.jpg)
សេចក្តីប្រកាសរបស់ USAID ដាក់ឱ្យប្រើឧបករណ៍អនឡាញនៅខេត្តកំពង់ឆ្នាំង ។ រូបភាព USAID
ភ្នំពេញៈ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ដាក់ឱ្យប្រើប្រាស់នូវឧបករណ៍អនឡាញ ដើម្បីផ្សារភ្ជាប់ពលរដ្ឋ និងសេវាសាធារណៈក្រុងនៅក្នុងខេត្តកំពង់ឆ្នាំង ដើម្បីឲ្យពលរដ្ឋកាន់តែមានភាពងាយស្រួលក្នុងការទទួលបានសេវាពីរដ្ឋ។
កម្មវិធី «ពិដោរអ្នកភូមិឆ្លាតវៃ» គឺជាឧបករណ៍ឆ្លើយតបសំឡេងអន្តរកម្ម (IVR) ហើយក៏ជាឧបករណ៍ជជែកតាមហ្វេសប៊ុក (Facebook bed chatbot) ដែលផ្ដល់ព័ត៌មានដល់ពលរដ្ឋកម្ពុជាអំពីសេវាសាធារណៈនៅខេត្តកំពង់ឆ្នាំងទាំងមូល។
តាមសេចក្តីប្រកាសព័ត៌មានរបស់ USAID បានឲ្យដឹងនៅថ្ងៃនេះថា ឧបករណ៍នេះនឹងផ្សារភ្ជាប់ពលរដ្ឋទៅនឹងសេវានានាដែលផ្ដល់ដោយការិយាល័យច្រកចេញចូលតែមួយរបស់រាជរដ្ឋាភិបាលកម្ពុជា និងជាឧបករណ៍ស្រដៀងគ្នា ដែលបានដាក់ឱ្យប្រើប្រាស់នៅខេត្តបាត់ដំបងក្នុងឆ្នាំ ២០២០ ។
សេចក្តីប្រកាសដដែលបានឲ្យដឹងទៀតថា «ឧបករណ៍បច្ចេកវិទ្យា OW4C ធ្វើឱ្យការទទួលបានព័ត៌មានមានលក្ខណៈសាមញ្ញ។ ពិដោរ អាចផ្តល់ព័ត៌មានជូនពលរដ្ឋតាមរយៈកម្មវិធីជជែកតាមហ្វេសប៊ុក (Facebook chatbot) ឬការហៅទូរស័ព្ទ»។
សេចក្តីប្រកាសនេះ បានបញ្ជាក់ពីតួនាទីរបស់កម្មវិធីនេះយ៉ាងដូច្នេះថា ១-ការទទួលបានព័ត៌មានស្តីពីដំណើរការដាក់ពាក្យស្នើសុំលម្អិតពីឯកសារដែលត្រូវការថ្លៃសេវា និងបទដ្ឋានរយៈពេលនៃការប្រគល់ត្រឡប់មកវិញ។ ២- ជាយន្តការមានសុវត្ថិភាពមួយ សម្រាប់អ្នកប្រើប្រាស់ក្នុងការផ្តល់យោបល់អំពីគុណភាពសេវាកម្មដែលពួកគេបានទទួលនៅការិយាល័យច្រកចេញចូលតែមួយ។
លោកស្រី Veena Reddy នាយិកាទីភ្នាក់ងារ USAID ប្រចាំនៅកម្ពុជាបានថ្លែងថា៖ «ការទទួលបានព័ត៌មានគួរឱ្យទុកចិត្តអំពីសេវាទាំងនេះបានទាន់ពេលវេលានៅការិយាល័យច្រកចេញចូលតែមួយនឹងធ្វើឱ្យជីវិតកាន់តែប្រសើរ និងមានគណនេយ្យភាពចំពោះលទ្ធផលសេវាសាធារណៈ»។
ការដាក់ឱ្យប្រើប្រាស់ឧបករណ៍របស់គម្រោង OW4C នៅខេត្តកំពង់ឆ្នាំងគឺជាការកសាងឡើងបន្ថែមលើជោគជ័យនៃគម្រោងដែលបានបង្កើតសមិទ្ធផលដ៏វិជ្ជមាននៅក្នុងខេត្តបាត់ដំបង កាលពីខែសីហា ឆ្នាំ ២០២០។ ការសាកល្បងកម្មវិធី «ពិដោរអ្នកភូមិឆ្លាតវៃ »នៅខេត្តបាត់ដំបងមកទល់ពេលនេះមានពលរដ្ឋជាង ៤០០០ នាក់បានទទួលព័ត៌មានអំពីសេវាជាង ៥ ៥០០ ដង។ នេះបើតាមការអះអាងក្នុងសេចក្តីប្រកាសព័ត៌មានដដែល។
លោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាបានកត់សម្គាល់ថា សមត្ថភាពរបស់ពលរដ្ឋក្នុងការទទួលបានសេវាសាធារណៈសំខាន់ៗ គឺជាផ្នែកសំខាន់មួយរបស់រដ្ឋាភិបាលដែលបើកចំហ និងមានគណនេយ្យភាព។
លោកបានបញ្ជាក់ថា៖ «យើងចែករំលែកគោលការណ៍ និងគុណតម្លៃទាំងនេះ ដែលបង្កើតឱ្យមានការជឿទុកចិត្តរវាងពលរដ្ឋ និងអាជ្ញាធរ។ ការជឿទុកចិត្តនេះក៏នឹងត្រួសត្រាយផ្លូវសម្រាប់សង្គមដែលមានផលិតភាពខ្ពស់ និងរីកចម្រើនផងដែរ»៕
