.jpg)
លោក មាស សុភ័ណ្ឌ អ្នកនាំពាក្យក្រសួងព័ត៌មាន ថ្លែងនាពេលកន្លងមក។ ហុង មិនា
ភ្នំពេញៈ អង្គការយូណេស្កូប្រចាំកម្ពុជាបានប្រកាសធ្វើយុទ្ធនាការប្រយុទ្ធប្រឆាំងនឹងការផ្សព្វផ្សាយព័ត៌មានមិនពិតរយៈពេល ១០ ថ្ងៃគឺចាប់ពីថ្ងៃទី ២២ ដល់ថ្ងៃទី ៣១ ខែតុលា ដើម្បីអបអរសប្តាហ៍នៃអក្ខរកម្មប្រព័ន្ធផ្សព្វផ្សាយព័ត៌មាន និងព័ត៌មានសកលរបស់អង្គការសហប្រជាជាតិ។
យុទ្ធនាការនេះ គឺស្របជាមួយជាព្រឹត្តិការណ៍អបអរសាទរពិភពលោកប្រចាំឆ្នាំលើកទី ៩ នៃសប្តាហ៍ប្រព័ន្ធផ្សព្វផ្សាយព័ត៌មានអក្ខរកម្ម និងព័ត៌មាន (MIL) របស់អង្គការសហប្រជាជាតិនៅឆ្នាំ ២០២០ ដែលនឹងប្រព្រឹត្តទៅចាប់ពីថ្ងៃទី ២៤ ដល់ថ្ងៃទី ៣១ ខែតុលា ក្រោមប្រធានបទ «ការទប់ទល់នូវព័ត៌មានមិនពិតអំពីជំងឺកូវីដ១៩, អក្ខរកម្មប្រព័ន្ធផ្សព្វផ្សាយ និងព័ត៌មានសម្រាប់មនុស្សគ្រប់គ្នា និងផ្តើមដោយអ្នករាល់គ្នា»។
យោងតាមសេចក្តីប្រកាសព័ត៌មានរបស់អង្គការយូណេស្កូប្រចាំក្នុងរាជធានីភ្នំពេញបានឱ្យដឹងថា ដើម្បីអបអរសាទរសប្តាហ៍ Global MIL នេះ ការិយាល័យយូណេស្កូបានរៀបចំផ្ទាំងរូបភាពជាភាសាខ្មែរសម្រាប់យុទ្ធនាការតាមប្រព័ន្ធផ្សព្វផ្សាយសង្គមរយៈពេល ១០ ថ្ងៃការធ្វើបែបនេះ គឺដើម្បីអំពាវនាវដល់ប្រជាពលរដ្ឋទូទាំងប្រទេសឱ្យចូលរួមក្នុងយុទ្ធនាការនេះ តាមរយៈបណ្ណប្រកាសទាំង ១០ ដែលនឹងផ្សព្វផ្សាយទៅតាមកាលបរិច្ឆេទនីមួយៗ។
អង្គការយូណេស្កូបានបញ្ជាក់ថា៖ «រោគរាតត្បាតថ្មីៗនេះបានធ្វើឱ្យពិភពលោកប្រឈមមុខជាមួយនឹងរលកថ្មីនៃការផ្សព្វផ្សាយព័ត៌មានមិនពិត ដែលជះឥទ្ធិពលដល់ការប្រយុទ្ធប្រឆាំងនឹងជំងឺកូវីដ១៩។ ព័ត៌មានមិនពិតអំពីជំងឺកូវីដ១៩ នេះមិនត្រឹមតែបង្កហានិភ័យដល់សុខភាពសាធារណៈប៉ុណ្ណោះទេ ប៉ុន្តែវាថែមទាំងផ្តល់ភាពខុសគ្នាដល់នយោបាយ និងសង្គមផងដែរ ដែលផ្តល់នូវមូលដ្ឋានគ្រឹះនៃការស្អប់ខ្ពើម និងការបែងចែក»។
