មណ្ឌលគិរីៈ គម្រោងស្រូវសត្វត្រយងរបស់អង្គការសមាគមអភិរក្សសត្វព្រៃនៅកម្ពុជា (WCS) បាននិងកំពុងពង្រីកគម្រោងនៅដែនជម្រកសត្វព្រៃកែវសីមា ខេត្តមណ្ឌលគិរីដោយមានកសិករចំនួន ៧៨ គ្រួសារចូលរួមជាសមាជិក បន្ទាប់ពីអនុវត្តទទួលបានជោគជ័យពីខេត្តព្រះវិហារ និងដែនជម្រកសត្វព្រៃនៅស្រុកសៀមប៉ាង ខេត្តស្ទឹងត្រែង។
លោក កែន សិរីរដ្ឋា ប្រធានអង្គការ WCS ថ្លែងពីម្សិលមិញថា គម្រោងស្រូវសត្វត្រយងរបស់អង្គការ WCS ត្រូវបានពង្រីកគម្រោងមកកាន់ដែនជម្រកសត្វព្រៃកែវសីមា ឃុំស្រែព្រះ ស្រុកកែវសីមា ខេត្តមណ្ឌលគិរី ពីអំឡុងឆ្នាំ ២០១៩ ដែលជាឆ្នាំនៃការសាកល្បងគម្រោងមានកសិករចូលរួមតែ ២៩ គ្រួសារទេ។ ប៉ុន្តែរហូតមកដល់ឆ្នាំ ២០២០ មានកសិករចូលជាសមាជិកចំនួន ៧៨ គ្រួសារមកពី ៣ ភូមិ រួមមាន ភូមិពូចារ ភូមិពូគង់ និងភូមិអូរច្រាល។
បើតាមលោក កែន សិរីរដ្ឋា ការអនុវត្តគម្រោងនៅខេត្តមណ្ឌលគិរីនេះ បន្ទាប់ពីអនុវត្តទទួលបានជោគជ័យពីដែនជម្រកសត្វព្រៃគូលែនព្រហ្មទេព ខេត្តព្រះវិហារ និងដែនជម្រកសត្វព្រៃសៀមប៉ាងនៅស្រុកសៀមប៉ាង ខេត្តស្ទឹងត្រែង។ កសិករដែលជាសមាជិកនៃគម្រោងទទួលបានការទទួលទិញស្រូវពីពួកគាត់មកវិញក្នុងតម្លៃខ្ពស់ជាងទីផ្សារក្នុងចន្លោះពី ១២០០ រៀល ទៅ ១៧០០ រៀលក្នុង ១ គីឡូក្រាមទៅតាមប្រភេទស្រូវនីមួយៗ។
លោក សិរីរដ្ឋា បញ្ជាក់ថា៖ «យើងតម្រូវឱ្យកសិករដែលជាសមាជិកអនុវត្តតាមគោលការណ៍សំខាន់ៗ ដែលផ្សារភ្ជាប់ជាមួយនឹងការគោរពបរិស្ថាន ការពារធនធានធម្មជាតិ។ ជាពិសេសត្រូវដាំស្រូវដោយគោរពទៅតាមគោលការណ៍សរីរាង្គ ដែលមិនប្រើប្រាស់ជីគីមី ថ្នាំគីមី និងថ្នាំសម្លាប់សត្វល្អិតមួយចំនួនទៀតលើការដាំដុះរបស់ពួកគាត់ ហើយយើងតាមដានសកម្មភាពធ្វើស្រែពួកគាត់ជាប្រចាំ»។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានពីម្សិលមិញមិនអាចទាក់ទងសុំការបញ្ជាក់បន្ថែមជុំវិញគម្រោងនេះបានទេ។
ប៉ុន្ដែលោកថ្លែងក្នុងអំឡុងពេលទស្សនកិច្ចគម្រោងស្រូវសត្វត្រយងនៅខេត្តមណ្ឌលគិរីកាលពីថ្ងៃទី ៧ ខែតុលា ថាក្នុងនាមក្រសួងបរិស្ថានលោកគាំទ្រចំពោះគោលការណ៍ និងលក្ខខណ្ឌដែលគម្រោងស្រូវសត្វត្រយង បានដាក់ចេញឱ្យប្រជាកសិករអនុវត្ត និងគោរពតាមគោលការណ៍ពីអ្នកទទួលទិញស្រូវកសិករមកវិញក្នុងតម្លៃខ្ពស់ជាងទីផ្សារ។
