The Phnom Penh Post Search

Search form




Logo of Phnom Penh Post newspaper Phnom Penh Post - UNODC ថា​កម្ពុជា​មាន​ឆន្ទៈ​ប្រឆាំង​ភេរវកម្ម

UNODC ថា​កម្ពុជា​មាន​ឆន្ទៈ​ប្រឆាំង​ភេរវកម្ម

UNODC ថា​កម្ពុជា​មាន​ឆន្ទៈ​ប្រឆាំង​ភេរវកម្ម

121207_06
ការហាត់សមត្រៀមបង្ក្រាបអំពើភេរវកម្ម និងរក្សាសុវត្ថិភាព សណ្ដាប់ធ្នាប់ សន្តិសុខក្នុងសង្គមរបស់កម្លាំងសមត្ថកិច្ចកម្ពុជា ហេង ជីវ័ន

ភ្នំពេញៈ ការិយាល័យ​អង្គការ​សហប្រជាជាតិ​ស្ដី​ពី​គ្រឿង​ញៀន​និង​ឧក្រិដ្ឋកម្ម (UNODC) ប្រចាំ​ប្រទេស​កម្ពុជា បាន​បង្ហាញ​ថា កម្ពុជា​ជា​ប្រទេស​មួយ​ក្នុង​ចំណោម​ប្រទេស​មួយ​ចំនួន​ទៀត​នៅ​ក្នុង​តំបន់​ អាស៊ី​អាគ្នេយ៍ ដែល​មាន​ឆន្ទៈ​ក្នុង​ការ​ប្រយុទ្ធ​ប្រឆាំង​ភេរវកម្ម។

នៅ ក្នុង​កិច្ច​ប្រជុំ​រយៈ​ពេល​ពីរ​ថ្ងៃ​(ចាប់​ពី​ថ្ងៃ​ទី​៤ ដល់​ថ្ងៃ​ទី​៥​ ខែ​ធ្នូ ឆ្នាំ​២០១២)​ នៅ​ឯ​សណ្ឋាគារ​ភ្នំពេញ ​ស្តីពី​ការ​រៀប​ចំ​វិធាន​ការ​ច្បាប់​សម្រាប់​ការ​បង្កក​និង​ការ​រឹប​អូស ទ្រព្យ​សម្បត្តិ ​ប្រឆាំង​ការ​សម្អាត​ប្រាក់ និង​ប្រឆាំង​ហិរញ្ញប្បទាន​ភេរវកម្ម​នោះ លោក Ovilvier Lermet នាយក​ការិយាល័យ​អង្គការ​សហ​ប្រជាជាតិ ស្ដី​ពី​គ្រឿង​ញៀន និង​ឧក្រិដ្ឋកម្ម (UNODC) ប្រចាំ​ប្រទេស​កម្ពុជា បាន​ថ្លែង​ថា​ ដោយ​មើល​ឃើញ​អំពី​កិច្ច​ខិតខំ​ប្រឹងប្រែង និង​សុច្ឆន្ទៈ​ខ្ពស់​របស់​​ប្រទេស​កម្ពុជា ​ក្នុង​ការ​ប្រយុទ្ធ​ប្រឆាំង​ភេរវកម្ម ដូច្នេះ ​UNODC នឹង​ជួយ​ធ្វើ​ឲ្យ​ប្រព័ន្ធ​ច្បាប់​ប្រឆាំង​ភេរវកម្ម​របស់​កម្ពុជា​មាន​ ប្រសិទ្ធភាព និង​ស្រប​គ្នា​ទៅ​នឹង​ប្រព័ន្ធ​ច្បាប់​របស់​អង្គការ​សហ​ប្រជាជាតិ។

ឆ្លើយ​តប​ទៅ​នឹង​ការ​លើក​ឡើង​ទាំង​នោះ​ លោក​ សៀង​ ឡាប្រេស អនុ​រដ្ឋ​លេខាធិការ​ក្រសួង​មហា​ផ្ទៃ បាន​ប្រាប់​ក្រុម​អ្នក​កាសែត​នៅ​ក្រៅ​កិច្ច​ប្រជុំ​នេះ​ថា ច្បាប់​ប្រឆាំង​ភេរវកម្ម​របស់​កម្ពុជា ​ជា​ច្បាប់​មួយ ដែល​អង្គការ​សហ​ប្រជាជាតិ​បាន​ផ្ដល់​តម្លៃ​ថា ជា​ច្បាប់​ល្អ​នៅ​លើ​ពិភពលោក ព្រោះ​ច្បាប់​នេះ​បាន​បង្កើត​ចេញ​ពី​អនុសញ្ញា និង​ពិធី​សារ​ទាំង ​១៣ របស់​អង្គការ​សហ​ប្រជាជាតិ ស្ដីពី​យន្តការ​ប្រឆាំង​ភេរវកម្ម។

