ភ្នំពេញៈ ក្រុមពិភាក្សាលើការតម្លើងប្រាក់ឈ្នួលអប្បបរមារបស់កម្មករលើវិស័យកាត់ដេរ និងស្បែកជើងដែលបានធ្វើការពិភាក្សាជាលើកទី២ នៅក្រសួងការងារក្រោមការដឹកនាំរបស់រដ្ឋមន្រ្តីក្រសួងការងារ កាលពីព្រឹកថ្ងៃច័ន្ទ នេះមិនទាន់បានទទួលលទ្ធផលជាផ្លែផ្កានៅឡើយទេ។
លោក អ៊ិត សំហេង រដ្ឋមន្រ្តីក្រសួងការងារបាននិយាយក្នុងអង្គប្រជុំថា កិច្ចពិភាក្សានេះមិនទាន់បានសម្រេចអ្វីមួយនៅឡើយទេ តែជាការប្រជុំចុងក្រោយរបស់ក្រុមការងារសិក្សាស្រាវជ្រាវដោយបានរៀបចំរបាយការណ៌ និងលើកឡើងពីរូបមន្តនៃការតម្លើងប្រាក់ឈ្នួលនេះ។
លោកបានថ្លែងថា៖ «មានរូបមន្ត ៣ ដែលយើងកំណត់ឲ្យមានការតម្លើងក្នុងរយៈពេល ៥ឆ្នាំ ពីឆ្នាំ ២០១៤ដល់ ២០១៨ ឲ្យបានដល់ ១៦០ ដុល្លារ ប៉ុន្តែយើងមិនទាន់បានកំណត់ឲ្យបានច្បាស់លាស់ និងមានការព្រមព្រៀងគ្នានៅឡើយទេ។ រូបមន្តទាំងនេះនឹងដាក់ទៅពិភាក្សាដោយភាគីសហជីព និងភាគីនិយោជក ហើយនឹងដាក់សម្រេចនៅថ្ងៃទី២៤ ខែធ្នូសប្តាហ៌ក្រោយនេះ»។
លោក អ៊ិត សំហេង បាននិយាយទៀតថា អ្នកណាក៏ចង់ឲ្យកម្មករទទួលបានប្រាក់ខែច្រើនដែរ ព្រោះពេលនោះកម្មករយើងក៏មានជីវភាពល្អប្រសើរ សេដ្ឋកិច្ចប្រទេសក៏ល្អប្រសើរផងដែរ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកាត់ដេរកម្ពុជាហាក់មិនទាន់មានការពេញចិត្តនឹងការតម្លើងប្រាក់ឈ្នួលនេះនៅឡើយទេ ហើយលោកនៅតែទាមទារឲ្យមានការតម្លើងចំនួន ១៥៤ ដុល្លារក្នុងឆ្នាំ២០១៤នេះតែម្តង។
