.jpg)
សកម្មភាពគាំទ្របរិស្ថានគ្មានផ្សែងបារីកាលពីកន្លងមក ។ ហេង ជីវ័ន
ភ្នំពេញ៖ អង្គការសុខភាពពិភពលោកប្រចាំកម្ពុជាចេញសារអបអរសាទរទិវាពិភពលោកគ្មានថ្នាំជក់ថ្ងៃទី ៣១ ខែឧសភាឆ្នាំ ២០២១ នេះ ដោយបានអំពាវនាវឱ្យមានសកម្មភាពខ្លាំងក្លាបន្ថែមទៀត ដើម្បីប្រយុទ្ធប្រឆាំងនឹងការរីករាលដាលនៃថ្នាំជក់សម្រាប់ការពារមនុស្សជំនាន់ក្រោយ។
ដើម្បីចូលរួមប្រារព្ធទិវាពិភពលោកគ្មានថ្នាំជក់ក្នុងឆ្នាំនេះ អង្គការសុខភាពពិភពលោក (WHO) បានកំណត់យកប្រធានបទ “ការផ្ដាច់បារី” ស្របពេលដែលការជក់បារី ត្រូវបានគេចាត់ទុកកត្តាផ្សារភ្ជាប់ជាមួយនឹងការកើនឡើងនៃភាពធ្ងន់ធ្ងរនៃជំងឺ និងការស្លាប់ចំពោះអ្នកជំងឺកូវីដ១៩ ដែលកំពុងសម្រាកព្យាបាលនៅមន្ទីរពេទ្យ។
អង្គការសុខភាពពិភពលោកប្រចាំកម្ពុជាបានសរសេរនៅលើគេហទំព័ររបស់ខ្លួន ដើម្បីចូលរួមអបអរទិវានេះយ៉ាងដូច្នេះថា «ការចំណាយលើថ្នាំជក់ ធ្វើឱ្យបាត់បង់ជីវិត បណ្តាលឱ្យខាតបង់សេដ្ឋកិច្ច និងរួមចំណែកដល់ការរេចរឹលនៃបរិស្ថាន និងបង្កការគំរាមកំហែងយ៉ាងខ្លាំងដល់ការអភិវឌ្ឍប្រកបដោយចីរភាព។
អង្គការនេះបន្តថា ក្នុងបរិបទប្រទេសកម្ពុជា ថ្នាំជក់បានធ្វើឱ្យប្រជាជនកម្ពុជាប្រមាណ ២,៤ លាននាក់ ឬ ២២ ភាគរយនៃប្រជាជន ដែលមានអាយុលើសពី ១៥ ឆ្នាំឡើងទៅ ប្រើប្រាស់ទម្រង់ណាមួយនៃប្រភេទថ្នាំជក់ ហើយប្រឈមនឹងហានិភ័យខ្ពស់នៃជំងឺនិងការស្លាប់មុនអាយុ ព្រមទាំងភាពក្រីក្រ។
តាមរបាយការណ៍របស់ (WHO) បានអះអាងថា ជារៀងរាល់ឆ្នាំ ថ្នាំជក់បានបណ្តាលឱ្យមនុស្សស្លាប់ចំនួន ១៥ ០០០ នាក់ ដែល ១ ភាគ ៣ នៃអ្នកស្លាប់នេះ គឺស្ថិតក្នុងចំណោមប្រជាជនក្រីក្របំផុតនៅកម្ពុជា។ ជាលទ្ធផលអង្គការមួយនេះ បានមើលឃើញថា ប្រទេសកម្ពុជាទទួលរងនូវការខាតបង់សេដ្ឋកិច្ចប្រចាំឆ្នាំចំនួន ២,៧ ពាន់ពាន់លានរៀល ឬស្មើនឹង ៦៦៣ លានដុល្លារ ដែលស្មើនឹង ៣ ភាគរយនៃផលិតផលក្នុងស្រុកសរុបរបស់កម្ពុជា ដោយសារការប្រើប្រាស់ថ្នាំជក់។
ដូច្នេះដើម្បីអាចស្រោចស្រង់ផលវិបត្តិទាំងនេះបានអង្គការសុខភាពពិភពលោកអំពាវនាវឱ្យភាគីពាក់ព័ន្ធគួរបង្កើនសកម្មភាពឱ្យបានខ្លាំងក្លាបន្ថែមទៀត ដើម្បីប្រយុទ្ធប្រឆាំងនឹងការរីករាលដាលនៃថ្នាំជក់សម្រាប់ការពារមនុស្សជំនាន់ក្រោយ។
អង្គការនេះបានបញ្ជាក់ថា៖ «អ្វីដែលត្រូវមានសកម្មភាពបន្ថែមទៀតគឺ ដំឡើងពន្ធលើថ្នាំជក់យ៉ាងតិច ៧៥ ភាគរយនៃតម្លៃលក់រាយជាមួយនឹងការកើនឡើងជាប្រចាំ ដើម្បីធ្វើឱ្យអតិផរណាកើនឡើង និងកំណើនប្រាក់ចំណូល។ បែងចែកចំណូលពន្ធថ្នាំជក់ ដើម្បីជាវិធានការគាំទ្រដល់ជនក្រីក្រ ដូចជា ការផ្តល់ធានារ៉ាប់រងសុខភាពជាសកល គាំទ្រដល់កសិករ និងកម្មករដែលធ្វើការក្នុងវិស័យថ្នាំជក់ឱ្យផ្លាស់ប្តូររបៀបរស់នៅ និងទទួលបានការគាំពារសង្គមដទៃទៀត»។
