The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​ជាង​៤​ពាន់​នាក់​ចេញ​តវ៉ា​កាល​​សប្តាហ៍​មុន​ចូល​ធ្វើ​ការ​វិញ

កម្មករ​ជាង​៤​ពាន់​នាក់​ចេញ​តវ៉ា​កាល​​សប្តាហ៍​មុន​ចូល​ធ្វើ​ការ​វិញ

កម្មករ​ជាង​៤​ពាន់​នាក់​ចេញ​តវ៉ា​កាល​​សប្តាហ៍​មុន​ចូល​ធ្វើ​ការ​វិញ

6_story_1
កម្មករ កម្មការិនីរាប់រយនាក់ កំពុងតវ៉ានៅមុខរោងចក្រ Juhui Footwear កាលពីម្សិលមិញ សហការី

កំពង់ចាមៈ កម្មករ​នៅ​ក្រុម​ហ៊ុន​ Juhui Footwear C., Ltd នៅ​ក្នុង​ខេត្ត​កំពង់​ចាម​បាន​ត្រឡប់ចូល​​ធ្វើ​ការ​វិញ​នៅ​ថ្ងៃ​ពុធ​នេះ ​បន្ទាប់​ពី​រោង​ចក្រ​បាន​សន្យា​ចរ​ចា​​ពី​ការ​ទាម​ទារ​របស់​កម្មករ​ក្នុងរយៈ​ពេល​បី​ខែ​ម្ដង​។​​

តំណាង​កម្មករ​អ្នក​នាង ​សួង ​លីហ្សា ​បាន​​ឲ្យ​ដឹង​​ថា អ្នក​តវ៉ា​ទាំង​អស់​បាន​យល់​ព្រម​ត្រឡប់​ចូល​ធ្វើ​ការ​របស់​ខ្លួន​វិញ​ បើ​ទោះ​បី​ជា​ការ​ទាម​ទារ​របស់​ពួកគេ​មិន​ទាន់​បាន​សម្រេច​នៅ​ឡើយ​ក្ដី​។​​

អ្នក​នាង​បាន​បន្ថែម​ថា៖«​មានបី​​ចំណុច​​ទៀត​ដែល​​​រោង​ចក្រ​មិន​ទាន់​យល់​ព្រម​នៅឡើយ​​ ប៉ុន្តែ​យើង​ត្រឡប់​ចូល​ធ្វើ​ការ​វិញ​ ព្រោះ​តំណាង​រោង​ចក្រ​បាន​សន្យា​ជា​មួយ​កម្មករ​ថា ​នឹង​យក​សំណើ​របស់​កម្ម​ករ​​​ទៅ​ពិភាក្សា​គ្នា​នៅ​រៀងរាល់​បី​ខែ​ម្ដង​»​។​​

អ្នក​នាង​ សួង ​លីហ្សា ​បាន​លើក​ឡើង​ថា មន្ត្រី​ក្រុម​ហ៊ុន​នេះ​ក៏​បាន​ស្នើ​ឲ្យ​កម្មករ​សន្យា​ថា​នឹង​មិន​ធ្វើ​ការ​តវ៉ា​នៅ​ពេល​ពួកគេ​ទាម​ទារ​អ្វី​មួយ​ពី​ក្រុម​ហ៊ុន​នេះ​ផង​ដែរ​។

អ្នក​នាង​ សួង ​លីហ្សា ​បាន​អះ​អាង​ថា៖«​កម្មករ​ត្រូវ​ឈប់​ធ្វើ​ការ​តវ៉ា​ប្រឆាំង​នឹង​ក្រុម​ហ៊ុន​ នៅពេល​ពួកគេ​ចង់​បាន​ចំណុច​អ្វីមួយ​ តែ​ពួកគេ​អាច​ផ្ញើ​លិខិត​ស្នើ​សុំ​ទៅ​ឲ្យ​ថៅ​កែ​រោង​ចក្រ​និយាយ​ពី​អ្វី​ដែល​ពួកគេ​ទាម​ទារ​ប្រសើរ​ជាង​ការធ្វើ​ការ​តវ៉ា​។ យើង​បាន​យល់​ព្រម​នឹង​ការ​ស្នើ​សុំ​របស់​ថៅ​កែ​»។​

សូមបញ្ជាក់ថា កម្មករ​ជាង ​៤០០០ ​នាក់​បាន​នាំ​គ្នា​ធ្វើ​​ការ​តវ៉ា​នៅ​ខាង​មុខ​រោង​ចក្រ​នេះ​តាំង​ពី​ល្ងាច​ថ្ងៃ​សុក្រ​រហូត​ដល់​ពួកគេ​បាន​បិទ​ផ្លូវ​កាល​ពី​ថ្ងៃ​អង្គារ​​អស់​រយៈ​ពេល​ប្រហែល​ ១០ ​នាទី ​បន្ទាប់​ពី​តំណាង​ខ្លួន​ត្រូវបានគេដេញចេញពី​កិច្ច​ប្រជុំ​៕ PN

អត្ថបទគួរចាប់អារម្មណ៍