The Phnom Penh Post Search

Search form

Logo of Phnom Penh Post newspaper Phnom Penh Post - កិច្ច​ចរចា​តម្លើង​​ប្រាក់​ឈ្មួល​អប្បមា​កម្មករ​រោង​ចក្រ នៅ​ទ្រឹង​ដដែរ




កិច្ច​ចរចា​តម្លើង​​ប្រាក់​ឈ្មួល​អប្បមា​កម្មករ​រោង​ចក្រ នៅ​ទ្រឹង​ដដែរ

កិច្ច​ចរចា​តម្លើង​​ប្រាក់​ឈ្មួល​អប្បមា​កម្មករ​រោង​ចក្រ នៅ​ទ្រឹង​ដដែរ

130227_09
កម្មកររោងចក្រកាត់ដេរធ្វើកូដកម្មទាមទារប្រាក់ឈ្នួល និងលក្ខខណ្ឌការងារកន្លងមក

​ភ្នំពេញៈ ប្រាក់​ឈ្នួល​អប្បបរមា​ក្នុង​វិស័យ​កាត់​ដេរ​ និង​ស្បែក​ជើង​​ នឹង​នៅ​តែ​​មាន​ចំនួន​៦១​ដុល្លារ​ក្នុង​មួយ​ខែ ​សម្រាប់​​ពេល​​ឥឡូវ​នេះ បន្ទាប់​ពី​ក្រុម​​សហជីព ​និង​សមាគម​រោង​ចក្រ​កាត់​ដេរ​នៅ​កម្ពុជា​ មិន​អាច​ឈាន​ដល់​កិច្ច​ព្រម​ព្រៀង​​​​ស្តីពី​ការ​​​ដំឡើង​​​ប្រាក់​ឈ្នួល​អប្បបរមា​កាល​ពី​ម្សិល​មិញ។

​​ក្នុង​អំឡុង​ការ​ចរចា​ថ្ងៃ​ទី​ពីរ​នៅ​ក្រសួង​សង្គម​កិច្ច​ ​​សមាគម​រោង​ចក្រ​កាត់​ដេរ​នៅ​កម្ពុជា ​ជា​ថ្មី​ម្តង​ទៀត​ស្នើ​ដំឡើង​ចំនួន​៦​ដុល្លារ​ ដែល​ជា​ចំនួន​ស្នើ​ធ្វើ​ឡើង​​ដូច​ថ្ងៃ​ទី​មួយ​​ ​ខណៈ​​ខាង​សហជីព​មាន​ជំហ​រឹង​​លើ​ការ​ទាម​ទារ​ឲ្យ​មាន​ការ​ដំឡើង​ចំនួន​១២០​​ដុល្លារ ប៉ុន្តែ​ជំហរ​នេះ​ហាក់​បី​ដូច​ជា​បន្ទ​ន់​​បន្តិច​នៅ​​ពេល​ក្រោយ​មក។​

​លោក អាត់ ធន់ ​​ ប្រធាន​សហភាព​ការងារ​កម្ពុជា​ ​បាន​ថ្លែង​ថា ​សហជីព​មាន​ឆន្ទៈ​អាច​បញ្ចុះ​​មក​ត្រឹម​១០០​ដុល្លារ​ ដោយ​មិន​ចាំ​បាច់​​មាន​​​ប្រាក់​ទ្រ​ទ្រង់​សុខ​ភាព​ ៥ ដុល្លារ​ បន្ថែម​ ប៉ុន្តែ​មិន​អាច​ទទួល​យក​ចំនួន​​ដែល​ សមាគម​រោង​ចក្រ​កាត់​ដេរ​នៅ​កម្ពុជា​ ស្នើ​ឡើង​នោះ​ទេ។​

​លោក​បាន​ថ្លែង​​បន្ត​ថា​៖ «​​ពួក​គេ​មិន​បាន​ផ្តល់​ហេតុ​ផល​ដល់​យើង​ថា​ហេតុ​អ្វី​បាន​ជា​ពួក​គេ​មិន​អាច​បំពេញ​បាន​តាម​ការ​ទាម​ទារ​របស់​យើង​ និង​ប្រាប់​យើង​ថា ប្រសិន​បើ​ពួក​គេ​មិន​អាច​យល់​ ទុក​ឲ្យ​រដ្ឋា​ភិបាល​សម្រេច​»។ ​លោក​បន្ត​ថា​៖ «​សហជីព​នឹង​ពិភាក្សា​បញ្ហា​នេះ ហើយ​នឹង​ជួប​គ្នា​លើក​ក្រោយ​ទៀត​»។​

