The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ​១០​នាក់​រង​របួស ប៉ះ​ទង្គិច​ជាមួយ​សមត្ថកិច្ច​នគរបាល ​ពេល​កំពុង​តវ៉ា

កម្មករ​រោងចក្រ​១០​នាក់​រង​របួស ប៉ះ​ទង្គិច​ជាមួយ​សមត្ថកិច្ច​នគរបាល ​ពេល​កំពុង​តវ៉ា

កម្មករ​រោងចក្រ​១០​នាក់​រង​របួស ប៉ះ​ទង្គិច​ជាមួយ​សមត្ថកិច្ច​នគរបាល ​ពេល​កំពុង​តវ៉ា

4-231
កម្មករ កម្មការិនី ធ្វើការនៅរោងចក្រមារ៉ូឈុនឈរតវ៉ាបិទផ្លូវវេងស្រេងកាលពីម្សិលមិញ ម៉ៃ វីរៈ

កម្មករ​ កម្មការិនី ធ្វើការ​នៅ​រោងចក្រ​មារ៉ូឈុនឈរតវ៉ាបិទ​ផ្លូវ​វេង​ស្រេង​កាល​ពី​ម្សិល​មិញ។ រូបថតម៉ៃ វីរៈ

ភ្នំពេញៈ កម្មករ​ជាង ១០នាក់ ដែល​កំពុង​ធ្វើ​ការ​តវ៉ា​នៅ​រោងចក្រ​មារ៉ូឈុន ស្ថិត​នៅ​ក្នុង​ខ័ណ្ឌ​ពោធិ​សែន​ជ័យ សង្កាត់​ចោម​ចៅ​ បាន​រង​របួស​ធ្ងន់ និង​ស្រាល​កាល​ពី​ព្រឹក មិញ​ក្នុង​ការ​ប៉ះ​ទង្គិច​គ្នា​មួយ​ប្រាវ​រវាង​សមត្ថកិច្ច និង​កម្មករ។

លោក​ស៊ុន លៀង កម្មករ​ដែល​បាន​រង​របួស​ចំ​ក្រោម​ភ្នែក​ស្តាំ និង​ច្រមុះ​ដោយ​សារ​សមត្ថកិច្ច​គប់​ដុំថ្ម​ចំ និង​បាន​សន្លប់​ប្រហែល​មួយ​ម៉ោង បាន​និយាយ​ថា កាល​ពី​ប្រហែល​ជា​ម៉ោង​៩​ព្រឹក​មិញ​នេះ កម្មករ​បាន​ធ្វើ​ការ​តវ៉ា​នៅ​មុខ​រោងចក្រ រយៈពេល​មួយ​សប្តាហ៌​មក​ហើយ ដើម្បី​ទាមទារ​លក្ខខណ្ឌ​ការងារ និង​ប្រាក់ អប្បបរមា។

លោក​បាន​បន្ថែម​ថាៈ​«អំពើ​ហឹង្សា​បាន​កើត​ឡើង បន្ទាប់​ពី​កម្មករ​បាន​រារាំង​ការ​ដឹក​ឥវ៉ាន់​ចូល​ក្នុង​រោងចក្រ ពេល​នោះ​សមត្ថកិច្ច​នគរបាល និង​កង​រាជ​អាវុធហត្ថ បាន​យក​ដំបង​ឆក់​មក​ឆក់​កម្មករ និង​គប់​ដុំថ្ម​ទៅ​លើ​កម្មករ ធ្វើ​ឲ្យ​មាន​ការ​រង​របួស​ធ្ងន់​បី​នាក់ និង​ប្រមាណ​ជា​ច្រើន​នាក់​បាន​រង​របួស​ស្រាល»។

