.jpg)
ក្រុមអ្នកសារព័ត៌មានចុះយកព័ត៌មាននៅមុខសាលាដំបូងរាជធានីភ្នំពេញ នាពេលកន្លងមក។ ហ៊ាន រង្សី
ភ្នំពេញ៖ អង្គការ UNESCO បង្ហាញសារសំខាន់ៗ ដើម្បីអបអរទិវាសេរីភាពសារព័ត៌មានពិភពលោក ថ្ងៃ ៣ ឧសភា ឆ្នាំ ២០២១ ខណៈអង្គការអន្តរជាតិមួយនេះ មើលឃើញថា វិបត្តិនៃការរីករាលដាលជំងឺកូវីដនាពេលបច្ចុប្បន្នកំពុងបង្ខំឱ្យមានការបិទទ្វារ និងបង្កើនសម្ពាធនយោបាយលើស្ថាប័នប្រព័ន្ធផ្សព្វផ្សាយ។
លិខិតចែករំលែកខ្លឹមសារសំខាន់ៗ របស់អង្គការ UNESCO មួយច្បាប់ ដែលបានចេញផ្សាយកាលពីថ្ងៃ ២៦ មេសា បានឲ្យដឹងថា ដើម្បីធ្វើឱ្យពិភពលោកមាន «ព័ត៌មានដែលជាប្រយោជន៍សាធារណៈ» គោលនយោបាយបន្ទាន់ គឺត្រូវការជាចាំបាច់ ដើម្បីគាំទ្រដល់ស្ថាប័នប្រព័ន្ធផ្សព្វផ្សាយព័ត៌មានឯករាជ្យ ដែលបង្កើតជាមូលដ្ឋានទ្រទ្រង់ដល់សារព័ត៌មានសេរី។
អង្គការនេះ បានបន្តថា៖ «យើងប្រឈមនឹងការខាតបង់យ៉ាងខ្លាំងរួចមកហើយ។ វិបត្តិនាពេលបច្ចុប្បន្នកំពុងបង្ខំឱ្យមានការបិទទ្វារ និងការកាត់បន្ថយការងារសារព័ត៌មាន និងបង្កើនសម្ពាធនយោបាយ លើស្ថាប័នប្រព័ន្ធផ្សព្វផ្សាយ។ លទ្ធផល គឺយើងរស់នៅក្នុងវាលខ្សាច់ព័ត៌មាន ហើយអ្នកសារព័ត៌មានកំពុងធ្វើការកាន់តែខ្លាំងឡើង នៅក្រោមលក្ខខណ្ឌមិនច្បាស់លាស់»។
ដូច្នេះ អង្គការ UNESCO បានលើកឡើងថា ក្នុងអំឡុងពេលនេះ គ្រប់គ្នាត្រូវការប្រព័ន្ធផ្សព្វផ្សាយថ្មីមួយ ដែលធានានូវភាពឋិតថេរសម្រាប់ប្រព័ន្ធផ្សព្វផ្សាយសេរី និងពហុនិយម ខណៈដែលការអនុម័តការការពារនូវវិចារណកថាឯករាជ្យមានភាពចាំបាច់សម្រាប់សារព័ត៌មានដែលជាប្រយោជន៍សាធារណៈ។
អ្វីទាំងអស់នេះ អង្គការ UNESCO យល់ថា ពេលនេះ វាជាពេលវេលាដែលប្រព័ន្ធផ្សព្វផ្សាយធានានូវនិរន្តរភាព អាចផ្ដល់ព័ត៌មានដល់ប្រជាពលរដ្ឋនៅពេលមួយដែលព័ត៌មានទាំងនេះ ធ្វើឱ្យមានភាពខុសគ្នារវាងការរស់រានមានជីវិត និងការស្លាប់ និងរវាងការដួលរលំជាបន្តដោយសារការរីករាលដាលនៃជំងឺកូវីដ ១៩។