លោក បាន​ថ្លែង​ថា ៖ «​ច្បាប់​យើង​មាន​ហើយ​ល្អ​ទៀត តែ​សព្វ​ថ្ងៃ​នេះ ​យើង​ខ្វះ​នូវ​ការ​វិភាគ និង​ការ​អនុវត្ត​ច្បាប់​។ ហេតុ​នេះ​ហើយ បាន​ជា UNODC គេ​មក​ជួយ​ពង្រឹង​និង​ណែនាំ​យើង ធ្វើ​យ៉ាង​ម៉េច​ឲ្យ​ការ​អនុវត្ត​ច្បាប់​របស់​យើង​ប្រកប​ដោយ​ប្រសិទ្ធភាព»។

លោក សៀង​ ឡាប្រេស បាន​គូស​បញ្ជាក់​បន្ថែម​ទៀត​ថា ឥឡូវ​នេះ កម្ពុជា​មិន​ទាន់​មោទនភាព​នឹង​ប្រកាស​ខ្លួន​ឯង​ជា​អ្នក​ជំនាញ​ទេ ​តែ​កម្ពុជា​ មាន​នគរបាល​ទាំង​អស់​ឆ្ពោះ​ទៅ​រក​អ្នក​ឯកទេស​ក្នុង​ការ​ប្រឆាំង​ភេរវកម្ម។

នៅ ក្នុង​ឆ្នាំ ២០១២​ នេះដែរ​ សហរដ្ឋ​អាមេរិក​បាន​វាយ​តម្លៃ​ថា ​ប្រទេស​កម្ពុជា​នៅ​មិន​ទាន់​ជា​ប្រទេស​នៃ​គោល​ដៅ​នៃ​ក្រុម​ភេរវកម្ម​នោះ​ ទេ ប៉ុន្តែ​ ជា​ប្រទេស​ដែល​មិន​អាច​ធ្វេស​ប្រហែស​ជា​មួយ​នឹង​បញ្ហា​ភេរវកម្ម​បាន​ឡើយ​។

ទោះជា​បែប​ណា​ក្ដី លោក​បាន​មាន​ប្រសាសន៍​ដោយ​សុទិដ្ឋិនិយម​ថា ឆ្លង​តាម​ការ​បណ្ដុះ​បណ្ដាល​ផ្នែក​ជំនាញ​ឯកទេស នឹង​ការ​ណែនាំ​បន្ថែម​ពី​ការិយាល័យ​អង្គការ​សហ​ប្រជា​ជាតិ​ស្ដី​ពី​គ្រឿង​ញៀន​ និង​ឧក្រិដ្ឋកម្ម កម្ពុជា​នឹង​ក្លាយ​ជា​ប្រទេស​ដែល​មាន​អ្នក​ជំនាញ​ការ​ឯកទេស​ខាង បង្ក្រាប​អំពើ​ភេវរកម្ម ដើម្បី​រក្សា​សុវត្ថិភាព​ សណ្ដាប់​ធ្នាប់ សន្តិ​សុខ​សង្គម ទាំង​នៅ​ក្នុង​ប្រទេស ក្នុង​តំបន់ និង​ពិភពលោក​ទាំង​មូល។

តាម របាយការណ៍​របស់​ក្រសួង​មហាផ្ទៃ​ក្នុង​ពេល​ថ្មីៗ​នេះ បាន​បង្ហាញ​ឲ្យ​ដឹង​ថា ​នៅ​ក្នុង​ឆ្នាំ​២០១២ នេះ សមត្ថកិច្ច​កម្ពុជា​បាន​បង្ក្រាប​ទៅ​លើ​ជន​បរទេស​ជាច្រើន ដូច​ជា ករណី​ភ្នាល់​ល្បែង​ស៊ី​សង​តាម​ប្រព័ន្ធ​អ៊ីនធឺណិត ការ​ចាប់​ជំរិត​មនុស្ស​ទារ​ប្រាក់​តាម​ប្រព័ន្ធ​ទូរស័ព្ទ Internet VOIP និង​ការ​លួច​ប្រាក់​តាម​ប្រព័ន្ធ​ធនាគារ​ជាដើម៕

អត្ថបទគួរចាប់អារម្មណ៍