​សមាគម​រោង​ចក្រ​កាត់​ដេរ​នៅ​កម្ពុជា ​បាន​ស្នើ​​ដំឡើង​ចំនួន​៦​ដុល្លារ​ ​គឺ​ពី​៦១​ ទៅ​ ៦៧​ដុល្លារ​ ​ប៉ុន្តែ​បញ្ចូល​ប្រាក់​ ប្រាក់​ទ្រ​ទ្រង់​សុខ​ភាព​ ៥ ដុល្លារ​ ​ចូល​ទៅ​ក្នុង​ប្រាក់​ឈ្នួល​អប្បបរមា​នោះ សរុប​ទៅ​គឺ​ ៧២​ ដុល្លារ​ សម្រាប់​ប្រាក់​ឈ្នួល​អប្បបរមា​ថ្មី។

លោក Dave Welsh ប្រធាន​ប្រចាំ​ប្រទេស​របស់​មជ្ឈមណ្ឌល​អាមេរិក ដើម្បី​សាមគ្គី​ភាព​ការងារ​អន្តរជាតិ ​រដ្ឋា​ភិបាល​​បាន​ពិភាក្សា​ដំឡើង​ចន្លោះ​ពី​១៥​​ទៅ​៣០​ដុល្លារ​​ ខណៈ​ក្រុម​សហជីព​​បាន​បង្ហាញ​ពី​ជំហរ​រឹង​មាំ​របស់​ពួក​គេ​ ​បើ​ទោះ​បី​ជា​ពួក​គេ​សុខ​ចិត្ត​​បន្ថយ​​ចុះ​មក​ត្រឹម​១០០​ដុល្លារ​ក៏​ដោយ។

​តែ​ទោះ​បី​យ៉ាង​ណា​ក៏​ដោយ នៅ​ចុង​បញ្ចប់​​ វា​មិន​មាន​ការ​ឈាន​ដល់​កិច្ច​ព្រម​ព្រៀងគ្នា​នោះ​ទេ​ ហើយ​វា​មិន​ទាន់​ច្បាស់​នៅ​ឡើយ​ទេ​​ថា​តើ​អ្វី​ជា​ជំហ៊ាន​បន្ទាប់​​។

លោក Dave Welsh ​បាន​ថ្លែង​បន្ត​ថា​៖ «​វា​មិនទាន់​មាន​​ការ​គ្រោង​​កោះ​ហៅ​ការ​ប្រជុំ​គ្នា​ជា​ថ្មី​ម្តង​ទៀត​នៅ​ឡើយ​ទេ​ ​ដូច្នេះ​ត្រូវ​រង់​ចាំ​មើល​ទៀត»។

​លោក វង្ស សុវណ្ណ ​​អគ្គ​លេខា​ធិការ​រង​នៃ​​​គណៈ​កម្មាធិការ​ដោះ​ស្រាយ​​កូដ​កម្ម បាតុ​កម្ម​ ​គ្រប់​មុខ​សញ្ញា​ នៅ​ក្រសួង​សង្គម​កិច្ច​ បាន​​​​ថ្លែង​ថា រដ្ឋា​ភិបាល​បាន​ជំរុញ​ឲ្យ​ភាគី​ទាំង​អស់​​បន្ត​ការ​​​ចរចា​ទៀត​នៅ​ខែ​ក្រោយ​ ដោយ​សង្ឃឹម​ថា​​នឹង​អាច​ដំឡើង​​ប្រាក់​​ឈ្នួល​អប្បបរមា​បាន​នៅ​ខែ​មេសា​។

លោក​បាន​ថ្លែង​បន្ត​ថា​៖ «​​និយោជក​ត្រូវ​តែ​​ពិចារណា​លើ​បញ្ហា​នេះ​យ៉ាង​យក​ចិត្ត​ទុក​ដាក់ពី​មុន​ពេល​យល់​ព្រម​ ​ហើយ​ខ្ញុំ​គិត​​ថា ប្រសិន​បើ​ពួក​គេ​ដំឡើង​បន្ថែម​ទៀត​គឺ​​​​នឹង​មិន​ដំឡើង​ច្រើន​ទេ​​»។

​អគ្គ​លេខា​ធិការ​សមាគម​រោង​ចក្រ​កាត់​នៅ​​កម្ពុជា​​ លោក ខេន លូ ​មិន​អាច​ទាក់​ទង​​សុំ​អត្ថា​ធិប្បាយ​​បាន​ទេ​កាល​ពី​ម្សិល​មិញ។ PS ​

អត្ថបទគួរចាប់អារម្មណ៍