លោក​បាន​ឲ្យ​ដឹង​ទៀត​ថា កម្មករ​បាន​តបត​ទៅ​ក្រុម​សមត្ថកិច្ច​វិញ ដោយ​បាន​គប់ដុំ​ថ្ម​ចូល​ទៅ​ក្នុង​រោង​ចក្រ​វិញ តែ​លោក​មិន​បាន​ដឹង​ថា​តើ​សមត្ថកិច្ច​មាន​រង របួស​ឬ​អត់​នោះ​ទេ ដោយសារ​តែ​លោក​បាន​ដួល​សន្លប់​នៅ​ពេល​លោក​ត្រូវ​បាន​គេ​ឆក់​លោក។

កញ្ញា កាន់ ស្រីលក្ខណ៌ ជា​កម្មករ​បាន​ឲ្យ​ដែរ​ថា នាង​បាន​ស្ថិត​នៅ​ក្នុង​បរិវេណ​រោង​ចក្រ ឃើញ​មាន​ការ​គប់​គ្នា​ទៅវិញ​ទៅ​មក រវាង​កម្មករ​ដែល​តវ៉ា​នៅ​ខាង​ក្រៅ​រោង​ចក្រ​ និង​សមត្ថកិច្ច​នៅ​ខាង​ក្នុង​រោង​ចក្រ។

កញ្ញា​បាន​ថ្លែង​ថាៈ «សមត្ថកិច្ច​នគរបាល​មួយ​រូប​បាន​រង​របួស​បែក​ក្បាល ឡាន និង​ម៉ូតូ​មួយ​ចំនួន​របស់​មន្រ្តី​រោង​ចក្រ និង​កម្មករ​ដែល​បាន​ទុក​នៅ​ក្នុង​បរិវេណ​រោងចក្រ​ត្រូវ​រង​ការ​ខូច​ខាត​ដូច​ជា​បែក​កញ្ចក់ ឆូត​ជា​ដើម»។

លោក​លី វេង ប្រធាន​សហព័ន្ធ​សហជីព​កម្មករ​និយោជក បាន​ឲ្យ​ដឹង​ថា លោក និង​តំណាង​ក្រុមហ៊ុន​បាន​ជួប​ចរចារ​គ្នា​ពីរបីដង​រួច​មក​ហើយ តែ​មិន​មាន​ការ ព្រម​ព្រៀង​ណា​មួយ​ទេ។

លោក​បាន​បន្ត​ថាៈ​ «កម្មករ​នឹង​រក្សា​ការ​ទាមទារ​របស់​ពួកគេ​នៅ​ពេល​ក្រោយ និង​ព្រម​ត្រលប់​ចូល​ធ្វើ​ការ​វិញ ប្រសិន​បើ​ក្រុមហ៊ុន​មិន​ព្រម​កាត់​ប្រាក់​ខែ និង​ប្រាក់​ប្រចាំ​ថ្ងៃ​នៅពេល​ដែល​ពួកគេ​ធ្វើ​ការ​តវ៉ា»។

មិន​ទាន់​អាច​ទាក់​ទង​សុំ​ការ​បំភ្លឺ​ណា​មួយ​បាន​ទេ​ពី​មន្រ្តី​សមត្ថកិច្ច​ខ័ណ្ឌ និង​ក្រុមហ៊ុន​ទាក់​ទង​នឹង​ការ​ប៉ះ​ទង្គិច​គ្នា​កាល​ពី​ព្រឹក​មិញ​នេះ។

សូម​បញ្ជាក់​ថា កម្មករ​រោង​ចក្រ​មារ៉ូឈុន​ជាង​១ពាន់​នាក់​បាន​ធ្វើ​ការ​តវ៉ា​សុំ​ទាម ទារ​១១​ចំនុច​ដែល​មាន​ដូចជា​សុំ​តម្លើង​ប្រាក់​អប្បបរមា ប្រាក់​ធ្វើ​ដំណើរ​ ប្រាក់​ធ្វើ​ការ ទៀង​ទាត់ ឈប់​បង្ខំ​កម្មករ​ធ្វើ​ការ​ថែម​ម៉ោង​ជា​ដើម។

អត្ថបទគួរចាប់អារម្មណ៍