ក្រៅពីនេះ UNESCO ក៏ចង់ឲ្យក្រុមហ៊ុនអ៊ីនធឺណិតផ្តល់តម្លាភាពបន្ថែមទៀត អំពីអ្វីដែលពួកគេកំពុងធ្វើដើម្បីលើកកម្ពស់ព័ត៌មាន និងអំពីវិធានការរបស់ពួកគេ ដើម្បីបញ្ឈប់ការចែកចាយព័ត៌មានមិនពិត ព្រោះការលើកកម្ពស់តម្លាភាពធ្វើឡើង ដើម្បីឱ្យមានគណនេយ្យភាពសាធារណៈ។
ជាងនេះទៅទៀត ការបង្កើនជំនាញសមត្ថភាពដល់ប្រជាពលរដ្ឋ ក្នុងការទទួលបានព័ត៌មានដែលជាប្រយោជន៍សារធារណៈពិតជាមានអត្ថន័យ ចំពោះការសម្រេចចិត្តរបស់ពួកគេ។
UNESCO បញ្ជាក់ថា៖ «ប្រការនេះទាមទារឱ្យមានការប្ដេជ្ញាចិត្តនៅថ្នាក់ជាតិ និងអន្តរជាតិជាថ្មី ដើម្បី “ធ្វើឱ្យសម្រេចបានដូចអ្វីដែលបាននិយាយ (Walk the Talk)” ។ ដោយរក្សានូវសារៈសំខាន់ខ្ពស់នៃ "ព័ត៌មានដែលជាប្រយោជន៍សាធារណៈ” នៅក្នុងស្ថានភាពសព្វថ្ងៃ»។
លោក មាស សោភ័ណ អ្នកនាំពាក្យក្រសួងព័ត៌មានបានលើកឡើកថា ក្នុងបរិបទនៃការរីករាលដាលជាសកលនៃជំងឺកូវីដ ១៩ នេះ វិធានការបិទខ្ទប់របស់រដ្ឋាភិបាល គឺមិនមែនបានន័យថា ជាការគាបសង្កត់ និងដាក់សម្ពាធនយោបាយលើស្ថាប័នប្រព័ន្ធផ្សព្វផ្សាយណានោះទេ។
លោកបន្តថា វិធានការទាំងអម្បាលម៉ាន គឺដើម្បីចូលរួមទប់ស្កាត់ការរីករាលដាលជំងឺ ១៩ តែប៉ុណ្ណោះ ខណៈអំឡុងពេលនេះ ក្រសួងក៏បានផ្តល់សិទ្ធិពិសេសដល់អ្នកសារព័ត៌មាន ដោយអាចចុះយកព័ត៌មានក្នុងតំបន់បិទខ្ទប់ រួមទាំងផ្សព្វផ្សាយព័ត៌មានពិតទៅកាន់សាធារណជនផងដែរ។
លោកបញ្ចាក់ថា៖ «នៅក្នុងអំឡុងនៃការរីករាលដាលនេះ គឺការអនុវត្តវិជ្ជាជីវៈសារព័ត៌មាននៅកម្ពុជា គឺប្រព្រឹត្តទៅបានដដែល គ្រប់ពេលវេលា គ្រប់ទីកន្លែង ព្រមទាំងមានវិសាលភាព មានមធ្យោបាយក្នុងការផ្សព្វផ្សាយនៅដដែល។ គ្រាន់តែយើងធ្វើការប្រៀបធៀបការអនុវត្តវិជ្ជាជីវៈសារព័ត៌មានក្នុងឆ្នាំ ២០១៩ និងឆ្នាំ ២០២០ គឺអង្គភាពផ្សព្វផ្សាយតាមអនឡាញ គឺមានការកើនឡើង»។
បើតាមលោក មាស សោភ័ណ នៅឆ្នាំ ២០២១ នេះ ប្រព័ន្ធផ្សព្វផ្សាយតាមអនឡាញ គឺមានកើនឡើងជាង ១០០ ស្ថាប័ន ដោយមានសរុបជិត ៧០០ អង្គភាព។ ចំណែកការផ្តល់កាតព័ត៌មានដល់អ្នកសារព័ត៌មានជាតិ និងអន្តរជាតិ គឺមានជាង ៤ ០០០ នាក់ ដែលចំនួននេះ មានការកើនឡើងជាង ៤០០ នាក់៕
