.jpg)
WB អនុម័តផ្តល់ឥណទាន $១០០ លាន សម្រាប់គម្រោងកែលម្អផ្លូវ ដើម្បីបង្កើនលទ្ធភាពទទួលបានសេវា និងឱកាសសេដ្ឋកិច្ចរបស់សហគមន៍ជនបទ។ រូបថត MPWT
ភ្នំពេញៈ ក្រុមប្រឹក្សានាយកប្រតិបត្តិនៃធនាគារពិភពលោក (WB) បានអនុម័តផ្តល់ឥណទានចំនួន ១០០ លានដុល្លារអាមេរិកពីសមាគមអភិវឌ្ឍន៍អន្តរជាតិ (IDA) សម្រាប់ជួយគាំទ្រគម្រោងកែលម្អបណ្តាញផ្លូវគមនាគមន៍នៅប្រទេសកម្ពុជា ដើម្បីបង្កើនលទ្ធភាពទទួលបានសេវា និងឱកាសសេដ្ឋកិច្ចរបស់សហគមន៍ជនបទ។
យោងតាមសេចក្ដីប្រកាសព័ត៌មានស្ដីពីការផ្ដល់ឥណទានចេញកាលពីថ្ងៃទី ១៦ ខែកក្កដាឱ្យដឹងថា គម្រោងផ្ដល់ឥណទាននេះនឹងពង្រីកលទ្ធភាពសម្រាប់សហគមន៍ជនបទឱ្យទទួលបានសេវាចាំបាច់នានា ដូចជាមណ្ឌលសុខភាព មន្ទីរពេទ្យបង្អែក សាលារៀន និងទីផ្សារតាមរយៈការកែលម្អផ្លូវជនបទឱ្យកាន់តែមានភាពធន់ទៅនឹងកត្តាប្រែប្រួលអាកាសធាតុ។
ការកែលម្អនឹងត្រូវធ្វើទៅលើផ្នែកជាច្រើននៃផ្លូវជាតិ និងផ្លូវខេត្តដែលជាលទ្ធផល ជួយកាត់បន្ថយថ្លៃចំណាយលើការដឹកជញ្ជូន និងហានិភ័យគ្រោះថ្នាក់ដោយសារតែផ្លូវខូច និងជួយសម្រួលដល់ខ្សែចង្វាក់ផ្គត់ផ្គង់ក្នុងវិស័យកសិកម្ម និងការអភិវឌ្ឍវិស័យទេសចរណ៍។
លោកស្រី អ៊ីនហ្គូណា ដូប្រាចា ប្រធានគ្រប់គ្រង WB ប្រចាំកម្ពុជាថ្លែងថា កង្វះលទ្ធភាពសម្រាប់ទទួលបានសេវាមន្ទីរពេទ្យ សាលារៀន និងសម្រាប់ដឹកទំនិញទៅកាន់ទីផ្សារ ជាពិសេសក្នុងរដូវវស្សានៅតែចោទជាបញ្ហាប្រឈមធំមួយសម្រាប់ប្រជាជនកម្ពុជានៅតាមតំបន់ជនបទ។
លោកស្រីថ្លែងថា៖ «គម្រោងថ្មីនេះគឺជាការបន្តការប្តេជ្ញាចិត្តរបស់យើងក្នុងការជួយដល់ការអភិវឌ្ឍហេដ្ឋារចនាសម្ព័ន្ធផ្លូវរបស់កម្ពុជា។ វានឹងតភ្ជាប់កាន់តែប្រសើរជាងមុនដោយបានភ្ជាប់ប្រជាជនទៅនឹងការទទួលបានសេវា កាត់បន្ថយការដាច់ផ្លូវ និងបង្កើតការងារសម្រាប់សហគមន៍មូលដ្ឋានក្នុងពេលសាងសង់ផ្លូវដែលរួមចំណែកធ្វើឱ្យសេដ្ឋកិច្ចងើបឡើងវិញទៀតផង»។
សេចក្ដីប្រកាសព័ត៌មានដដែលបន្តថា ការចំណាយលើការដឹកជញ្ជូននៅប្រទេសកម្ពុជានៅតែមានកម្រិតខ្ពស់នៅឡើយ ទោះបីជាមានភាពប្រសើរច្រើនក្នុងប៉ុន្មានឆ្នាំចុងក្រោយនេះហើយក្តី។ ផ្លូវថ្នល់គឺជាមធ្យោបាយដឹកជញ្ជូននាំមុខគេនៅក្នុងប្រទេសហើយចាំបាច់ត្រូវមានការវិនិយោគច្រើនជាពិសេសនៅតាមតំបន់ជនបទ។
ផ្លូវជនបទមានជាង ៧៥ ភាគរយ នៃបណ្តាញផ្លូវសរុបទូទាំងប្រទេស ប៉ុន្តែមានតែ ៥ ភាគរយប៉ុណ្ណោះដែលជាផ្លូវក្រាលកៅស៊ូ។ ការប្រែប្រួលអាកាសធាតុបានធ្វើឱ្យមានភ្លៀង និងទឹកជំនន់ធំៗបង្កហានិភ័យខូចខាតកាន់តែខ្លាំងដល់ប្រព័ន្ធផ្លូវនៅជនបទ។
WB ឱ្យដឹងតាមរយៈសេចក្តីប្រកាសនេះទៀតថា ការវិភាគអំពីស្ថានភាពប្រើប្រាស់ផ្លូវជនបទដែលត្រូវបានធ្វើឡើងតាមរយៈគម្រោងនេះបង្ហាញថា ក្នុងរដូវទឹកជំនន់ជាង ២៦ ភាគរយនៃប្រជាជនរស់នៅក្នុងតំបន់របស់គម្រោងប្រឈមនឹងហានិភ័យគ្មានផ្លូវប្រើសម្រាប់ទៅរកសេវាបន្ទាន់ផ្នែកសុខាភិបាល និងសាលារៀន។
