ភ្នំពេញៈ ទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ USAID ផ្តល់ទឹកប្រាក់ជាង ១ លានដុល្លារ ដល់ក្រុមអង្គការសង្គមស៊ីវិលក្នុងស្រុក ធ្វើការលើកកម្ពស់សិទ្ធិស្ត្រី ដើម្បីជំរុញការចូលរួម និងធ្វើសេចក្តីសម្រេចចិត្តក្នុងភាពជាតំណាងស្ត្រី ក្នុងវិស័យនយោបាយ លើគម្រោង «រួមគ្នាដើម្បីគាំទ្រស្ត្រី» ដែលមានរយៈពេលជិត ៣ ឆ្នាំ។
លោក ប្រ៊ូស ខេយ Bruce Kay តំណាង USAID ថ្លែងក្នុងពិធីប្រកាសផ្សព្វផ្សាយគម្រោង កាលពីម្សិលមិញថា គម្រោងនេះមានគោលដៅផ្សារភ្ជាប់សហគមន៍ និងសង្គមស៊ីវិល ទៅនឹងរដ្ឋាភិបាល តាមរយៈការបង្កើតការចូលរួម និងភាពជាអ្នកដឹកនាំរបស់ស្ត្រី ក្នុងនោះប្រជាពលរដ្ឋជិត ២ សែននាក់ ជាពិសេសស្ត្រី ដែលគេរំពឹងថា នឹងទទួលបានផលពីការអនុវត្តគម្រោងនេះ។
លោក ខេយ បន្តថា ការជំរុញឲ្យមានការទទួលយកកង្វល់របស់ស្ត្រី យកមកពិចារណា និងដាក់ក្នុងគោលនយោបាយ គឺមានសារៈសំខាន់ណាស់ ដើម្បីធ្វើឲ្យស្ត្រី ក្លាយជាផ្នែកមួយក្នុងការជំរុញការអភិវឌ្ឍប្រទេស។
លោកបញ្ជាក់ថា៖ «ការដែលយើងវិនិយោគលើស្ត្រី ឲ្យស្ត្រីបានចូលរួមបន្ថែមទៀត វាអាចជួយឲ្យស្ត្រី មានឱកាសចូលរួមក្នុងរយៈពេលយូរ និងមានការអភិវឌ្ឍព្រោះការចូលរួមរបស់ស្ត្រី ក្នុងវិស័យសាធារណៈ គឺមានសារៈសំខាន់ណាស់ ហើយជាការវិនិយោគដ៏ពេញលេញ ដែលសង្គមគួរតែធ្វើ។ វាអាចផ្លាស់ប្តូរ និងជំរុញឲ្យស្រ្តី ហ៊ានចូលរួម និងហ៊ានធ្វើនូវអ្វីដែលពួកគេចង់បានខណៈកន្លងទៅការព្រួយបារម្ភរបស់ស្ត្រីមិនត្រូវបានដាក់បញ្ចូលក្នុងគោលនយោបាយនោះទេ»។
តាមសេចក្តីប្រកាសព័ត៌មានរបស់ USAID គម្រោងដែលមានថវិកាប្រមាណ ១ ០៧២ ០០០ ដុល្លារ នេះ គឺមានរយៈពេល ២ ឆ្នាំ ៩ ខែ បានចាប់ដំណើរការកាលពីខែវិច្ឆិកា ឆ្នាំមុន ហើយនឹងបញ្ចប់នៅខែកក្កដា ឆ្នាំ ២០២១ ខាងមុខក្នុងនោះមានអង្គការសង្គមស៊ីវិលចំនួន ៤ ដែលបានចូលរួមអនុវត្តគម្រោងនេះនៅក្នុងខេត្តចំនួន ៦ មានខេត្តមណ្ឌលគិរី បាត់ដំបង ពោធិ៍សាត់ កំពង់ឆ្នាំង កំពង់ស្ពឺ និងខេត្តកំពត។