លោកថា កត្តាដែលជំរុញឱ្យកសិករចូលរួមក្នុងគម្រោងនេះ ព្រោះពួកគាត់បានសម្លឹងឃើញពីសារប្រយោជន៍របស់គម្រោងស្រូវសត្វត្រយង។ គម្រោងនេះធ្វើឱ្យពួកគាត់លក់ស្រូវបានតម្លៃថ្លៃដោយគ្រាន់តែគោរពតាមគោលការណ៍ ដែលកំណត់ដោយអង្គការ WCS លើកិច្ចការងាររក្សាឱ្យបានការពារបរិស្ថាន ធនធានធម្មជាតិ និងសត្វព្រៃ។ លើសពីនេះត្រូវប្រើប្រាស់ដីដែលមិនមែនបានពីការកាប់ទន្ទ្រានកាន់កាប់ដីព្រៃនោះទេ។
លោក ភក្ត្រា បញ្ជាក់ថា៖ «កសិករត្រូវគោរពទៅនឹងគោលការណ៍ដាំដុះដែលមានបច្ចេកទេស ដោយមានការបង្ហាត់បង្រៀនពីសំណាក់មន្ត្រីជំនាញអង្គការ WCS និងដៃគូអភិវឌ្ឍន៍ ដើម្បីធ្វើឱ្យស្រូវដែលដាំដុះទាំងអស់នោះមានគុណភាព និង បង្ហាញពីការគោរពទៅតាមបទដ្ឋានបច្ចេកទេសត្រឹមត្រូវក៏ដូចជាឆ្លើយតបតាមការកំណត់ពីប្រទេសអ្នកបញ្ជាទិញស្រូវនេះ»។
លោក ភក្ត្រា ស្នើ WCS ពង្រីកគម្រោងស្រូវសត្វត្រយងនេះទៅតំបន់ផ្សេងៗទៀត ដែលមានតំបន់ការពារធម្មជាតិដែលអង្គការបានចុះកិច្ចព្រមព្រៀងជាមួយក្រសួងបរិស្ថាន ដើម្បីពង្រីកការផលិតស្រូវសរីរាង្គ។ ជាពិសេសបង្កើន ជីវភាពរបស់ប្រជាពលរដ្ឋមូលដ្ឋាន និងការពារបរិស្ថាន។ ចំណុចទាំងនេះ គឺជាគោលនយោបាយរបស់រាជរដ្ឋាភិបាលកម្ពុជាក្នុងការបង្កើនសេដ្ឋកិច្ចមូលដ្ឋាន ឬការផ្តល់មុខរបរថ្មីជូនប្រជាពលរដ្ឋ។
លោក ក្លូត កែ អាយុ ៥១ ឆ្នាំពលរដ្ឋរស់នៅភូមិពូចារ ឃុំស្រែព្រះប្រាប់ពីម្សិលមិញថា គ្រួសារលោកបានចូលជាសមាជិកគម្រោងស្រូវសត្វត្រយងនៅអំឡុងឆ្នាំ ២០១៩ ដោយបានប្រមូលផលស្រូវម្ដងរួចហើយ។ លោកសង្កេតឃើញថា មានភាពខុសគ្នាឆ្ងាយមុនពេលចូលជាសមាជិកគម្រោង និងអំឡុងពេលចូលជាសមាជិកពោលគឺពេលចូលជាសមាជិក លោកបានទទួលផលស្រូវច្រើនជាងរៀងរាល់ឆ្នាំ ថែមទាំងលក់ស្រូវបានតម្លៃខ្ពស់ផងដែរ។
លោកបញ្ជាក់ថា៖ «គម្រោងនេះធ្វើឱ្យគ្រួសារខ្ញុំទទួលបានប្រាក់ចំណេញពី ការលក់ស្រូវច្រើនជាងមុន ហើយស្រូវក៏លក់បានតម្លៃខ្ពស់ជាងមុនដែរ។ លើសពីនេះទៀត ខ្ញុំក៏បានរៀនសូត្រពីបច្ចេកទេសជាច្រើនជាមួយអង្គការ WCS ដើម្បីបង្កបង្កើនផលស្រូវ ហើយខ្ញុំសូមអំពាវនាវឱ្យមានគម្រោងបែបនេះរហូត ហើយពង្រីកទៅកាន់តំបន់ផ្សេងៗព្រោះធ្វើឱ្យជីវភាពពួកខ្ញុំធូរធារជាងមុនច្រើន»៕