ស្ទឹងត្រែងៈ ក្រុមអ្នកវិទ្យាសាស្ត្រតាមដានសត្វព្រៃរបស់អង្គការមូលនិធិសកល សម្រាប់អភិរក្សធម្មជាតិ (WWF) បានរកឃើញសត្វរំពេទន្លេសរុប ៦៨ ក្បាល ក្នុងអំឡុងពេលចាប់ផ្តើមសិក្សាពីចំនួនសត្វបក្សីនៅតាមតំបន់ទន្លេមេគង្គរវាងខេត្តក្រចេះ ស្ទឹងត្រែង និងព្រំប្រទល់ប្រទេសឡាវ នៅដើមខែកុម្ភៈឆ្នាំ ២០២១ នេះ។
យោងតាមសេចក្តីប្រកាសព័ត៌មានរបស់អង្គការ WWF ពីម្សិលមិញ បានឱ្យដឹងថា ចំនួនបក្សីនេះមានកំណើនទ្វេដងក្នុងរយៈពេល ៥ ឆ្នាំដែលកើនពី ៣១ ក្បាល ក្នុងឆ្នាំ ២០១៦ ដល់ ៦៨ ក្បាល ក្នុងដើមឆ្នាំ ២០២១ នេះ។
លោក អៀម សំអ៊ន់ អ្នកទទួលបន្ទុកផ្នែកស្រាវជ្រាវ និងតាមដានជីវចម្រុះ ប្រចាំតំបន់ទន្លេមេគង្គនៃអង្គការ WWF បានលើកឡើងថា ភាគច្រើនសត្វរំពេទន្លេនេះត្រូវបានគេប្រទះឃើញក្នុងរដូវកាលបន្តពូជរបស់ពួកវា ដែលចាប់ផ្តើមពីខែមករាដល់ខែឧសភា។ ចំនួនសត្វរំពេទន្លេដែលបានប្រទះឃើញពេលនេះ មានចំនួនច្រើនជាងចំនួនដែលបានប្រទះឃើញកាលពីឆ្នាំមុន ដែលពេលនោះឃើញសត្វរំពេទន្លេមានតែចំនួន ៦៤ ក្បាលប៉ុណ្ណោះ។
លោក អៀម សំអ៊ន់ បានរៀបរាប់ថា៖ «សមាជិកក្រុមអ្នកវិទ្យាសាស្ត្រគ្រប់គ្នាពិតជារំភើបខ្លាំងណាស់ចំពោះកំណត់ត្រាកំណើនសត្វរំពេក្នុងអំឡុងពេលការអង្កេតចំនួនសត្វបក្សីលើកដំបូងនៅក្នុងរដូវបន្តពូជឆ្នាំនេះ»។
ចំណែកលោក សេង ទៀក នាយកអង្គការ WWF ក៏បានសាទរចំពោះការរកឃើញសត្វរំពេទន្លេនេះដែរ ដែលវាជាដំណឹងល្អមួយសម្រាប់ជាការផ្តល់នូវការលើកទឹកចិត្ត និងមោទនភាពសម្រាប់ប្រទេសកម្ពុជា និងប្រទេសផ្សេងៗទៀតនៅក្នុងតំបន់។
លោកបានលើកឡើងថា៖ «ដំណឹងនេះក៏ជាការបង្កើននូវកិច្ចខិតខំប្រឹងប្រែងជាទៀងទាត់បានជំរុញឱ្យចំនួនសត្វបក្សីនេះកើនឡើងវិញ ដែលផ្តល់នូវក្តីសង្ឃឹមសម្រាប់ការស្តារសត្វប្រភេទនេះឱ្យមានចំនួនសម្បូរឡើងក្នុងប្រទេសកម្ពុជា និងក្នុងតំបន់»។
នាយកអង្គការ WWF រូបនេះបានកោតសរសើរចំពោះកិច្ចខិតខំប្រឹងប្រែងយ៉ាងខ្លាំងក្លាក្នុងកិច្ចការគ្រប់គ្រងតំបន់ការពារ ការពង្រឹងការអនុវត្តច្បាប់ និងការលើកកម្ពស់ការចូលរួមពីសំណាក់សហគមន៍របស់រដ្ឋាភិបាលថ្នាក់ជាតិ ថ្នាក់ក្រោមជាតិ និងអាជ្ញាធរមូលដ្ឋាន។
លោកថា ជាពិសេសមន្ទីរកសិកម្ម រុក្ខាប្រមាញ់ និងនេសាទ មន្ទីរបរិស្ថាន ភាគីពាក់ព័ន្ធនានា និងក្រុមការងាររបស់អង្គការ WWF ព្រមទាំងការចូលរួមរបស់សហគមន៍មូលដ្ឋាន ដែលកំពុងរស់នៅក្នុងតំបន់ទីជម្រកធម្មជាតិរបស់សត្វរំពេទន្លេ។
សត្វរំពេទន្លេជាប្រភេទបក្សីមួយដ៏កម្របំផុតក្នុងចំណោមប្រភេទបក្សីកម្រក្នុងតំបន់អាស៊ីអាគ្នេយ៍។ បើយោងតាម WWF ក្នុងប្រទេសកម្ពុជាសត្វរំពេទន្លេ បានធ្លាក់ចុះ ៨០% ក្នុងរយៈពេល ២០ ឆ្នាំកន្លងទៅដែលមានចំនួនប៉ាន់ប្រមាណសរុបទូទាំងប្រទេសចន្លោះពី ៥៤ ដល់ ៦២ ក្បាល ក្នុងឆ្នាំ ២០២១។
WWF នេះបានលើកឡើងថា កត្តាគំរាមកំហែងចម្បងៗចំពោះការរស់រានរបស់សត្វបក្សីនេះរួមមានការយាយីដល់ទីជម្រកធម្មជាតិរបស់វាបណ្តាលមកពីសកម្មភាពមនុស្ស ការជន់លិចសម្បុក ការប្រមូលយកស៊ុតបក្សីដោយមនុស្ស និងការបំផ្លាញសម្បុកសត្វដោយសត្វពាហនៈ និងសត្វផ្សេងៗ។ ហេតុនេះហើយបានជាអង្គការ IUCN បានផ្លាស់ប្តូរចំណាត់ថ្នាក់របស់បក្សីនេះក្នុងបញ្ជីក្រហមនៃប្រភេទសត្វទទួលរងគ្រោះរបស់ខ្លួនពីសត្វជិតរងគ្រោះទៅជាប្រភេទសត្វងាយរងគ្រោះវិញ។
កាលពីឆ្នាំ ២០២០ សម្បុកសត្វរំពេទន្លេចំនួន ៤៧ សម្បុកត្រូវបានការពារដោយសហគមន៍មូលដ្ឋាននៅតំបន់ទន្លេមេគង្គ៕