លោកស្រី រស់ សុភាព នាយិកានៃអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) ជាផ្នែកមួយនៃគម្រោងលើកកម្ពស់ស្ត្រី បាននិយាយថា បើទោះជាបច្ចុប្បន្ន មានការទទួលស្គាល់ និងការយល់ដឹងពីសិទ្ធិស្ត្រីមានភាពល្អប្រសើរយ៉ាងណាក្តី ក៏បញ្ហា និងកង្វល់របស់ស្ត្រីភាគច្រើន រួមទាំងស្ត្រីខ្លួនឯងផ្ទាល់ នៅតែប្រឈមនឹងការរើសអើង រួមទាំងការរំលោភបំពាន។
លោកស្រីបន្តថា៖ «ជួនកាលទៅ អាជ្ញាធរគាត់បានធ្វើការទៅលើផែនការរបស់គាត់ ប៉ុន្តែពួកគាត់មិនបានផ្តល់ឱកាសក្នុងការទទួលយក ឬស្តាប់ពីប្រជាពលរដ្ឋត្រូវការអ្វី ជាពិសេសស្ត្រី។ អ៊ឹចឹងក្នុងកម្មវិធីនេះនឹងបង្កើនការយល់ដឹងរបស់ស្ត្រីឲ្យពួកគាត់បានយល់ពីគ្នា និងធ្វើការជាមួយគ្នា»។
លោកស្រី រស់ សុភាព មើលឃើញថា ការលើកកម្ពស់សិទ្ធិស្ត្រី និងសមភាពយេនឌ័រនៅថ្នាក់មូលដ្ឋានរបស់រដ្ឋាភិបាល ហាក់នៅមានកម្រិតនៅឡើយ ដែលទាមទារឲ្យមានការយកចិត្តទុកដាក់បន្ថែមទៀត ដើម្បីលុបបំបាត់បញ្ហាប្រឈមកើតចេញពីបទដ្ឋានសង្គម ឥរិយាបថ និងអាកប្បកិរិយាដែលរឹតត្បិតទៅលើស្ត្រី។
លោក ខោល យុទ្ធលី អនុប្រធានអង្គភាពវិភាគ និងអភិវឌ្ឍន៍គោលនយោបាយនៃលេខាធិការដ្ឋាន គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ ជ អ ប) បានថ្លែងថា កន្លងទៅរដ្ឋាភិបាល បានធ្វើកិច្ចការងារនេះច្រើន ក្នុងការលើកកម្ពស់ និងផ្តល់ភាពអង់អាចដល់ស្ត្រី ដោយផ្តោតលើការងារមួយចំនួន។
លោកបន្តថា៖ «គោលការណ៍របស់រដ្ឋាភិបាលក្នុងការលើកកម្ពស់សិទ្ធិស្ត្រី គឺមានរយៈពេល ១០ ឆ្នាំ ដែលធ្វើជាដំណាក់កាលៗ និងបន្តបន្ទាប់ ដើម្បីលើកកម្ពស់ និងបញ្ជ្រាបពីការយល់ដឹងរបស់ស្ត្រី ក្នុងនោះទទួលបានលទ្ធផលជាវិជ្ជមាន»។
ចំណែកលោកស្រី ចេង ជិនណេត ប្រធាននាយកដ្ឋានសមភាពយេនឌ័រ នៃក្រសួងកិច្ចការនារី បានអះអាងដែរថា រដ្ឋាភិបាលបានចូលរួមយ៉ាងសកម្មដើម្បីជំរុញ និងការលើកកម្ពស់ដល់ស្ត្រីនៅថ្នាក់មូលដ្ឋាន ហើយការងារទាំងនេះ គឺចាំបាច់ណាស់ ត្រូវការការចូលរួមពីភាគីពាក់ព័ន្ធ។
ដូច្នេះលោកស្រីយល់ថា៖ «ការចូលរួមរបស់សង្គមស៊ីវិលគឺមិនអាចខ្វះបានដូចលទ្ធផលរំពឹងទុកពីគម្រោង រួមគ្នាដើម្បីគាំទ្រស្ត្រី ៣ ធំៗនេះ គឺមានសារៈសំខាន់ណាស់ ហើយមួយក្នុងចំណោមនេះ គឺការជំរុញភាពជាអ្នកដឹកនាំជាស្ត្រី ទោះតិចឬច្រើន គឺបានចូលរួមលើកកម្ពស់សមភាពយេនឌ័រហ្នឹង»៕