ក្រៅពីនោះ ១៨ ភាគរយទៀតត្រូវចំណាយពេល ៣០ នាទី ឬច្រើនជាងនេះសម្រាប់ធ្វើដំណើរទម្រាំទៅដល់មន្ទីរពេទ្យ ដែលជាស្ថានភាពប្រឈមនឹងភាពស្លាប់រស់មួយ។ ការជ្រើសរើសផ្លូវសម្រាប់ការវិនិយោគនៃគម្រោងនេះ ផ្តល់អាទិភាពដល់ផ្លូវទាំងឡាយណាដែលតភ្ជាប់ផ្ទះអ្នកស្រុកជាមួយមន្ទីរពេទ្យ សាលារៀន និងទីផ្សារ។
តាមសេចក្ដីប្រកាសព័ត៌មានដដែលតំបន់គោលដៅរបស់គម្រោងនេះមានផ្លូវនៅក្នុងខេត្តកំពង់ចាម ត្បូងឃ្មុំ និងក្រចេះដែលគ្របដណ្តប់លើប្រជាជនជាង ២ លាននាក់ក្នុងនោះ ៨០ ភាគរយរស់នៅតាមទីជនបទដាច់ស្រយាល។ គម្រោងនេះក៏នឹងជួយក្រសួងសាធារណការ និងដឹកជញ្ជូន និងក្រសួងអភិវឌ្ឍន៍ជនបទ (ដែលក្រសួងទាំង ២ នេះជាភ្នាក់ងារអនុវត្តគម្រោង) ក្នុងការអភិវឌ្ឍផ្នែកស្ថាប័នផងដែរ។
ក្នុងនោះមាន ការរៀបចំយុទ្ធសាស្ត្រហិរញ្ញប្បទានផ្លូវធន់នឹងអាកាសធាតុ ការជួយដល់ក្រសួងទាំងពីរក្នុងការអនុវត្តផែនការ សកម្មភាពបញ្ជ្រាបយេនឌ័ររបស់ក្រសួងទាំង ២ និងការគ្រប់គ្រងកិច្ចសន្យាផ្អែកលើលទ្ធផលការងារសម្រាប់ការថែទាំផ្លូវធ្វើឱ្យហេដ្ឋារចនាសម្ព័ន្ធកាន់តែមានចីរភាពល្អប្រសើរ។
លោកស្រី លឹម សុខជា ទីប្រឹក្សាជាន់ខ្ពស់អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោកបានលើកឡើងថា អង្គការសង្គមស៊ីវិលដែលធ្វើការងារផ្នែកសុវត្ថិភាពចរាចរណ៍ផ្លូវគោកតែងតែជំរុញ និងបំផុសដល់រាជរដ្ឋាភិបាលឲ្យកាត់ឥណទាន ឬជំនួយដែលទទួលបានពីម្ចាស់ជំនួយផ្សេងៗចំនួន ១០ ភាគរយសម្រាប់ទុកប្រើប្រាស់ក្នុងការអប់រំផ្សព្វផ្សាយពីបញ្ហាសុវត្ថិភាពចរាចរណ៍ផ្លូវគោកដល់ប្រជាពលរដ្ឋ។
លោកស្រីថ្លែងថា៖ «យើងចង់ឱ្យបំពាក់បរិក្ខារចរាចរណ៍មួយចំនួននៅលើដងផ្លូវដើម្បីបង្កើនការប្រុងប្រយ័ត្ន និងការការពារដល់ប្រជាពលរដ្ឋស្របពេលដែលពួកគាត់ត្រូវបំប្លែងខ្លួនមកប្រើប្រាស់ផ្លូវដែលមានស្ដង់ដា។ ព្រោះនៅពេលដែលផ្លូវអភិវឌ្ឍរួចពលរដ្ឋមានឥរិយាបថក្នុងការបើកបរហួសល្បឿនកំណត់ដែលអាចបង្កជាគ្រោះថ្នាក់ចរាចរណ៍»។
លោក ឈួន វន់ អគ្គនាយកដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនថ្លែងកាលពីម្សិលមិញថា ទោះបីក្នុងដំណាក់កាលណាក៏ដោយ រាជរដ្ឋាភិបាលតែងតែបន្តពង្រឹងកិច្ចសហប្រតិបត្ដិការជាមួយដៃគូអភិវឌ្ឍន៍ផ្សេងៗ ជាពិសេសក្នុងគម្រោងនៃការអភិវឌ្ឍហេដ្ឋារចនាសម្ព័ន្ធនានា។
លោកថ្លែងថា៖ «ក្នុងនោះមិនមែនមានតែគម្រោងជាមួយធនាគារពិភពលោក ឬធនាគារអភិវឌ្ឍន៍អាស៊ីនោះទេគឺមានដៃគូអភិវឌ្ឍន៍ជាច្រើនទៀតដើម្បីសហការគ្នាក្នុងការអភិវឌ្ឍពិសេសលើគម្រោងកសាងហេដ្ឋារចនាសម្ព័ន្ធ»៕
វីដេអូ៖
