.jpg)
ខ្លាពពក ត្រូវបានថតជាប់នៅក្នុងតំបន់ខ្ពង់រាបភាគខាងជើងនៃប្រទេសកម្ពុជា ស្ថិតក្នុងភូមិសាស្ត្រស្រុកឆែប ខេត្តព្រះវិហារ កាលពីឆ្នាំ ២០១២-២០១៣។ រូបថត WCS Cambodia
ភ្នំពេញៈ អង្គការសមាគមអភិរក្សសត្វព្រៃនៅកម្ពុជា (WCS) និងក្រសួងបរិស្ថានបានអំពាវនាវជាថ្មីទៀតដល់គ្រប់ភាគីពាក់ព័ន្ធឲ្យចូលរួមការពារ និងអភិរក្សសត្វខ្លាពពក (Clouded leopard) និងទីជម្រករបស់វាឲ្យបានល្អ ខណៈសត្វដ៏កម្រ និងកំពុងរងការគំរាមកំហែងជិតផុតពូជនេះ មាននៅសេសសល់តិចតួចបំផុតក្នុងពិភពលោក។
លោក កែន សិរីរដ្ឋា ប្រធានអង្គការ WCS-Cambodia ប្រាប់ភ្នំពេញប៉ុស្តិ៍កាលពីថ្ងៃទី ៦ ខែសីហា ថា ខ្លាពពកត្រូវបានកត់ត្រាក្នុងបញ្ជីរបស់អង្គការ IUCN ជាប្រភេទសត្វកំពុងរងការគំរាមកំហែងនៅលើពិភពលោក។ បច្ចុប្បន្ន ខ្លាពពក ត្រូវបានគេកត់ត្រាថា នៅមានសេសសល់ប្រមាណជាង ១០ ០០០ ក្បាលប៉ុណ្ណោះនៅលើពិភពលោក។
ដោយឡែកនៅកម្ពុជាវត្តមានខ្លាពពកមាននៅភូមិភាគឦសាន និរតី និងភាគខាងជើងនៃប្រទេស។ លោកបញ្ជាក់ថា៖ «រហូតមកទល់ពេលនេះពុំទាន់មានការសិក្សាអំពីចំនួនប្រភេទសត្វនេះ [ខ្លាពពក] នៅឡើយទេនៅកម្ពុជា ប៉ុន្តែយើងយល់ថា ចំនួនខ្លាពពកមាននៅសល់តិចតួចប៉ុណ្ណោះនៅតាមតំបន់មួយចំនួននៃប្រទេសកម្ពុជា ហើយចំនួនរបស់វាមានការថយចុះច្រើន ដោយសារការបាត់បង់ជម្រកធម្មជាតិការខ្វះសត្វជាចំណីរបស់វាក្នុងធម្មជាតិ ការបរបាញ់។ល។ ខ្លាពពកជាប្រភេទសត្វកំពុងរងការគំរាមកំហែង (VU)»។
លោក សិរីរដ្ឋា ឲ្យដឹងទៀតថា កាលពីឆ្នាំ ២០១២-២០១៣ លោក អៃ ស៊ុហ្ស៊ុគី (Ai Suzuki) ក្នុងអំឡុងពេលចុះធ្វើកម្មសិក្សាថ្នាក់បណ្ឌិតគាំទ្រដោយអង្គការ WCS សហការជាមួយរដ្ឋបាលព្រៃឈើបានបំពាក់កាមេរ៉ាតាមដើមឈើ ហើយបានថតជាប់សត្វខ្លាពពកនេះនៅក្នុងតំបន់ខ្ពង់រាបភាគខាងជើងនៃប្រទេសកម្ពុជា ស្ថិតក្នុងភូមិសាស្ត្រស្រុកឆែប ខេត្តព្រះវិហារ។ ក្រៅពីវត្តមានសត្វខ្លាពពក ក្រុមការងារក៏បានថតជាប់ប្រភេទសត្វកម្រ ៣០ ប្រភេទទៀតរួមមានសត្វដំរីអាស៊ី ខ្លាឃ្មុំខ្មៅ ខ្លាឃ្មុំព្រះអាទិត្យ សត្វខ្ទីង និងប្រភេទសត្វស្លាបមួយចំនួនទៀតនៅក្នុងតំបន់នោះផងដែរ។
លោកបន្ថែមថា៖ «តំបន់ខ្ពង់រាបភាគខាងជើងនៃប្រទេសកម្ពុជា គឺជាជម្រកដ៏សំខាន់សម្រាប់សត្វព្រៃដែលជិតផុតពូជជាសកល និងជាច្រករបៀងសត្វព្រៃធម្មជាតិរស់នៅ»។
បើតាមលោក សិរីរដ្ឋា សត្វខ្លាពពក ត្រូវបានគេប្រទះឃើញមានវត្តមានចាប់ពីតំបន់ភ្នំហិមាល័យឆ្លងកាត់ភូមិភាគអាស៊ីអាគ្នេយ៍ បន្តរហូតដល់ភាគខាងត្បូងនៃប្រទេសចិន និងក៏មាននៅប្រទេសប៊ុយតាន ឥណ្ឌា ឥណ្ឌូនេស៊ី ឡាវ ម៉ាឡេស៊ី ភូមា នេប៉ាល់ ថៃ កម្ពុជា និងវៀតណាម។
លោកបន្តថា ដោយសាររោមរបស់វាមានភាពទាក់ទាញ សត្វខ្លាពពកដែលជាអម្បូរសត្វឆ្មាដ៏ស្រស់ស្អាតនេះបានក្លាយជាគោលដៅរបស់អ្នកប្រមាញ់ ហើយការបរបាញ់ខុសច្បាប់រួមទាំងការបំផ្លាញទីជម្រករបស់ពួកវាបានក្លាយជាកត្តារួមចំណែកដល់ការធ្លាក់ចុះនៃចំនួនរបស់ពួកវានៅក្នុងព្រៃ។ អ្នកវិទ្យាសាស្ត្រ និងអ្នកអភិរក្សកំពុងធ្វើការឈ្វេងយល់បន្ថែមអំពីចំនួនសត្វខ្លាពពក ដែលគេពិបាកនឹងរកឃើញវាណាស់ ព្រោះវាចេញរកស៊ីនៅពេលយប់»។
ដើម្បីការពារប្រភេទសត្វកម្រ និងជិតផុតពូជរួមទាំងព្រៃឈើ ជីវចម្រុះ ដែលស្ថិតក្នុងតំបន់ដែនជម្រកសត្វព្រៃក៏ដូចជាតំបន់ការពារ និងរបៀងជីវចម្រុះទាំងអស់នៅកម្ពុជាឲ្យស្ថិតនៅគង់សម្រាប់ជាប្រយោជន៍សម្រាប់មនុស្សជាតិជំនាន់ក្រោយនោះ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានអំពាវនាវដល់ពលរដ្ឋឲ្យចូលរួមការការពារ និងអភិរក្សសត្វព្រៃដោយបញ្ឈប់ការកាប់ទន្ទ្រាន ដីព្រៃ បរបាញ់ ដាក់អន្ទាក់ និងបរិភោគសាច់សត្វព្រៃ៕
