ភ្នំពេញៈ ក្រុមកម្មករប្រមាណជា ២០០នាក់ តំណាងឲ្យកម្មករពីគ្រប់រោងចក្រ បាននាំគ្នាបិទផ្លូវមុខក្រសួងការងារ មិនឲ្យមន្ត្រីនៃក្រុមប្រឹក្សាការងារចេញចូល ក្រោយពីពួកគេបានទទួលលទ្ធផលនៃកិច្ចប្រជុំដំឡើងប្រាក់ខែកម្មករនៅព្រឹកថ្ងៃអង្គារនេះ ដែលមិនសមបំណងតាមការទាមទាររបស់ពួកគេកន្លងមក។
កិច្ចប្រជុំដំឡើងប្រាក់ឈ្មួលកម្មករ ដែលទើបនឹងសម្រេចនៅព្រឹកនេះ គឺក្រុមប្រឹក្សាការងារ ដែលមានសមាសភាព ពីតំណាងសហជីពកម្មករ ថៅកែរោងចក្រ និងមន្ត្រីរាជរដ្ឋាភិបាល ដែលដឹកនាំដោយលោក អ៊ិត សំហេង រដ្ឋមន្ត្រីក្រសួងការងារ បានសម្រេចយករូបមន្តការដំឡើងប្រាក់ខែ ៥ឆ្នាំម្តង ដែលកម្មករ នឹងទទួលបានការដំឡើងរៀងរាល់ឆ្នាំរហូតដល់ ១៦០ ដុល្លារ នៅឆ្នាំ ២០១៨។
ក្រុមកម្មករ បានមកឈររង់ចាំស្តាប់លទ្ធផលនៃកិច្ចប្រជុំនេះ តាំងពីព្រឹកព្រលឹម និងបានលើកបដា ចង់ឲ្យមានការដំឡើងដល់ ១៦០ដុល្លារ នៅឆ្នាំក្រោយ ប៉ុន្តែមិនបានដូចការទាមទារ។
ក្រុមកម្មករ ក៏បានប្រកាសធ្វើកូដកម្មទូទាំង ប្រទេសផងដែរ ដើម្បីទាមទារឲ្យមានការដំឡើងតាមអ្វីដែលពួកគេចង់បាន។
ក្រោយពីការបិទផ្លូវប្រមាណមួយសន្ទុះ ក្រុមកម្មករបើកផ្លូវ និងត្រលប់ទៅវិញ ដើម្បីធ្វើការប្រជុំ ថាតើនឹង ធ្វើកូដកម្មទូទាំងប្រទេស នៅថ្ងៃណា?
