The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រាប់ពាន់​នាក់​ នៅតែ​បន្ត​អង្គុយ​មុខ​រោង​ចក្រព្រោះ​គ្មាន​ដំណោះ​ស្រាយ

កម្មករ​រាប់ពាន់​នាក់​ នៅតែ​បន្ត​អង្គុយ​មុខ​រោង​ចក្រព្រោះ​គ្មាន​ដំណោះ​ស្រាយ

កម្មករ​រាប់ពាន់​នាក់​ នៅតែ​បន្ត​អង្គុយ​មុខ​រោង​ចក្រព្រោះ​គ្មាន​ដំណោះ​ស្រាយ

IMG_5726
កម្មករ កម្មការិនីមកតវ៉ាមុខរោងចក្រ តាំងពីពេលព្រឹកមិញនេះ ផា លីណា

កណ្តាលៈ កម្មករ​រាប់ពាន់​នាក់​នៅ​រោង​ចក្រ​យ៉ុងវ៉ា ស្ថិតនៅ​ក្រុង​តាខ្មៅ​ខេត្ត​កណ្តាល​ នៅតែ​បន្ត​អង្គុយ​មុខ​រោង​ចក្រ​ ដោយ​គ្មានដំណោះ​ស្រាយ​ពី​គ្រប់​ភាគី​ពាក់ព័ន្ធ ខណៈពេលដែល​មន្ទីរ​ការងារ​ខេត្ត​គ្រោង​នឹងបង្កើត​គណកម្មាការ​មួយ​ដើម្បី​​ចុះ​ទៅពិនិត្យ​មើល​សំភារៈ​រោងចក្រ។

តាំង​ពី​វេលា​ម៉ោង​៦.៣០​នាទី​ព្រឹក បន្ទាប់​ពី​ថៅ​កែ​បាន​រត់​គេច​ខ្លួន​ដោយ​មិន​បាន​បើក​ប្រាក់​ខែ​ជូន​កម្មករ​តាំង​ពី​ខែ​មករា​ កម្មករ​ប្រមាណ​ជា​៧០០០​នាក់​មកពី​រោង​ចក្រ​ចំនួន​ពីរ គឺរោងចក្រ​យ៉ុងវ៉ា១​ និងយ៉ុងវ៉ា២​ ស្ថិតនៅ​ក្រុង​តាខ្មៅ​ខេត្ត​កណ្តាល​ បាន​ធ្វើ​ការតវ៉ា​នៅ​ខាង​មុខ​រោង​ចក្រ​ដោយ​បាន​បិទ​ផ្លូវ​ជាតិ​លេខ​២១​

តំណាងកម្មករ​បាន​ឲ្យដឹង​ថា​ កម្មករ​មិន​បាន​រួញ​រា​ក្នុងការ​បន្ត​ធ្វើ​ការ​តវ៉ា​នេះ​ទេ​ ដោយសារ​តែ​ពួកគេ​គ្មាន​ដំណោះ​ស្រាយ​។

អ្នកនាង​ សុខ​ ផល្លា​ បាន​ឲ្យ​ដឹង​ថា សម្ព័ន្ធ​សហជីព​ប្រជាធិបតេយ្យ​កម្មករ​កាត់ ដេរ​កម្ពុជា​បាន​ដាក់ពាក្យ​ស្នើសុំ​ដីការ​រក្សាការ​ពារហាម​​ថៅ​កែ​ក្រុម​ហ៊ុន​យក​ឥវ៉ាន់​ចេញ​មុនពេល​ពួក​គេ​ទទួល​បាន​ប្រាក់​ខែ​ និងប្រាក់​អត្ថប្រយោជន៌​ផ្សេងៗ​ទៅតាម​ច្បាប់​ការងារ។

អ្នកនាង សុខ​ ផល្លា​ បាន​បន្តទៀត​ថា​ កម្មករ​នឹង​ត្រលប់​មកតវ៉ា​នៅកន្លែង​ដដែល​នៅថ្ងៃ​ស្អែក​រហូត​ទាល់​តែ​ពួកគេ​ទទួល​បាន​នូវអី្វ​ដែលគេ​បានទាមទារ។​

លោកធុក វិន​ អនុប្រធាន​មន្ទីរ​ការងារ​ខេត្ត​កណ្តាល​ទទួល​បន្ទុក​ដោះស្រាយ​បាតុកម្ម​ កូដកម្ម​បាន​មាន​ប្រសាសន៌​ថា គណកម្មការ​ដោះ​ស្រាយ​វិវាទ​ការងារ​ខេត្ត​បានធ្វើ​ការប្រជុំ​ដើម្បី​រក​ដំណោះ​ស្រាយ​លើករណី​នេះ​ តែ​មិន​ទាន់​មាន​ចំ​លើយ​នៅឡើយ​ទេ។

លោកបានបន្ថែម​ថា​៖​ «​យើង​បាន​ធ្វើ​សេចក្តី​ព្រាង​មួយ​ក្នុងការ​បង្កើត​គណកម្ម​ការមួយ​ថ្មី​ទៀត​សំរាប់​ចុះ​ទៅ​ពិនិត្យ​សំភារៈក្នុង​រោងចក្រ​ រួច​ពិភាក្សាក្នុងការ​​ ដាក់លក់​ ឡៃឡុង​ដើម្បី​យកប្រាក់​មកបើក​ជូន​កម្មករ​​»។

លោកបន្ត​ថា​ លោក​រង់ចាំ​ការសំរេច​ពី​លោក​អភិបាល​ខេត្ត​លើ​សេចក្តី​ព្រាង​នេះ​សិន ទើប​ចាប់​ផ្តើម​ធ្វើ​ការអនុវត្ត​។​

ជាមួយគ្នា​នេះ​ដែរ​ លោក​ជា មុន្នី​ ប្រធាន​សហជីពសេរី​កម្មករ​ បាន​សរសេរ​លិខិត​មួយច្បាប់​ទៅ​លោក​ប្រធាន​សមាគមកាត់ដេរ​កម្ពុជា វ៉ាន់ ស៊ូអៀង ឲ្យ​ដោះ​ស្រាយ​ជូន​កម្មករ​រាប់ពាន់​នាក់នេះ​​ខណៈដែល​ថៅកែ​របស់គេ​បានរត់​គេច​ ខ្លួនបាត់។

អត្ថបទគួរចាប់អារម្មណ៍