.jpg)
ភ្នំពេញៈ ធនាគារពិភពលោកបានអនុម័តផ្តល់ជំនួយចំនួន ២ កញ្ចប់មានទឹកប្រាក់ប្រមាណ ៧,៦៧ លានដុល្លារ ដើម្បីគាំទ្រដល់គណនេយ្យភាពសង្គមនៅតាមផ្នែកសេវាសាធារណៈសំខាន់ៗមួយចំនួនមានដូចជា មណ្ឌលសុខភាព សាលាបឋមសិក្សា និងរដ្ឋបាលមូលដ្ឋានក្នុងខេត្តចំនួន ១០ នៃប្រទេសកម្ពុជា។
តាមសេចក្ដីប្រកាសព័ត៌មានរបស់ WB ចេញកាលពីថ្ងៃទី ២០ ខែមីនាឲ្យដឹងថា បើទោះជាមានការកែលម្អបានប្រសើរឡើងច្រើនគួរសមនូវលទ្ធភាពទទួលបានសេវាសាធារណៈនានានៅកម្ពុជាក្នុងរយៈពេលប៉ុន្មានឆ្នាំកន្លងទៅនេះហើយក្តីក៏គុណភាពនៃសេវាទាំងនេះនៅតែជាបញ្ហាប្រឈមនៅឡើយ។
ធនាគារពិភពលោកបញ្ជាក់ក្នុងសេចក្តីប្រកាសព័ត៌មានថា៖ «ជំនួយឥតសំណងទាំង ២ កញ្ចប់នេះមានគោលបំណងទ្រទ្រង់ដល់ការអនុវត្តដំណាក់កាលទី ២ នៃគម្រោងក្របខ័ណ្ឌគណនេយ្យភាពសង្គមដែលមានអាយុកាលពីឆ្នាំ ២០១៩ ដល់ឆ្នាំ ២០២៣។ ក្របខ័ណ្ឌនេះគឺជាផ្នែកស្នូលមួយខ្វះមិនបាននៅក្នុងកម្មវិធីកែទម្រង់វិមជ្ឈការរបស់រដ្ឋាភិបាលដែលសំដៅពង្រឹងការឆ្លើយតបរបស់រដ្ឋាភិបាលទៅនឹងសេចក្តីត្រូវការរបស់ប្រជាពលរដ្ឋ»។
សេចក្តីប្រកាសដដែលបន្តថា កញ្ចប់ជំនួយឥតសំណងទី ១ មានទឹកប្រាក់ចំនួន ៥,៩៥ លានដុល្លារអាមេរិកត្រូវបានអនុម័តផ្តល់ទៅឲ្យអង្គការទស្សនៈពិភពលោកអន្តរជាតិ (World Vision International) សម្រាប់ធ្វើសកម្មភាពនានាពាក់ព័ន្ធផ្នែកគណនេយ្យភាពសង្គមរួមមានការជ្រើសរើសអ្នកសម្របសម្រួលសហគមន៍សម្រាប់ជួយជម្រាបជូនពលរដ្ឋអំពីសេវានានាដែលពួកគាត់មានសិទ្ធិទទួលបាន និងអំពីការប្រើប្រាស់មូលនិធិសាធារណៈ។
ចំណែកជំនួយឥតសំណងទី ២ មានទឹកប្រាក់ចំនួន ១,៧២ លានដុល្លារអាមេរិកត្រូវបានផ្តល់ជូនលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិសម្រាប់ជួយពង្រឹងសមត្ថភាពរបស់អ្នកផ្តល់សេវារដ្ឋាភិបាលនៅក្នុងការជូនព័ត៌មានដល់សាធារណជនអំពីការបំពេញមុខងារ និងការប្រើប្រាស់មូលនិធិដោយគណៈកម្មាធិការនេះ និងក្នុងការឆ្លើយតបឲ្យបានកាន់តែល្អឡើងទៅនឹងមតិយោបល់របស់ពលរដ្ឋ។
លោកស្រី អ៊ីងហ្គូណា ដូប្រាចា ប្រធានគ្រប់គ្រងប្រចាំប្រទេសរបស់ធនាគារពិភពលោកបានថ្លែងថា ការពង្រឹងការចូលរួមរបស់ពលរដ្ឋគឺជាចំណុចផ្តោតការយកចិត្តទុកដាក់មួយនៅក្នុងចំណោមផ្នែកសំខាន់ៗនានានៅក្នុងឯកសារក្របខ័ណ្ឌភាពជាដៃគូរបស់ធនាគារពិភពលោកប្រចាំនៅប្រទេសកម្ពុជា។
