.jpg)
កម្មកររោងចក្រធ្វើតេស្តរកមេរោគផ្លូវដង្ហើមកូវីដ ១៩ នៅវិទ្យាល័យជម្ពូវ័ន កាលពីខែមេសា។ ហេង ជីវ័ន
ភ្នំពេញៈ អង្គការសុខភាពពិភពលោក (WHO) បានលើកឡើងថា កម្ពុជាខិតខំប្រឹងប្រែងយ៉ាងខ្លាំង និងបានចាត់វិធានការបានឆាប់រហ័ស និងមានប្រសិទ្ធភាពក្នុងការឆ្លើយតបជំងឺកូវីដ ១៩ ដែលបានធ្វើឱ្យប្រទេសនេះ គ្មានអ្នកស្លាប់ និងគ្មានការឆ្លងនៅក្នុងសហគមន៍។ ប៉ុន្តែ WHO បានព្រមានថា កម្ពុជានៅតែបន្តប្រឈមនឹងហានិភ័យខ្ពស់នៃជំងឺឆ្លងនេះនៅឡើយ។
នៅក្នុងរបាយការណ៍ចេញផ្សាយកាលពីថ្ងៃទី ២៩ ខែឧសភា ស្ដីពីការឆ្លើយតបរយៈពេល ១០០ ថ្ងៃ របស់ប្រទេសកម្ពុជា ទៅនឹងជំងឺកូវីដ ១៩ WHO បានកោតសរសើរដល់រដ្ឋាភិបាលកម្ពុជារួមទាំងក្រុមការងារពាក់ព័ន្ធទាំងអស់ មកពីក្រសួងសុខាភិបាល និងដៃគូសហការខាងបច្ចេកទេស ដែលបានរួមចំណែកធ្វើឱ្យមានការឆ្លើយតបទទួលបានជោគជ័យទៅនឹងជំងឺឆ្លងកូវីដ ១៩ នាពេលកន្លងមក។
ទោះជាយ៉ាងណា WHO បានព្រមានថា ប្រទេសកម្ពុជា បន្តស្ថិតក្នុងដំណាក់កាលដំបូងនៃការរីករាលដាលនៃជំងឺរាតត្បាតនេះនៅឡើយ ដែលចាំបាច់ត្រូវបន្តខិតខំប្រឹងប្រែងដើម្បីត្រៀមខ្លួនឆ្លើយតបចំពោះការឆ្លងក្នុងសហគមន៍ទ្រង់ទ្រាយធំ។
WHO បានសរសេរថា៖ «ទោះបីជាកម្ពុជាកំពុងគ្រប់គ្រងបានកុំឱ្យមានការរីករាលដាលនៃជំងឺកូវីដ ១៩ នៅក្នុងប្រទេសរបស់ខ្លួនក៏ដោយ ប៉ុន្តែវានៅតែមានសារៈសំខាន់សម្រាប់កម្ពុជាដែលត្រូវតែត្រៀមខ្លួនបន្តសម្រាប់ការឆ្លើយតបទៅនឹងជំងឺនេះ ក៏ដូចជា ការគំរាមកំហែងសុខភាពនាពេលអនាគត»។
WHO បន្តថា ហានិភ័យនៃការឆ្លងរីករាលដាលនៅកម្ពុជាគឺនៅតែមានកម្រិតខ្ពស់នៅឡើយ ព្រោះថាករណីនាំចូលពីក្រៅប្រទេសមកកម្ពុជាគឺនៅតែអាចកើតមានទៀត ខណៈប្រទេសជាច្រើនកំពុងមានការឆ្លងនៅតាមសហគមន៍នៅឡើយ។
WHO បន្តថា៖ «ជំងឺរាតត្បាតនេះនឹងមិនបញ្ចប់ឆាប់ៗនេះឡើយ ហើយវានឹងបញ្ចប់គឺនៅពេលណាដែលពិភពលោកទាំងមូលលែងមានការចម្លងតទៅទៀត ដែលនេះមានន័យថា ពួកយើងត្រូវតែបន្តពង្រឹងការត្រៀមខ្លួន ដើម្បីថែរក្សាសុខភាព និងប្រព័ន្ធសុខាភិបាលសាធារណៈក្នុងឱកាសដ៏ល្អមុនពេលកើតមានរលកថ្មីនៃការចម្លងនាពេលខាងមុខ»។
កម្ពុជាបានរាយការណ៍ថា មានអ្នកឆ្លងជំងឺកូវីដ១៩សរុបចំនួន ១២៥ នាក់ ក្នុងនោះ ១២៣ នាក់ ត្រូវបានព្យាបាលជាសះស្បើយគិតចាប់តាំងពីបានរកឃើញករណីដំបូងដែលជាការនាំចូលជំងឺកូវីដ ១៩ ពីប្រទេសចិន កាលពីថ្ងៃទី ២៧ ខែ មករា ឆ្នាំ ២០២០។ ក្រសួងសុខាភិបាលបានបញ្ជាក់ថា ការរកឃើញករណីឆ្លងជំងឺកូវីដ ១៩ នៅកម្ពុជាគឺភាគច្រើនលើសលប់ជាការនាំចូលពីក្រៅប្រទេស។