លោក មាស សុភ័ណ្ឌ អ្នកនាំពាក្យក្រសួងព័ត៌មានបានប្រាប់ភ្នំពេញប៉ុស្តិ៍កាលពីថ្ងៃចន្ទថា ការលុបបំបាត់នូវព័ត៌មានមិនពិត ឬព័ត៌មានក្លែងក្លាយ គឺមិនអាចធ្វើឡើងតែរាជរដ្ឋាភិបាលតែម្នាក់ឯងបាននោះទេ ការងារនេះគឺត្រូវការ ការចូលរួមពីគ្រប់ភាគី មិនថាអង្គការសង្គមស៊ីវិល ដៃគូអភិវឌ្ឍន៍ ហើយជាពិសេសប្រជាពលរដ្ឋគ្រប់រូប។ យុទ្ធនាការរបស់អង្គការយូណេស្កូក៏ជាចំណែកមួយក្នុងការចូលរួម និងកៀរគរសាធារណជនឱ្យមានការចូលរួមទាំងអស់ ដើម្បីរារាំងនូវឥទ្ធិពលនៃព័ត៌មានមិនពិត ដែលធ្វើឱ្យប៉ះពាល់សង្គមជាតិ និងការសម្រេចចិត្តដ៏ត្រឹមត្រូវរបស់ប្រជាពលរដ្ឋ។
លោកបានបញ្ជាក់ថា៖ «ការផ្សព្វផ្សាយដំណឹងតាមបណ្តាញផ្សព្វផ្សាយ ឬមធ្យោបាយផ្តល់ព័ត៌មាន មានការរីកចម្រើនយ៉ាងឆាប់រហ័ស ហើយកាន់តែទូលំទូលាយ។ ទន្ទឹមនឹងហ្នឹង យើងក៏ពិនិត្យឃើញការលេចឡើងនូវការផ្សព្វផ្សាយមិនពិតជាមួយគ្នា។ ការប្រយុទ្ធប្រឆាំងនេះ គឺជាការងារមួយចាំបាច់ ដែលទាំងអស់គ្នាត្រូវចូលរួមចំណែកមួយក្នុងការទប់ស្កាត់នៃការរីករាលដាលនៃព័ត៌មានក្លែងក្លាយ ហើយក៏ជាសារមួយដល់ប្រជាពលរដ្ឋយើងដែរ»។
យោងតាមផ្ទាំងរូបភាពជាភាសាខ្មែរ ដែលគ្រោងនឹងបង្ហោះផ្សព្វផ្សាយ ដើម្បីអំពាវនាវឱ្យមានការចូលរួមពីសាធារណជនរបស់អង្គការយូណេស្កូនៅក្នុងព្រះរាជាណាចក្រកម្ពុជាបានសរសេរថា ព័ត៌មានមិនពិតគឺសុទ្ធតែជាព័ត៌មានក្លែងក្លាយ ដែលមានចេតនា បង្កើតឡើងដើម្បីបង្កអន្តរាយ។ ផ្ទាំងរូបភាពទាំងនោះក៏បានបង្ហាញពីច្បាប់ទាំង ៥ របស់អក្ខរកម្មប្រព័ន្ធផ្សព្វផ្សាយ និងព័ត៌មានផងដែរ ព្រោះថាព័ត៌មានមិនមែនមានត្រឹមតែតម្លៃនៃអព្យាក្រឹត និងឯករាជ្យប៉ុណ្ណោះទេ ព័ត៌មានគឺត្រូវមានតម្លាភាព និងងាយស្រួលឱ្យប្រជាពលរដ្ឋយល់។
យោងតាមខ្លឹមសាររបស់អង្គការយូណេស្កូដដែលនេះ ដោយបានសរសេរជាភាសាខ្មែរបានបង្ហាញឱ្យដឹងទៀតថា អក្ខរកម្មប្រព័ន្ធផ្សព្វផ្សាយ និងព័ត៌មានគឺសម្រាប់មនុស្សទូទៅ មិនមានការបែងចែកស្ត្រី ឬបុរសនោះទេ ហើយប្រជាពលរដ្ឋមានសិទ្ធិស្មើគ្នា ទទួលបានឋានៈស្នើគ្នាក្នុងការផ្តល់ និងទទួលបាននូវព័ត៌មាន៕