លោកស្រីបន្តថា៖ «ធនាគារពិភពលោកបានចាត់ទុកក្របខ័ណ្ឌគណនេយ្យភាពសង្គមរបស់រដ្ឋាភិបាលថា ជាកិច្ចខិតខំទូទៅដ៏សំខាន់មួយ សម្រាប់បំពេញទៅលើការវិនិយោគនៅក្នុងវិស័យអប់រំ សុខាភិបាល ការផ្គត់ផ្គង់ទឹកស្អាត និងសេវាដទៃទៀតតាមរយៈអភិក្រមជាលក្ខណៈប្រព័ន្ធ និងប្រកបដោយចីរភាព ដើម្បីប្រមែប្រមូលពលរដ្ឋឲ្យចូលរួមពាក់ព័ន្ធ និងពង្រឹងសមត្ថភាពរបស់អាជ្ញាធរថ្នាក់ក្រោមជាតិសំដៅធ្វើយ៉ាងណាតម្រូវឲ្យអ្នកផ្តល់សេវាមានគណនេយ្យភាពនៅក្នុងការបំពេញមុខងាររបស់ខ្លួន»។
លោក ង៉ាន ចំរើន រដ្ឋលេខាធិការ ក្រសួងមហាផ្ទៃ និងជាប្រធាននៃលេខាធិការដ្ឋានរបស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិថ្លែងថារាជរដ្ឋាភិបាលមានការប្តេជ្ញាចិត្តផ្នែកនយោបាយយ៉ាងមុតមាំក្នុងការអនុវត្តក្របខ័ណ្ឌគណនេយ្យភាពនេះ ដើម្បីពង្រឹងសិទ្ធិអំណាចដល់ពលរដ្ឋ និងដើម្បីពង្រីកគណនេយ្យភាពរបស់រដ្ឋបាលថ្នាក់ក្រោមឲ្យធ្វើការកែលម្អការផ្តល់សេវាសាធារណៈឲ្យកាន់តែមានប្រសិទ្ធភាព។
លោកថា៖ «ការពង្រីកវិសាលភាពគ្របដណ្តប់របស់ក្របខ័ណ្ឌគណនេយ្យភាពនឹងកាន់តែបង្កើនសមត្ថភាពរបស់រដ្ឋបាលថ្នាក់ក្រោមជាតិ ក្នុងការផ្តល់សេវាសាធារណៈឲ្យកាន់តែមានប្រសិទ្ធភាព និងកាន់តែមានគណនេយ្យភាពនៅក្នុងការឆ្លើយតបទៅតាមការវិវឌ្ឍប្រែប្រួលនូវសេចក្តីត្រូវការរបស់ពលរដ្ឋ និងវិស័យឯកជននាពេលអនាគត»។
តាមសេចក្តីប្រកាសព័ត៌មាន WB គម្រោងនានានៅក្រោមភាពជាដៃគូនេះគឺមានវិសាលភាពគ្របដណ្តប់លើអ្នកផ្តល់សេវាសាធារណៈដែលរួមមានសាលារៀន និងមណ្ឌលសុខភាពឃុំ សង្កាត់ ស្រុក និងរដ្ឋបាលក្រុងនៅក្នុងខេត្តចំនួន ១០ គឺខេត្តបន្ទាយមានជ័យ សៀមរាប ព្រះវិហារ កំពង់ធំ កំពង់ឆ្នាំង កណ្តាល ព្រៃវែង ស្វាយរៀង កែប និងព្រះសីហនុ។
លោក ដានីញែល សែលវ៉ាណាយ៉ាហ្កាម នាយកអង្គការទស្សនៈពិភពលោកអន្តរជាតិប្រចាំនៅកម្ពុជាបានថ្លែងថា ផ្អែកលើបទពិសោធ និងសមិទ្ធផល ដែលខ្លួនសម្រេចបានក្នុងប៉ុន្មានឆ្នាំមកនេះលោកជឿជាក់ថា ជំនួយថ្មីនេះនឹងកាន់តែពង្រឹងបានថែមទៀតនូវការឆ្លើយតបរបស់សេវាសាធារណៈ ដើម្បីបំពេញសេចក្តីត្រូវការរបស់អ្នកប្រើប្រាស់សេវា។
លោកថា៖ «ក្របខ័ណ្ឌគណនេយ្យភាពសង្គមនេះគឺជាយុគសម័យថ្មីមួយនៃការផ្តល់សេវាសាធារណៈដែលអមមកជាមួយនូវការលើកកម្ពស់ឲ្យមានកិច្ចសន្ទនាបែបស្ថាបនានៅតាមថ្នាក់មូលដ្ឋាន ដើម្បីធ្វើឲ្យមានការប្រែប្រួលយូរអង្វែងនៅក្នុងការផ្តល់សេវាសាធារណៈជាពិសេសសម្រាប់ក្រុមជនងាយរងគ្រោះ»៕