របាយការណ៍ពី WHO បញ្ជាក់ថា កម្ពុជាកំណត់អត្តសញ្ញាណនៃការឆ្លងជាចង្កោមធំៗចំនួន ៥ ដែលមានន័យថា ចំនួនអ្នកឆ្លងជំងឺកូវីដ ១៩ ច្រើននាក់បានជាប់ពាក់ព័ន្ធនឹងការប៉ះពាល់ផ្ទាល់ជាមួយប្រភពនៃការឆ្លងតែមួយដូចជា អ្នកឆ្លង ៧ នាក់ នៅលើនាវាទេសចរណ៍ឈ្មោះ Viking Mekong ដែលធ្វើដំណើរចេញពីប្រទេសវៀតណាម និងជាករណីឆ្លងជាចង្កោមលើកដំបូងនៅកម្ពុជា។
ចង្កោមទី ២ គឺមនុស្ស ៣៤ នាក់ បានឆ្លងជំងឺកូវីដ ១៩ បន្ទាប់ពីធ្វើដំណើរទៅចូលរួមកម្មវិធីសាសនាមួយនៅក្នុងប្រទេសម៉ាឡេស៊ី និងបន្ទាប់មកអ្នកទាំងនោះបានចម្លងទៅដល់អ្នកដែលប៉ះពាល់ផ្ទាល់ចំនួន ៩ នាក់ទៀត។ ចង្កោមទី ៣ គឺមនុស្សចំនួន ៣១ នាក់ បានឆ្លងស្ថិតក្នុងចំណោមក្រុមទេសចរជនជាតិបារាំងមួយទៅកាន់ខេត្តព្រះសីហនុ ហើយបានធ្វើឱ្យឆ្លងទៅដល់អ្នកប៉ះពាល់ផ្ទាល់ចំនួន ៨ នាក់ថែមទៀត។
ចំណែកចង្កោមទី ៤ គឺមួយករណីនាំចូលពីប្រទេសថៃ ហើយបានចម្លងទៅដល់មនុស្សដែលមានទំនាក់ទំនងជាប្រពៃណីចំនួន ៤ នាក់ទៀត ហើយចង្កោមទី ៥ គឺអ្នកដំណើរជនជាតិចិនមកពីទីក្រុង Guangzhou ដែលបានចម្លងទៅដល់អ្នកប៉ះពាល់ផ្ទាល់ចំនួន ៤ នាក់ទៀត។
វីដេអូ៖
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលធ្លាប់បានបញ្ជាក់ថា ថ្វីដ្បិតកម្ពុជាមានករណីជំងឺកូវីដ ១៩ តិចតួចក្តី ប៉ុន្តែកម្ពុជាមិនទាន់ឆ្លងផុតអំពីជំងឺនេះនៅឡើយ ដែលតម្រូវឱ្យពលរដ្ឋផ្លាស់ប្ដូរឥរិយាបថរស់នៅជាចាំបាច់ឱ្យស្របទៅតាមស្ថានការណ៍នៃជំងឺកូវីដ ១៩។
មន្ត្រីរូបនេះបញ្ជាក់ថា ពលរដ្ឋត្រូវប្រកាន់ភ្ជាប់នឹងវិធានការការពារខ្លួនចំនួន ៣ ចំណុចសំខាន់គឺទី១ ធ្វើអនាម័យដៃស្អាត ទី២ ពាក់ម៉ាស់ ឬក្រមានៅពេលចាំបាច់ ឬនៅពេលកណ្ដាស់ ឬក្អក និងទី៣ ត្រូវបន្តរក្សាគម្លាតសុវត្ថិភាពនៅពេលជួបជុំ។
អង្គការសុខភាពពិភពលោកបន្តជំរុញឱ្យកម្ពុជាត្រូវបន្តផ្តោតលើការត្រួតពិនិត្យច្រកចូលនៅតាមអាកាសយានដ្ឋាន និងតាមច្រកព្រំដែន ពង្រីកការឃ្លាំមើលជំងឺ ពង្រឹងមន្ទីរពិសោធន៍ និងពង្រឹងសមត្ថភាពឆ្លើយតប និងតាមដាននៅតាមខេត្ត ស្រុក និងសហគមន៍ និងបន្តធ្វើឱ្យប្រសើរឡើងនូវទំនាក់ទំនងដែលមានហានិភ័យ នៅពេលស្ថានភាពកំពុងវិវត្ត។
កាលពីថ្ងៃម្សិលមិញនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានបញ្ជាក់ថា ពលរដ្ឋត្រូវបន្តពន្យារពេលរៀបអាពាហ៌ពិពាហ៌ ពិធីជប់លៀង និងការចាក់ធុងបាសរាំដោយសារតែនៅប្រទេសជិតខាង និងពិភពលោកកំពុងបន្តរាតត្បាតដោយជំងឺកូវីដ១៩ខ្លាំងក្លានៅឡើយ។
គិតត្រឹមថ្ងៃម្សិលមិញនៅទូទាំងពិភពលោក អ្នកឆ្លងជំងឺកូវីដ ១៩ កើនលើសពី ៦,១ លាននាក់ ក្នុងនោះមានអ្នកជាសះស្បើយជាង ៤០ ភាគរយ និងអ្នកស្លាប់កើនដល់ប្រមាណ ៣២ ម៉ឺននាក់៕
