលផ្តល់សេវាសាធារណៈដល់ប្រជាជនកម្ពុជាឲ្យមានភាពរហ័សរហួន លឿន និងមានប្រសិទ្ធភាពជាងមុនដោយជម្នះនូវឧបសគ្គ និងការប្រថុយប្រថានដោយការចាប់យកវិធីសាស្ត្រថ្មី។ ខ្ញុំគិតថា នោះគឺជាតួនាទីរបស់អង្គការសហប្រជាជាតិដែលត្រូវមានទំនាក់ទំនង និងមានការគាំទ្រពីរដ្ឋាភិបាលដោយចាប់ផ្តើមធ្វើចាប់ពីពេលនេះតទៅ»។
លោក យក់ ប៊ុនណា រដ្ឋលេខាធិការ ក្រសួងមុខងារសាធារណៈបានលើកឡើងក្នុងឱកាសនោះថា កម្ពុជាមានសក្តានុពលធំជាពិសេសធនធានមនុស្សវ័យជំទង់នៅមានអត្រាខ្ពស់ បើទោះបីក្នុងពេលបច្ចុប្បន្ន ពួកគេនៅមានការខ្វះខាតនូវការយល់ដឹងពីបច្ចេកវិទ្យាយ៉ាងណាក្តី។ លោកបញ្ជាក់ថា រដ្ឋាភិបាលបានព្យាយាមបណ្តុះបណ្តាល និងបញ្ជ្រាបនូវគំនិតថ្មីៗ និងការបង្កើតថ្មីក្នុងការផ្តល់សេវាសាធារណៈរបស់ខ្លួនឲ្យកាន់តែងាយស្រួលតាមរយៈបច្ចេកវិទ្យា បើទោះជាមិនបានគ្រប់ជ្រុងជ្រោយក្តី។
លោកបន្តថា៖ «ខ្ញុំគិតថា កម្ពុជាអាចធ្វើបានក្នុងរយៈពេល ១០ ឆ្នាំ គិតចាប់ពីពេលនេះដែលយើងអាចសម្រេចចក្ខុវិស័យ និងទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៥០។ ក្នុងក្របខ័ណ្ឌនេះ យើងនឹងជំរុញឲ្យក្រសួងស្ថាប័ន ប្រើប្រាស់បច្ចេកវិទ្យាក្នុងការផ្តល់សេវា ដែលយ៉ាងហោចណាស់ ១ ឆ្នាំតម្រូវឲ្យក្រសួងមួយត្រូវសម្រេចបាននូវការបង្កើតថ្មី ដើម្បីរុញសេវារបស់ខ្លួនឲ្យកាន់តែមានភាពងាយស្រួល និងជិតប្រជាពលរដ្ឋ»។
លោក Benjamin Knodler លេខាទី ១ នៃស្ថានទូតអាល្លឺម៉ង់ប្រចាំប្រទេសកម្ពុជាបានលើកឡើងថា ប្រសិនបើគ្រប់គ្នាចង់បញ្ចប់ភាពក្រីក្រ និងដោះស្រាយបញ្ហានៃការប្រែប្រួលអាកាសធាតុឲ្យបានត្រឹមឆ្នាំ ២០៣០ ចាំបាច់ត្រូវងាកចេញពីរបៀបធ្វើការងារកន្លងមក និងត្រូវមានភាពច្នៃប្រឌិត ព្រមទាំងពន្លឿនកិច្ចខិតខំប្រឹងប្រែងរបស់ខ្លួនបន្ថែមទៀត។
លោក Benjamin បញ្ជាក់ថា នេះគឺជាអ្វីដែលកម្មវិធី Accelerator Labs របស់ UNDP ចង់សម្រេចឱ្យបាននៅក្នុងប្រទេសកម្ពុជា និងទូទាំងសកលលោកទាំងមូល៕