បន្ថែមពីនេះ WHO ក៏អំពាវនាវឱ្យភាគីពាក់ព័ន្ធចូលរួមលើកកម្ពស់ការយល់ដឹងក្នុងចំណោមសាធារណជន និងអ្នកធ្វើគោលនយោបាយអំពីការចំណាយពិតនៃថ្នាំជក់ និងអត្ថប្រយោជន៍សុខភាព និងការអភិវឌ្ឍដ៏ធំធេងនៃការគ្រប់គ្រងថ្នាំជក់ ជាពិសេសក្នុងចំណោមប្រជាជនដែលមានចំណូលទាប។
អង្គការនេះបានបញ្ជាក់ថា៖ «ការជក់បារីត្រូវបានផ្សារភ្ជាប់ជាមួយនឹងការកើនឡើងនៃភាពធ្ងន់ធ្ងរនៃជំងឺ និងការស្លាប់ ចំពោះអ្នកជំងឺ ដែលកំពុងសម្រាកព្យាបាលជំងឺកូវីដ១៩នៅមន្ទីរពេទ្យ។ ការយកពន្ធថ្នាំជក់ដើរតួនាទីយ៉ាងសំខាន់ ក្នុងការគាំទ្រដល់ការការពារសុខភាពសកល និងការការពារសង្គម។ ការចូលរួមយ៉ាងខ្លាំងក្លាក្នុងការគ្រប់គ្រងថ្នាំជក់ អាចជួយកាត់បន្ថយភាពងាយរងគ្រោះ និងបង្កើនភាពធន់របស់ប្រទេសកម្ពុជា ក្នុងគ្រាមានអាសន្ននាពេលអនាគត»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ធ្លាប់បានប្រាប់ភ្នំពេញប៉ុស្តិ៍ថា ការសម្រេចដំឡើងពន្ធលើផលិតផលថ្នាំជក់បន្ថែមទៀតក្នុងពេលនេះគឺ អាស្រ័យទៅលើការសិក្សាលម្អិតបន្ថែមទៀត ខណៈការយកពន្ធលើផលិតផលថ្នាំជកក់ទាំងនេះ គឺរដ្ឋាភិបាលបានសិក្សាយ៉ាងហ្មត់ចត់រួចមកហើយ។
លោកបានសង្កត់ធ្ងត់ថា ក្រសួងសេដ្ឋកិច្ច បានយកចិត្តទុកដាក់យ៉ាងខ្លាំងក្នុងការគ្រប់គ្រងផលិតផលថ្នាំជក់នៅក្នុងប្រទេស ខណៈភាគីពាក់ព័ន្ធបានចាត់ទុកបញ្ហាទាំងនេះ ជាអាទិភាពដើម្បីពិភាក្សាគ្នា។
លោកបានបញ្ជាក់ថា៖ «កិច្ចការនេះ យើងបានប្រជុំច្រើនដងហើយ ដើម្បីវាយតម្លៃឱ្យបានគ្រប់ជ្រុងជ្រោយ ព្រោះគោលនយោបាយពន្ធមួយៗ គឺមិនស្រួលនោះទេ គឺវាមានចំណុចល្អ និងចំណុចអាក្រក់។ គ្រាន់តែបញ្ហានេះ រដ្ឋាភិបាលគាត់ត្រូវថ្លឹងថ្លែង ហើយក្នុងកិច្ចការដំឡើងពន្ធនេះ»។
លោក មុំ គង់ នាយកប្រតិបត្តិអង្គការចលនា ដើម្បីសុខភាពកម្ពុជា បានលើកឡើងថា ប្រសិនបើកម្ពុជាអាចដំឡើងពន្ធលើផលិតផលថ្នាំជក់បាន នោះគឺជាវិធានការមួយក្នុងការជួយគាំទ្រឱ្យប្រជាពលរដ្ឋអាចផ្ដាច់បារីបានជោគជ័យ ព្រោះថាការដំឡើងពន្ធថ្នាំជក់ នឹងនាំឱ្យអ្នកជក់កាត់បន្ថយបារី ឬផ្ដាច់បារីទាំងស្រុងតែម្តង។
លោកបានបញ្ជាក់ដែរថា៖«អ្នកជក់បារី ជក់តិចជាងមុន ឬផ្ដាច់បារីទាំងស្រុង ដែលនាំទៅរកការថយចុះចំនួនអ្នកស្លាប់ អ្នកពិការ និងអ្នកឈឺដោយការប្រើប្រាស់ថ្នាំជក់។ លើសពីនេះទៀតការដំឡើងពន្ធថ្នាំជក់ធ្វើឱ្យរាជរដ្ឋាភិបាលទទួលបានចំណូលពន្ធបន្ថែម សម្រាប់ប្រើប្រាស់លើការទប់ស្កាត់ជំងឺ ជាពិសេស ការទប់ស្កាត់ និងការព្យាបាលជំងឺកូវីដ១៩»៕
វីដេអូ៖
